දැනට පවතින ගල්අඟුරු ජනවාරි 02 වැනිදා සිට අවසන් වන බවත්, ඊට පෙර ගල්අඟුරු නැවක් නොපැමිණියොත් විදුලි ඉංජිනේරුවන් කී පරිදි දැවැන්ත විදුලි කප්පාදුවකට යාමේ අවදානමක් ඇති බවත් මහජන උපයෝගිතා කොමිසමේ සභාපති ජනක රත්නායක මහතා කියයි.

පසුගිය බදාදා රාත්‍රී 12 වනවිට නොරච්චෝලේ බලාගාරය සඳහා මෙට්‍රික් ටොන් ලක්ෂයක ගල්අඟුරු ප්‍රමාණයක් තිබූ බවත්, දිනකට මෙට්‍රික් ටොන් 7500ක් අවශ්‍ය නිසා එම අඟුරු ප්‍රමාණය ජනවාරි 02 වැනිදා වනවිට අවසන් වන බව හෙතෙම කියා සිටී.

මෙරට පැමිණීමට නියමිත ගල්අඟුරු නැව මොසැම්බික් රාජ්‍යයේ මපිටෝ ප්‍රදේශයේ ඇති බවත්, ගල්අඟුරු පිරවීම අදින් (25) අවසන් වන නිසා එම නැව දින 13කට පසුව ලංකාවට පැමිණෙන බව ඒ මහතා කීය.

එසේ පැමිණි නැවෙන් ගල්අඟුරු බෑම සඳහා තවත් දින 5 කට ආසන්න කාලයක් ගතවෙන බවත් ඒ නිසා ජනවාරි 02 සිට එසේ ගල්අඟුරු බෑම සිදුවන දිනය තෙක් ගල්අඟුරු අහිමි වුවහොත් නොරච්චෝල බලාගාරය සම්පූර්ණයෙන් අක්‍රිය වන බව හෙතෙම වැඩිදුරටත් කීය.

ඒ නිසා විදුලි කප්පාදුවක අවදානම ඇති බව ජනක රත්නායක මහතා අවධාරණය කළේය.

ඇමතිගේ මන්තරේ..

මේ අතර, සති අන්ත ඉංග්‍රීසි පුවත්පතක් වාර්තාකර ඇත්තේ 2023 වසරේදී ලක්විජය ගල් අඟුරු බලාගාරයේ (නොරොච්චෝලේ) ජනන යන්ත්‍ර තුනේ නඩත්තු කටයුතු වෙනුවෙන් ඒවා වරින් වර දින 160කට ආසන්න කාලයකට නතරකර තැබීමට ලංකා විදුලිබල මණ්ඩලය (CEB) තීරණය කර ඇති බවයි.

ඒ අනුව විශය භාර අමාත්‍ය කාංචන විජේසේකර මහතා කියා සිටින්නේ නොරොච්චෝලේ බලාගාරයේ ඇති විදුලි ජනන ඒකක තුන A මට්ටම සහ C මට්ටමේ නඩත්තු සිදු කිරීමට ලංවිම සැලසුම් කර ඇති බවයි.

එම විදුලි ජනන ඒකක තුන නඩත්තු කරනු ලබන සෑම අවස්ථාවකම විදුලි ජනන ඒකක දෙකක් ඒකාබද්ධව මෙගා වොට් 600ක විදුලි සැපයුමක් පවත්වා ගනිමින් නඩත්තු කටයුතු සිදුකරන බවද ඔහු කියා සිටී.

විජේසේකර මහතා පවසන පරිදි, පළමු ජනන යන්ත්‍රයේ ක්‍රියාකාරිත්වය C මට්ටමේ නඩත්තු වැඩසටහනක් සඳහා දින 30ක කාලයකට (2023 මැයි-ජූනි) නතර කිරීමට ලංවිම සැලසුම් කර තිබේ.

එසේම C මට්ටමේ නඩත්තු වැඩසටහනක් සඳහා දෙවන ජනන යන්ත්‍රයේ ක්‍රියාකාරිත්වය දින 30ක කාලයක් (ජූනි-ජූලි 2023) සඳහා අත්හිටුවීමට නියමිතය.

විජේසේකර මහතා වැඩිදුරටත් අවධාරණය කර ඇත්තේ තෙවැනි ජනන යන්ත්‍රය මේ වසරේ විශාල අලුත්වැඩියාවක් සිදුකිරීමට නියමිතව තිබුණද, එම නඩත්තු කටයුතු 2023 සැප්තැම්බර් දක්වා කල් දමා තිබෙන අතර එහි නඩත්තුවට දින 100ක කාලයක් වෙන් කෙරෙන බවයි.

ඒ අනුව එහි නඩත්තු කටයුතු 2023 සැප්තැම්බර් 20 සිට දෙසැම්බර් 31 දක්වා සිදු කිරීමට නියමිය.

නොරොච්චෝලේ විදුලි බලාගාරයේ එක් ජනන යන්ත්‍රයක් විදුලිය ඒකක මෙගාවොට් 300ත් 270ත් අතර නිපදවන අතර එම ඒකක් තුනම ක්‍රියාත්මක වන විට දළ වශයෙන් මෙගාවොට් 900කට ආසන්න ප්‍රමාණයක් ජාතික විදුලි පද්ධතියට එකතුවේ.

ඒ අනුව ලංකා විදුලිබල මණ්ඩලයේ (CEB) සැලැසුම අනුව ලබන වසරේදී මෙම සම්පූර්ණ ඒකක ප්‍රමාණය ලබාගත හැකි වන්නේ දින 205 කට ආසන්න කාලයකි.

අලි මදිවට කොටි

මේ හෙළිදරව්වත් සමඟ විදුලි ක්ෂේත්‍රයේ ප්‍රවීනයෝ කියා සිටින්නේ ලංකා විදුලිබල මණ්ඩලය (CEB) මේ සැලැසුම ඉංග්‍රීසි පුවත්පතක් මගින් හෙළිකර ඇත්තේ ජනතාව නොමඟ යැවීමට බවයි.

ඔවුන් පෙන්වා දෙන්නේ මීට පෙර අමාත්‍යවරයා කියා සිටියේ නොරොච්චෝලේ බලාගාරයේ විදුලි ජනන යන්ත්‍ර තුන ලබන වසරේ අවස්ථා තුනකදී අලුත්වැඩියා කටයුතු සඳහා අක්‍රීය කිරීමට අවසර ඉල්ලා ඇති බවත්, ගල්අඟුරු ගැටලුවත් සමඟ එහි අලුත්වැඩියා කටයුත්තක් සඳහා එක ජනන යන්ත්‍රයක් පමණක් අක්‍රීය කිරීමට බලාපොරොත්තු වන බවත් දැන් වරින් වර තුනම අක්‍රිය කරන බව පවසන බවයි.

එය තරමක සැකයක් මතුකරනු ලබන තත්ත්වයක් බව ඔවුහු කියති.

කෙසේවුවද, නොරොච්චෝලේ විදුලි බලාගාරයේ අභයන්තර ආරංචි මාර්ග අනුව වාර්තා වන්නේ අදාළ නඩත්තු කිරීම් දින 90ක් තුළ කළ හැකි බවයි.

එතරම් කාලයක් පවා මේ සඳහා ගතවන්නේ එහි අමතර කොටස් චීනයෙන් ගෙන්වා ගැනීමට සිදුවීම හා එහි අලුත්වැඩියා කටයුතුවලට චීන ඉංජිනේරුවන්ගේ සහය ලබා ගැනීමට සිදුවීම නිසා බවයි.

ලංකා විදුලිබල මණ්ඩලය (CEB) සතුව ඉංජිනේරුවන් සියයකට ආසන්න ප්‍රමාණයක් සිටිය ද ඔවුන් කිසිවකුට මෙහි අලුත්වැඩියා කටයුත්තක් සිදු කළ නොහැකි බවද පැවසේ.

නොරොච්චෝලේ නඩත්තුවට දිගු කාලයක් සැලැසුම් කර එහි තොරතුරු සතිඅන්ත පුවත්පතකට ලබා දී ඇත්තේ ගල් අඟුරු හිඟය මඟ හැරීමට බවයි.

මේවන තෙක්ම විශය භාර අමාත්‍යවරයා ඇතුළු පිරිසට ගල්අඟුරු ගෙන්වා ගැනීමට අවශ්‍ය කරන කටයුතු සම්පාදනය කර ගැනීමට නොහැකි වී ඇතැයි මේ අතර වාර්තා වේ.

ගල් අඟුරු ටෙන්ඩරේ ගිවිසුම තාම නීතිපති ළඟ

ලංකා ගල් අඟුරු සමාගම (LCC) ලක්විජය බලාගාරයට අවම වශයෙන් දින 180 ක ණය පහසුකම් යටතේ ගල් අඟුරු මෙට්‍රික් ටොන් 2,250,000 (± 10%) සැපයීම සඳහා යෝජනා ඉදිරිපත් කර ඇති සමාගම් නවයෙන් තුනක් මේවන විට තෝරාගෙන තිබේ.

කෙසේවුවද, එම සමාගමේ සභාපති ෂෙහාන් සුමනසේකර මහතා පවස්න්නේ එම සමාගම්වලට සම්බන්ධ ගිවිසුම්වලට අදාළ කෙටුම්පත් ලේඛන නීතිපතිවරයා වෙත යවා ඇති බවයි.

ඔහු එම පුවත්පතට ම වැඩිදුරටත් සඳහන් කර ඇත්තේ “අපි නිල වශයෙන් කොන්ත්‍රාත්තුව ප්‍රදානය කරන්නේ නීතිපතිවරයා අවසර දුන් පසුවයි. එතෙක් අපි මූලික කටයුතු කරගෙන යනවා. අපි තවමත් කෙටුම්පත් කරමින් සිටින අතර මේ සියල්ල අනුමැතියට යටත්ව පවතිනවා,” යනුවෙනි.

මේ අනුව, ගල්අඟුරු ගෙනඒමේ ප්‍රමාදය උග්‍රවනු ඇති බව අනුමාන කිරීම අපහසු නොවන බවත්, අදාළ සටහන් පුවත්පතකින් පිටකරුණු ලැබුවේ ජනතාවට උත්තර බැඳීමේ පූර්ව සැලැසුමක් සඳහා යැයි විදුලි ක්ෂේත්‍ර විශේෂඥයෝ කියති.