ශ්‍රී ලංකාවේ 75 වන නිදහස් දිනය අදට (04) යෙදී තිබේ.
නිදහස් දින සැමරුම් උළෙල අද පෙරවරුවේ ගාලු මුවදොර පිටිය ආශ්‍රිත භූමියේදී පැවැත්වීමට සියලු කටයුතු සුදානම් කර ඇත.
ජනාධිපති රනිල් වික්‍රමසිංහ මහතා පෙරවරු 08.15ට නිදහස් උත්සව භූමියට පැමිණීමට නියමිත අතර පසුව ජාතික ධජය එසවීමත් ජාතික ගීය ගායනය සමඟ නිදහස් දින උළෙලේ කටයතු ආරම්භ වේ.
යුද හමුදාවේ පිරිස් පාරිපාලන අධ්‍යක්ෂ බ්‍රිග්‍රේඩියර් උපුල් කොඩිතුවක්කු මහතා පැවසුවේ නිදහස් දින පෙළපාලිය පෙරවරු 10-30 පමණ වනතෙක් පැවැත්වෙන බවයි.
නිදහස් දින සැමරැම් පෙළපාලිය සඳහා පොලීසිය නියෝජනය කරමින් බළඇණි හතරක් සහභාගි වන බව පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නීතිඥ නිහාල් තල්දූව මහතා කීය.
නාවික හමුදාව නියෝජනය කරමින් පාබල බළඇණිවලට අමතරව නෞකා 03ක් 75 වන නිදහස් දින උ‍ළෙලට සහභාගි වීමට සියල්ල සූදානම් කර ඇති බව නාවික හමුදාවේ පරිපාලන අධ්‍යක්ෂ කොමදෝරු ධම්මික උඩුගම මහතා පැවසුවේය.
ගුවන් හමුදාවේ භූමි මෙහෙයුම් අධ්‍යක්ෂ එයාර් වයිස් මාෂල් වරුණ ගුණවර්ධන මහතා 75 වන නිදහස් දින සැමරුම් උළෙල වර්ණවත් කිරීම සඳහා ගුවන් යානා 14ක්ද එක්වන බව කීය.
මේ අතර, නිදහස් දින සැමරුම් උළෙල හේතුවෙන් ගාලුමුවදොර හා ඒ අවට මාර්ග රැසක් වසා තැබෙන බව ද පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නීතිඥ නිහාල් තල්දූව මහතා දැනුම් දුන්නේය.
මහේස්ත්‍රාත් නියෝගෙයක්..
මේ අතර, නිදහස් උත්සවය පැවැත්වෙන කාලය තුළ ගාලුවමෝදරට යන මාර්ග අවහිර නොකරන්නැයි කොටුව මහේස්ත්‍රාත් තිළිණ ගමගේ මහතා ඊයේ (03) තහනම් නියෝගයක් නිකුත් කළේය.
ගල්ඔය සිරිධම්ම හිමි, ජෝසප් ස්ටාලින්, දුමින්ද නාගමුව ඇතුළු 27 දෙනකු නම් කරමින් මහේස්ත්‍රාත්වරයා මෙම නියෝගය නිකුත් කළේය.
නිදහස් උත්සවය පැවැත්වෙන කාලය එය කඩාකප්පල් කිරීම සඳහා ගාලුමුවදොර මාර්ග අවහිර කිරීමට යන බවට බුද්ධි අංශවලට තොරතුරු ලැබී ඇතැයි කියමින් කොටුව, කොම්පඤ්ඤවීදිය, සහ කොල්ලුපිටිය පොලිස් ස්ථාන කළ ඉල්ලීමක් සැලකිල්ලට ගනිමින් මහේස්ත්‍රාත්වරයා අදාල නියෝගය නිකුත් කළේය.
