එදිරිසිංහ ට්‍රස්ට් ඉන්වෙස්ට්මන්ට්ස් (ETI) ආයතනයේ අක්‍රමිකතා විමර්ශනය කිරීම සඳහා පත්කරන ලද ජනාධිපති විමර්ශන කොමිසම (PCoI) විසින් එම දේපළ නීති විරෝධී ලෙස විකුණා ඇති බවට ‌හෙළිකරගෙන ඇතැයි වාර්තා වේ.

එම දේපළ විකිණීමේදී මුදල් විශුද්ධිකරණය සිදුවී ඇති බවද අනාවරණය වී ඇති බව පැව​සේ.

එම දේපළ රජයට පවරාගෙන අපරාධ නීතිය යටතේ එදිරිසිංහ පවුලට එරෙහිව නීතිමය පියවර ගත හැකි බවද කොමිසම වැඩිදුරටත් පෙන්වා දී ඇති බව වාර්තා වේ.

ETI හි තැන්පත්කරුවන්ට මුදල් ගෙවීමට මහ බැංකුවේ මැදිහත්වීමෙන් එම සමූහය සතු දේපළ විකිණීමේ දී අක්‍රමිකතා සිදුව ඇත්දැයි සොයා බැලීම සඳහා හිටපු ජනපති ගෝඨාභය රාජපක්ෂ මහතා විසින් 2020 ජනවාරි මාසයේදී මේ කොමිෂන් සභාව පත්කරනු ලැබීය.

විශ්‍රාමලත් ශ්‍රේෂ්ඨාධිකරණ විනිසුරු කේ.ටී. චිත්‍රසිරි මහතා ත්‍රිපුද්ගල කමිටුවේ සභාපතිත්වය දරණු ලබන අතර, විශ්‍රාමික සොලිසිටර් ජනරාල් සුහද ගම්ලත් සහ ජ්‍යෙෂ්ඨ බැංකුකරුවෙකු වන ඩී.එම්. ගුණසේකර යන මහත්වරු සෙසු සාමාජිකයෝ වෙති.

මේ අතර, ස්වර්ණවාහිනී මාධ්‍ය ජාලය බෙන් හෝල්ඩිංග්ස් ඇතුළු සමාගම් කිහිපයකට විකිණීම ශ්‍රී ලංකා නීතියට පටහැනිද යන්න සොයා බැලීම ද මේ කොමිසමට පවරා තිබේ.

එසේම, කොමිසමේ නිර්දේශ සම්බන්ධයෙන් අවශ්‍ය ක්‍රියාමාර්ග ගන්නා ලෙස ජනාධිපතිවරයා අදාළ අංශ වෙත උපදෙස් ලබාදී ඇති බවද වාර්තා වේ.

රාජ්‍ය ආරක්ෂාවට තර්ජනයක් !

මේ අතර, ඊඒපී ව්‍යාපාර සමූහය, මූල්‍ය අර්බුදයකට මුහුණ පා තිබියදී ඔවුන් සතු මෙරට ප්‍ර‍මුඛ පෙළේ මාධ්‍ය ජාලයක් වන ‘ස්වර්ණවාහිනී’ මාධ්‍ය ජාලය ඇතුළු වත්කම් වලින් කොටසක් මිලදී ගත් විදේශීය සමාගමේ අධ්‍යක්ෂවරුන් කිහිප දෙනෙකු එල්.ටී.ටී.ඊ. සංවිධානය සමඟ සෘජු සම්බන්ධතා පවත්වන ලද පුද්ගලයන් බව රාජ්‍ය බුද්ධි අංශය විසින් විදුලි සංදේශ නියාමන කොමිෂන් සභාවට හා ජනමාධ්‍ය අමාත්‍යංශයට දන්වා ඇති බව මාධ්‍ය වාර්තා කර තිබේ.

රාජ්‍ය ආරක්ෂක අමාත්‍යංශය විසින් 2019 ‌නොවැම්බර් 15 වැනිදා MOD / TEC / 01 / MGMR Network / 2019 (04) යන ලිපි අනු අංකය මගින් මේ බැව් විදුලි සංදේශ නියාමන කොමිෂන් සභාවට හා ජනමාධ්‍ය අමාත්‍යංශයට දන්වා තිබේ. 

ඊඒපී ව්‍යාපාර සමූහයේ වත්කම්වලින් කොටසක් මෙසේ මිලදී ගත්තේ බෙන් හෝල්ඩිංග්ස් පුද්ගලික සමාගම (Ben Holdings Pvt) විසිනි.

මේ වන විට අදාළ සමාගම ලංකාවේ නීති රීති ද උල්ලංඝනය කරමින් ස්වර්ණවාහිනියේ 100%ක හිමිකාරිත්වය වක්‍රාකාරයෙන් ලබාගෙන ඇති බව පැවසේ.

බෙන් හෝල්ඩිංග්ස් පුද්ගලික  (Ben Holdings Pvt) සමාගමේ එල්.ටී.ටී.ඊ.යට සෘජු සම්බන්ධකම් ඇති පුද්ගලයන් තිදෙනෙකු සිටින බවට හෙළිවූයේ මේ සමාගම විසින් MGMR Networks (Pvt) Ltd වෙත අයත් මැක්ස් රූපවාහිනී (MGM Networks) ආයතනය මිලදී ගැනීමට කටයුතු කිරීම නිසාය.

එහිදී අදාළ රූපවාහිනී නාලිකාව මිලදී ගැනීමට පෙර එම මිලදී ගැනීම සිදු කරනු ලබන සමාගමේ සිටින අධ්‍යක්ෂවරුන් රාජ්‍ය ආරක්ෂක අමාත්‍යංශයේ නිෂ්කාශන සහතිකයක් ගතයුතු අතර අදාළ නිෂ්කාශන සහතිකය ලබා ගැනීමට යාමේදී මේ තොරතුරු හෙළිදරව් වී තිබේ.

කෙසේවුවද, ස්වර්ණවාහිනී රූපවාහිනී ආයතනය මිලදී ගැනීමේදී අදාළ අධ්‍යක්ෂවරුට රාජ්‍ය ආරක්ෂක අමාත්‍යංශයේ නිෂ්කාශන සහතික ගැනීමට අවශ්‍යවී නොමැත.

ඒ අදාළ රූපවාහිනී නාලිකාව සතු බලපත්‍රය පැරණි එකක් වීම නිසාය.

ඊඒපී ව්‍යාපාර සමූහයට මුදල් යොදවන ලද බෙන් හෝල්ඩිංග්ස් පුද්ගලික (Ben Holdings Pvt) සමාගම, බ්ලූ සමිට් කැපිටල් (Blue Summit Capital) හා ඇලෙක්ස් ලොවෙල් යන සියලුම පාර්ශවලට මුදල් ලබාදී ඇත්තේ ප්‍රබල ව්‍යාපාරිකයකු වන ශ්‍රී ලංකාවේ මුලතිව් හි ඉපදී පසුව ප්‍ර‍ංශයට ගොස් කෝටිපතියකු බවට පත්වූ අලිරාජ් සුභාෂ්කරන් නැමැත්තා විසිනි.

ඔහු බ්‍රිතාන්‍යයේ කොන්සවේටිව් පක්ෂයේ හා හිටපු අගමැති ජෝන් මේජර්ගේ ප්‍ර‍බල මූල්‍ය ආධාරකරුවකු බවද පැවසේ.

අදාළ තත්ත්වය මත ඊඒපී ව්‍යාපාරය රාජසන්තකවීමේ අවදානමක් ඇතැයි ද මේ අතර ශ්‍රී ලංකා මිරර් මීට පෙර වාර්තා කළේය.

මේ අතර මේ තොරතුරු සම්බන්ධයෙන් සමාජ මාධ්‍ය ඔස්සේද පෝස්ටුවක් සැරිසරමින් තිබේ.

එය පහත දැක්වේ

දීකිරට බලල්ලුත් සාක්කිලු

මේ අතර, පසුගියදා ඓතිහාසික මාතර ශ්‍රී පූර්වාරාම විහාරස්ථානයේදී ලයිකා සමූහ ව්‍යාපාරයේ සභාපති සුභාෂ්කරන් අලිරාජා මහතාට මාහාසංඝරත්නය විසින් විශ්ව කීර්ති, ශ්‍රී අභිමාන, ශ්‍රිජනරංජන දේශාභිමාන්‍ය සම්මානය ප්‍රධානය කිරීම ද විශ‌ේෂිතය.

කුසලතා පිරි සේවය, සහජ කුසලතා සහ කුසල් හැසිරීම පදනම් කරගෙන මේ සම්මානය පුදනු ලබන බව පැවසේ.

සබැඳි පුවත්:

ලයිකා හා ප්‍රසාද්‌‌ගේ ඩීල් එක අගමැති කැබිනට්ටුවේදී කුඩුකරයි

රූපවාහිනියේ මනි ලොන්ඩ්‍රියක් දාලා?: කාටද මේ බොරු කරන්නේ

බද්දට දුන්නෙ අයි නාලිකාවේ ගුවන්කාලය – බන්දුල (වීඩියෝ)

ටෙලිකොම් ගන්න ඉන්න අලි රාජා ජනපතිව ලන්ඩනයේදී මුණගැහෙයි!