“ක්ලීන් ශ්‍රී ලංකා” වැඩසටහන යටතේ ශ්‍රී ලංකාවේ මාර්ග ආරක්ෂාව තහවුරු කිරීමේ ජාතික මට්ටමේ  සැලැස්මක් සකස් කිරීමට අදාළ මූලික සාකච්ඡාවක් අද (30) ජනාධිපති කාර්යාලයේදී පැවැත්විණි.

දිනෙන් දින මෙරට සිදු වන රිය අනතුරු නිසා සිදු වන පුද්ගල මරණ සහ තුවාලකරුවන් ගණන සංඛ්‍යාත්මකව ඉහළ යමින් තිබේ.

අනතුරු වළක්වා ගැනීම පිළිබඳ ජනතාව දැනුම්වත් කිරීම සහ මාර්ග භාවිතයේදී විනයක් ඇති කිරීමේ කාලීන අවශ්‍යතාව හඳුනා ගනිමින් ක්ලීන් ශ්‍රී ලංකා වැඩසටහන යටතේ මෙම ජාතික සැලැස්ම සකස් කිරීමට නියමිතය.

රට තුල සාමාජයීය, පාරිසරික සහ ආචාරධාර්මික පිබිදීමක් ඇති කරමින් සමාජය වඩා ඉහළ තලයකට ඔසවා තැබීමේ අරමුණින් ක්ලීන් ශ්‍රී ලංකා වැඩසටහන ක්‍රියාත්මක කෙරෙන අතර එහිදී විනයගරුක සමාජයක් සහ පුරවැසියකු ගොඩනැඟීම වෙනුවෙන් ප්‍රමුඛ අවධානයක් යොමු කරමින් කටයුතු කෙරේ. 

ශ්‍රී ලංකා රක්ෂණ නියාමන කොමිෂන් සභාවේ සභාපති, මාර්ග ආරක්ෂාව පිළිබඳ ජාතික සභාවේ සභාපති, ස්වාධීන රූපවාහිනි ආයතනයේ සභාපති මෙන්ම සෞඛ්‍ය හා ජනමාධ්‍ය අමාත්‍යාංශයේ සමාජීය හා ආචාධර්ම අංශ නියෝජනය කරන නිලධාරිහුද,  ජාතික රෝහලේ අධ්‍යක්ෂ (හදිසි අනතුරු සේවා) වෛද්‍ය ඉන්දික ජාගොඩ, මොරටුව විශ්වවිද්‍යාලයේ මහාචාර්ය සිවකුමාර් සහ මහාචාර්ය එච්.ආර්. පසිදු යන මහත්වරු සහ නියෝජ්‍ය පොලිස්පති (රථ වාහන) සහ තවත් නිලධාරීහු පිරිසක් මෙම සාකච්ඡාවට එක්ව සිටියහ.

(ජනාධිපති මාධ්‍ය අංශය)

අද (30) මධ්‍යම රාත්‍රි සිට බලපැවැත්වෙන පරිදි ඉන්ධන මිල සංශෝධනය කිරීමට ලංකා ඛනිජ තෙල් නීතිගත සංස්ථාව පියවර ගෙන තිබේ.

ඒ අනුව ඔක්ටේන් 92 පෙට්‍රල් ලීටරයක මිල රුපියල් 06කින් අඩුවන අතර එහි නව මිල රුපියල් 293කි.

ඔක්ටේන් 95 පෙට්‍රල් ලීටරයක මිල රුපියල් 20කින් අඩුවන අතර එහි නව මිල රුපියල් 341ක් වේ.

සුදු ඩීසල් ලීටරයක මිල රුපියල් 12කින් පහළ නැංවෙන අතර එහි නව මිල රුපියල් 274කි. 

එමෙන්ම ලංකා සුපර් ඩීසල් ලීටරයක මිල රුපියල් 06කින් අඩු කර ඇති අතර එහි නව මිල රුපියල් 325ක් වේ. 

ලංකා භූමිතෙල් මිල ද රුපියල් 05කින් පහළ දමා ඇති අතර එහි නව මිල රුපියල් 178කි.

සම්පූර්ණ නිවේදනය පහතින් දැක්වේ.

ලෝක කම්කරු දිනය හෙට (01) දිනයට යෙදී තිබේ.

ඒ වෙනුවෙන් මැයි දිනය සමරමින් දේශපාලන පක්ෂ සිය මැයි දින රැළි හෙට දිනයේ කොළඹ මෙන්ම කොළඹින් පිටත ද පැවැත්වීමට සැළසුම් කර ඇත.

ජාතික ජන බලවේගය සංවිධානය කරන මැයි දින රැළිය හෙට පස්වරු 3.30 ට ජනාධිපති අනුර කුමාර දිසානායක මහතාගේ ප්‍රධානත්වයෙන් කොළඹ ගාලු මුවදොර පිටියේදී පැවැත්වීමට නියමිතය.

‘රට හදන ජන බලය පෙළගැසෙන මැයි රැළිය’ යන තේමාවෙන් මෙවර ජාතික ජන බලවේගයේ මැයි රැළිය සංවිධානය වී ඇත.

සමගි ජන බලවේගය සංවිධානය කරන මැයි රැළිය හෙට පැවැත්වෙන්නේ තලවාකැලේ නගරයේදී ය.

‘ගම දිනවන සටනට කම්කරු බලය’ යන්න ඔවුන්ගේ මෙවර මැයි දිනයේ තේමාවයි. හෙට පස්වරු 2.00 ට විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් එම මැයි රැළිය පැවැත්වීමට නියමිතය.

හිටපු ජනාධිපති රනිල් වික්‍රමසිංහ මහතා මැයි දිනය වෙනුවෙන් විශාල රැස්වීමක් පැවැත්වීම ප්‍රයෝජනයක් නැති බව පවසයි.

ඒ අනුව එක්සත් ජාතික පක්ෂය මැයි පළමුවැනිදා ගමේ සිට මැතිවරණ කටයුතු කිරීමට තීරණය කර ඇති බවත් හෙතෙම සඳහන් කලේය.

මේ අතර මැයි රැලි දෙකක් සඳහා කොළඹ හයිඩ් පිටිය දේශපාලන පක්ෂ විසින් වෙන් කිරීම නිසා මත භේදාත්මක තත්ත්වයක් මතුව ඇති බව වාර්තා වේ.

පෙරටුගාමී සමාජවාදී පක්ෂය සිය මැයි රැලිය සඳහා කොළඹ මහනගර සභාවෙන් එම ක්‍රීඩාංගණය වෙන්කර ගෙන ඇත්තේ ජනවාරි මාසයේදීය. 
එහෙත් ශ්‍රී ලංකාවේ කොමියුනිස්ට් පක්ෂය ලංකා සම සමාජ පක්ෂ, නව ප්‍රජාතන්ත්‍රවාදී පක්ෂය හා ශ්‍රී ලංකා මහජන පක්ෂය ඒකාබද්ධ මැයි රැලිය සඳහා එම ක්‍රීඩාංගණය වෙන්කරගෙන ඇත්තේ පසුගිය වසරේ දෙසැම්බර් 11 වැනිදා ය.

මේ නිසා එකම දිනයේ ක්‍රීඩාංගණය දේශපාලන පක්ෂ දෙකකට ලබාදීමට නොහැකිවීම හේතුවෙන් කොළඹ මහ නගර සභාව සහ පොලිසිය එක්ව දේශපාලන පක්ෂ සමග පැවැත්වූ සාකච්ඡා ද අසාර්ථක වී ඇත.

කෙසේ වෙතත් පෙරටුගාමී සමාජවාදී පක්ෂය ප්‍රකාශ කරන්නේ ක්‍රීඩාංගණය ලබානොදීම නිසා කොළඹ මහ නගර සභාවට එරෙහිව නඩු පවරන බවයි.

පෙරටුගාමී සමාජවාදී පක්ෂය විසින් පවත්වනු ලබන මැයි රැලිය හෙට පැවැත්වෙන්නේ කිරුළපන ලලිත් ඇතුලත්මුදළි ක්‍රීඩාංගණයේදී සවස 3.00ට බව ඔවුන් විසින් මේ වනවිට සඳහන් කර තිබේ.

හෙට සවස 3.00ට හයිඩ් පිටියේ දී සමාජවාදී ජනතා පෙරමුණේ මැයි රැළිය පැවැත්වීමට නියමිතව ඇත.

හෙට දවසේ ලෝක කම්කරු දිනය වෙනුවෙන් පැවැත්වෙන මැයි දින පෙළපාළි සඳහා පොලීසිය විසින් ආරක්ෂාවක් මෙන්න විශේෂ රථවාහන සැලැස්මක් ද ක්‍රියාත්මක කිරීමට නියමිතය.

සබැඳි පුවත්