තමන්ව ත්රස්තවාදය වැළැක්වීමේ පනත යටතේ අත්අඩංගුවට ගෙන රඳවාගැනීම නීතිවිරෝධී යයි ප්රකාශ කරන මෙන් ඉල්ලා අන්තර් විශ්ව විද්යාල ශිෂ්ය බලමණ්ඩලයේ කැඳවුම්කරු වසන්ත මුදලිගේ ඇතුළු තිදෙනෙක් ඉදිරිපත්කර ඇති මූලික අයිතිවාසිකම් පෙත්සම් සංශෝධනය කිරීමට ශ්රේෂ්ඨාධිකරණය අද (18) අවසර ලබා දුන්නේය.
මෙම පෙත්සම් අද එස්. තුරෙයිරාජා, ශිරාන් ගුණරත්න සහ මහින්ද සමයවර්ධන යන මහත්වරුන්ගෙන් සමන්විත ශ්රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී පෙත්සම්කාර පාර්ශවයක් වෙනුවෙන් පෙනී සිටි ජනාධිපති නීතිඥ උපුල් ජයසූරිය මහතා අධිකරණය හමුවේ කරුණු දක්වමින්, මෙම නඩුකරයට අදාළව නීතිපතිවරයා විසින් ගොනුකර ඇති විරෝධතා තුළින් තවත් වගඋත්තරකරුවන් පිරිසක් පිළිබඳ තොරතුරු අනාවරණය වී ඇති බැවින් ඔවුන්ද මෙම පෙත්සම්වල වගඋත්තරකරුවන් වශයෙන් නම්කිරීමට අවසර දෙන ලෙස ඉල්ලා සිටියේය.
ඒ සඳහා අදාළ පෙත්සම සංශෝධනය කිරීමට අවසර දෙන ලෙසත් ජනාධිපති නීතිඥවරයා අධිකරණයෙන් ඉල්ලා සිටියේය.
එම ඉල්ලීම පිළිගත් ශ්රේෂ්ඨාධිකරණය අදාළ පෙත්සම් සංශෝධනය කිරීමට අවසර දුන් අතර එම සංශෝධනවලට අදාළව යම් විරෝධතා තිබේ නම් ඒවා ගොනුකරන ලෙස නීතිපතිවරයාට නියෝග කළේය.
ඊට අමතරව සංශෝධිත පෙත්සමේ අලුතින් වගඋත්තරකරුවන් ලෙස නම් කරන පුද්ගලයින් වෙත නොතීසි යැවීමට පියවර ගන්නා ලෙසත් ශ්රේෂ්ඨාධිකරණය විසින් පෙත්සම්කාර පාර්ශවයේ නීතිඥවරුන්ට දැනුම් දුන්නේය.
ඉන් අනතුරුව පෙත්සම සලකාබැලීම සඳහා නොවැම්බර් 10 වනදා කැඳවන ලෙසත් නියෝග කළේය.
(අද දෙරණ)
