මුද්‍රණයට අවශ්‍ය කඩදාසි නැතැයි කියමින් දෙමසකට ආසන්න කාලයක් ගෙවිසෙත ලොතරැයිය මුද්‍රණය නොකරමින් මිලියන 600 කට (කෝටි 60කට) ආසන්න අලාභයක් සිදු කළ බවට චෝදනා එල්ලවී සිටින DPJ Holdings ආයතනයට නැවත වරක් එම ලොතරැයිය මුද්‍රණය කිරීමේ අවස්ථාව ලබාදීමේ පුවතක් ජාතික ලොතරැයි මණ්ඩලයෙන් වාර්තා වේ.

අදාළ සමාගම ජාතික ලොතරැයි මණ්ඩලයේ ගොවිසෙත ලොතරැයිය මුද්‍රණය කිරීමේ ටෙන්ඩරයේ හිමිකරුවන්ව සිටි කාලයේදී මේ වසරේ මාර්තු මාසයේ 14 වැනිදා සිට මැයි 12 වැනිදා දක්වා එම ලොතරැයිය වෙළඳ පොළට ඉදිරිපත් කර නොතිබිණි.

එම සමාගම විසින් මේ වසරේ මාර්තු මාසයේ 14 වැනිදා ගොවිසෙත දිනුම්වාර 3001 නිකුත් කිරීමෙන් පසුව එහි දිනුම්වාර 3002 ඉක්තු කර තිබුණේ මේ වසරේ මැයි 12 වැනිදාය.

මෙයින් ආසන්න වශයෙන් දිනුම්වාර 57ක් ජාතික ලොතරැයි මණ්ඩලයට අහිමිව ඇති අතර එක් දිනුම්වාරයට ගොවිසෙත ලොතරැයි ලක්ෂ 6කට ආසන්න ප්‍රමාණයක් මුද්‍රණය කරනු ලබයි.

මේ අතර, එම ලොතරැයිය දිනුම්වාර 57ක් මුද්‍රණය නොකිරීම හේතුවෙන් එහි ලාභයෙන් 14% ප්‍රතිශතයක් ලැබෙන කෘෂිකර්ම දෙපාර්තමෙන්තුවට ද විශාල පාඩුවක් සිදුව තිබේ.

එසේම එම සුවිප් විකුණා එම වෙළඳාමෙන් යැපෙන පිරිසට සිදුව ඇති පාඩුව කෝටි 10කට ආසන්න බව ද වාර්තා වේ.

මෙසේ DPJ Holdings විසින් සංවර්ධන ලොතරැයි මණ්ඩලයට හා කෘෂිකර්ම අමාත්‍යංශයට පාඩුකර තිබියදී ඉකුත් ඔක්තෝබර් මාසයේ ලොතරැයි මුද්‍රණයට ටෙන්ඩර් ඉදිරිපත් කර තිබූ මේ ආයතනයට නැවතත් එය ලබාදී ඇත.

ඒ එයට දෙවැනියට අඩුම ලංසු තැබූ මුද්‍රණ ආයතනයට වඩා ශත 0.05කට අඩුවෙන් DPJ Holdings විසින් ලංසු ඉදිරිපත් කර ඇති බව පවසමිනි.

තත්ත්වය මෙසේ තිබියදී මෙම ටෙන්ඩරය DPJ Holdings වෙත ලබාදීමට වැඩිම බලපෑම සිදු කර ඇත්තේ ජාතික ලොතරැයි මණ්ඩලයේ හිටපු සභාපති නීතීඥ ලලිත් පියුම් මහතා හා එහි කළමනාකරුවකු ලෙස කටයුතු කරන සංජීව එදිරිසිංහ මහතා විසින් බව මේවන විට හෙළිව ඇතැයි ද පැවසේ.

DPJ Holdings සමාගම හිටපු අමාත්‍ය රෝහිත අබේගුණවර්ධන මහතා විසින් පත්කරන ලද වරාය සභාපතිවරයාට සම්බන්ධයක් ඇති එකක් බවද මේ වන විට හෙළිව තිබේ.

ඉදිරියේදී NLB ය අලුත් ගොඩ නැගිල්ලකට යාමේ මගඩිය හා ලොතරැයි දිනුම් ඇදීම රූපවාහිනියෙන් ගැලැවීමේ සිද්ධිය සම්බන්ධයෙන් හෙළි නොවූ කරුණු රාශියක් අප ලිඛිත සාක්ෂි සහිතව හෙළිකරන්නෙමු.