බණ්ඩාරගම, මිල්ලනිය ප්‍රදේශයේ පාසලක සිසුන් කිහිපදෙනෙකුට පහර දී තුවාල සිදුකිරීමේ සිද්ධිය සම්බන්ධයෙන් එම පාසලේ විදුහල්පතිනිය සහ පොලිස් නිලධාරීන් දෙදෙනෙක් රක්ෂිත බන්ධනාගාරගත කර තිබේ.

සැකකරුවන් අද (08) කොළඹ අතිරේක මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව එලෙස නොවැම්බර් 16 දක්වා රක්ෂිත බන්ධනාගාරගත කර ඇත.

ඒ, ගුරුවරියකගේ මුදල් පසුම්බියක් සොරකම් කලේ යැයි චෝදනා කරමින් 05 වසර පංතියේ ඉගෙනුම ලබන සිසුන් කිහිප දෙනෙකුට අමානුෂික ලෙස පහරදී කෘරත්වයට පත් කළේ යැයි කියන චෝදනාව සම්බන්ධයෙනි.

එම සිද්ධිය සම්බන්ධයෙන් අත්අඩංගුවට ගත් අදාළ පාසලේ ගුරුවරියක සහ මිල්ලනිය පොලීසියේ රියදුරා ඇප මත මුදාහරින ලෙසත් මහෙස්ත්‍රාත්වරයා නියම කර තිබුණි.

එහිදී ජාතික ළමාරක්ෂක අධිකාරියේ නිලධාරීන් අධිකරණ හමුවේ කරුණු දක්වමින්,

“ස්වාමීනී… සැකකාර විදුහල්පතිවරිය සහ නියෝජ්‍ය විදුහල්පතිවරිය දරුවන් කිහිපදෙනෙකු පුස්තකාල ශාලාවට රැගෙනගොස් දණගස්වා ඔවුන්ගේ පාදවලට හා විලුඹට වේවැල්වලින් සහ ලී පතුරුවලින් පහර දී තිබෙනවා. පසුව පොලිස් ජීප් රථයක් පාසල තුළට ගෙන්වාගෙන පොලීසියට භාරදී තිබෙනවා. ජීප් රථයේ සිටි සැකකාර පොලිස් නිලධාරීන් ජීප් රථයේ තිබෙන “වෝකිටෝකි’ යන්ත්‍රවලට විදුලිය සපයන විදුලි රැහැන්වලින් අදාළ දරුවන්ගේ දණිස් පුළුස්සා තිබෙනවා. පසුව මුදල් පසුම්බිය පෙන්වීමට යැයි පවසමින් අදාළ දරුවන් පාසල අසල තිබෙන කැලෑ ප්‍රදේශයට ගෙනගොස් සැකකාර පොලිස් නිලධාරීන් විසින් පුවක් මල්වලින් අදාළ දරුවන්ට පහරදී තිබෙනවා. මෙම පහර කෑම නිසා අසාධ්‍ය වූ දරුවෙකු හොරණ මූලික රෝහලට ඇතුළත් කර තිබෙනවා.”

වැඩිදුරටත් කරුණු දැක්වූ එම අධිකාරියේ නිලධාරීන් මෙම සිද්ධියට අදාළ විමර්ශන අවසන් වී නොමැති බව සඳහන් කළේය.

සිද්ධිය සම්බන්ධයෙන් සොයා බැලීම සඳහා අධ්‍යාපන අමාත්‍යාංශය විසින් ද කමිටුවක් පත් කළේය.

අදාළ පාසලේ ගුරුවරුන් කිහිපදෙනෙකු සහ පාසල අයත් මිල්ලනිය පොලිස්බල ප්‍රදේශයේ පොලිස් නිලධාරීන් පිරිසක් විසින් එම ළමුන්ට පහර දී ඇති බව ජාතික ළමා ආරක්ෂණ අධිකාරිය සිදුකළ විමර්ශනවල දී අනාවරණය වී තිබුණි.

සොරකමක් සම්බන්ධයෙන් පාසල් ගුරුවරුන් කිහිපදෙනෙකු එම ළමුන්ට පහරදී ඇති අතර පසුව මිල්ලනිය පොලීසියේ නිලධාරීන් කැඳවා ළමුන් එම නිලධාරීන්ට භාරදී වධ හිංසා පමුණුවා ඇති බව අනාවරණය විය.

එහිදී පොලිස් නිලධාරින් අදාළ ළමුන් පිරිසට අමානුෂික ලෙස පහර දී ඇති අතර එක් සිසුවෙකු නේවාසිකව ප්‍රතිකාර ලබාගෙන ඇති බව ද වාර්තා විය.

(අදදෙරණ)