රුපියල් කෝටි 76 ක් වංචාකර රටින් පැන මාලදිවයිනේ සැඟව සිටි මැණික් ව්යාපාරිකයකු සොයා මාලදිවයිනට ගිය අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් ඊයේ (05) ඔහු අලුයම මෙරටට රැගෙනවිත් ඇත.
මාලදිවයිනට පැන මාස හතරක් තිස්සේ සැඟව සිටි මොහොමඩ් ඉස්තිකාර් නමැති මැණික් ව්යාපාරිකයාව ජාත්යන්තර රතු නිවේදනයක් නිකුත් කර මෙරටට රැගෙන විත් තිබේ.
මෙම ව්යාපාරිකයා විසින් බේරුවල මැණික් ව්යාපාරිකයන්ගේ මැණික් ගල් විකුණා දෙන බව පවසා මැණික් ගල් රැගෙන ගොස් මුදල් වංචා කළ බවට ව්යාපාරිකයන් දෙදෙනකු අපරාධ පරීක්ෂණ දෙපාර්තමේන්තුවේ මූල්ය හා වාණිජ අපරාධ විමර්ශන කොට්ඨාසයට පැමිණිලි කර තිබිණි.
ඒ අනුව සැකකරු සොයා ඇරඹි විමර්ශනයේදී මාස හතරක් තිස්සේ මාලදිවයිනේ සැඟවී සිටින බව අනාවරණය වී ඇත. වහාම සැකකරු මෙරටට රැගෙන ඒම සඳහා මාලදිවයින් රජයේ සහාය ගනිමින් මෙහෙයුමක් ඇරඹීමට අපරාධ පරීක්ෂණ දෙපාර්තමේන්තුව භාර නියෝජ්ය පොලිස්පති රොහාන් ප්රේමරත්න නියෝග කර ඇත්තේ ඒ අනුවය.
එම මෙහෙයුම ඇරඹීමෙන් පසුව මාලදිවයින් ආරක්ෂක අංශ මගින් වීසා නොමැතිව එරට රැඳී සිටි චෝදනාවට සැකකරු අත්අඩංගුවට ගෙන තිබේ.
සැකකරු මෙරටට පිටුවහල් කිරීමට යෑමේදී ලංකාවට පිටුවහල් කළහොත් සියදිවි නසාගන්නා බවට තර්ජනය කර ඇත.
ඒ අනුව සැකකරුට එරෙහිව රතු නිවේදනයක් ගෙන සැකකරු මෙරටට රැගෙන ඒමට ඇරඹූ මෙහෙයුමට අනුව අපරාධ පරීක්ෂණ දෙපාර්තමේන්තුවේ විශේෂ කණ්ඩායමක් මාලදිවයිනට පිටත්කර තිබේ.
එම නිලධාරින් භාරයට ගත් සැකකරු මාලදිවයිනේ සිට ඊයේ (05 වැනිදා) අලුයම මෙරටට රැගෙනවිත් ගල්කිස්ස අධිකරණයට ඉදිරිපත් කිරීමට මූල්ය හා වාණිජ අපරාධ විමර්ශන කොට්ඨාසය පියවර ගෙන ඇත.
(අරුණ)
