ජාත්‍යන්තර මූල්‍ය අරමුදලේ විස්තීරණ ණය පහසුකම් තෙවැනි සමාලෝචනය සඳහා මෙරටට පැමිණ සිටින එම සංවිධානයේ නියෝජිත කණ්ඩායම ඊයේ (18 ) හිටපු ජනාධිපති රනිල් වික්‍රමසිංහ මහතා හමුවී සාකච්ඡා කර තිබේ.

කොළඹ, මල් පාරේ පිහිටි හිටපු ජනාධිපතිවරයාගේ කාර්යාලයයේදී පැවැත්වුණු එම සාකච්ඡාවට හිටපු පාර්ලිමේන්තු මන්ත්‍රි ෂෙහාන් සේමසිංහ, හිටපු ජනාධිපති කාර්ය මණ්ඩල ප්‍රධානි සාගල රත්නායක ඇතුළු පිරිසක් ද සහභාගිවී සිටි බව පැවසේ.

පසුගිය වසර දෙක තුළදී රටේ ආර්ථික තත්ත්වය ඉහළ නැංවීමට ගත් ක්‍රියාමාර්ග සම්බන්ධයෙන් මෙහිදී ජාත්‍යන්තර මූල්‍ය අරමුදලේ නියෝජිතයන් හිටපු ජනාධිපතිවරයාට ස්තූතිය පළ කර ඇතැයි ද පැවසේ.

ජනතාව දේශපාලනික වශයෙන් කුමන තීන්දුවක් ගත්තද ජාත්‍යන්තර මූල්‍ය අරමුදලේ වැඩපිළිවෙළ ඉදිරියට යායුතු බවද හිටපු ජනාධිපතිවරයා එම කණ්ඩායමට එහිදී පවසා ඇත.

එම වැඩසටහන ඉදිරියට ගෙන යාමට අවශ්‍ය අණ පනත් සියල්ලම සම්මත කර තිබෙන බවත්, ඒ අනුව කටයුතු කළහොත් වසර 2028 වන විටදී ණය ගෙවීමේ කටයුතු ආරම්භ කිරීමට හැකි බවද හිටපු ජනාධිපතිවරයා මෙහිදී එම කණ්ඩායමට අවධාරණය කර තිබේ.

2025 වසරට අවශ්‍ය ආදායම් සෙවීමට නව ආණ්ඩුව ගන්නා ක්‍රියාමාර්ග පිළිබඳව සොයා බලන බවද මෙහිදී ජාත්‍යන්තර මූල්‍ය අරමුදලේ නියෝජිතයෝ පැවසූහ.

එමෙන්ම, වර්තමාන ආණ්ඩුව මේ වනවිට මූල්‍ය අරමුදලේ වැඩපිළිවෙළ ඉදිරියට ගෙන යමින් සිටින බවද ඔවුහු කියා සිටියහ.

ජාත්‍යන්තර මූල්‍ය අරමුදලේ ජ්‍යෙෂ්ඨ දූත මණ්ඩල ප්‍රධානි පීටර් බෘවර් ඇතුළු පිරිසක් පෙරේදා (18 වැනිදා) මෙරටට පැමිණියහ.

නව ආණ්ඩුවේ ආර්ථික ප්‍රතිපත්ති සම්බන්ධවද මෙම කණ්ඩායම සාකච්ඡා කිරීමට නියමිත බව වාර්තා වේ.

එමෙන්ම, ජාත්‍යන්තර මූල්‍ය අරමුදල සමග ඇතිකරගත් එකඟතා ක්‍රියාත්මක කිරීම සහ මෙරට ආර්ථික ප්‍රතිසංස්කරණ වැඩසටහන යටතේ සිදුකර ඇති මෑත කාලීන ප්‍රගතිය පිළිබඳවද එම කණ්ඩායම විසින් සොයා බැලීමට නියමිතය.

මෙම සංචාරයෙන් පසුව විස්තීරණ ණය පහසුකමේ සිව්වැනි වාරිකය නිදහස් කිරීමට නියමිතය.

ජාත්‍යන්තර මූල්‍ය අරමුදල විසින් මෙරටට ලබාදෙන ඩොලර් බිලියන 2.9 ක සිව් අවුරුදු විස්තීරණ ණය පහසුකමේ පළමු වාරිකය ලෙස ඩොලර් මිලියන 333 ක් ඉකුත් 2023 වසරේ මාර්තු මස 21 වැනිදාද දෙවන වාරිකය ලෙස ඩොලර් මිලියන 337 ක් 2023 වසරේ දෙසැම්බර් මස 13 වැනිදාද තෙවැනි වාරිකය ලෙස ඩොලර් මිලියන 336 ක් මේ වසරේ ජූනි මස 12 වැනිදාද මෙරටට ලබාදී ඇත. ඒ අනුව, එම ණය පහසුකම යටතේ ඩොලර් බිලියනයකට ආසන්න මුදලක් ජාත්‍යන්තර මූල්‍ය අරමුදල විසින් මෙරටට ලබාදී ඇත.