විවිධ තරාතිරම්වල පුද්ගලයන් රැසක් සූක්ෂ්මව රවටා සිදු කළ රුපියල් කෝටි 1500 කට ආසන්න මහා පරිමාණ පිරමීඩ වංචාවකට අදාළව අපරාධ පරීක්ෂණ දෙපාර්තමේන්තුව අත්අඩංගුවට ගත් චීන ජාතික යුවළක් රිමාන්ඩ් භාරයේ තබන ලෙස අධිකරණය ඊයේ (13) නියෝග කළේ ය.
‘‘ස්පෝට්ස් චේන්’’ නමැති පරිගණක මෘදුකාංගයක් හඳුන්වා දී එයට සම්බන්ධ කර ගන්නා පුද්ගලයන්ගෙන් මුදල් ලබාගෙන වංචා කිරීම සම්බන්ධයෙන් පවත්වන පුළුල් විමර්ශනයට අදාළව චීන ජාතික යුවළ අත්අඩංගුවට ගත් බවද අපරාධ පරීක්ෂණ දෙපාර්තමේන්තුවේ නිලධාරීහු අධිකරණයට දැන්වූහ.
කොළඹ පිහිටි ප්‍රධාන හෝටල්වල සම්මන්ත්‍රණ කැඳවමින් පිරමීඩ ජාවාරම්කරුවන් විවිධ වෘත්තීන්වල නිරතවන පුද්ගලයන් ඒකරාශී කරමින්, ඔවුන්ගෙන් මෙලෙස මුදල් ලබාගෙන වංචා කර තිබුණි.
මේ සැකකරුවන්ගේ බැංකු ගිණුම් පරීක්ෂා කිරීමේදී බිලියන 1.4ක් සංසරණය වී ඇති බවත්, මේ මුදල් කෙසේ ගිණුම්වලට ලැබුණේද? යන්න සම්බන්ධයෙන් තවම විමර්ශන පැවැත්වෙන බවත් රජයේ නීතිඥ හම්සා අබේරත්න මහතා අධිකරණය හමුවේ සඳහන් කළේය.
අධිකරණයට වැඩිදුර වාර්තාවක් ඉදිරිපත් කරමින් නීතිපති දෙපාර්තමේන්තුව වෙනුවෙන් පෙනී සිටි රජයේ නීතිඥ හම්සා අබේරත්න මහතා මේ සිද්ධියේ විමර්ශන තවමත් ප්‍රාථමික අවධියේ පසු වන බවත් ප්‍රධාන සැකකරු වන ශ්‍යාමාල් කිර්තා බණ්ඩාර යන අයගෙන් කරන ලද ප්‍රශ්න කිරීම්වලදී ඔහුගේ දුරකතනයෙන් දුන් වට්සප් පණිවිඩයකින් මේ චීන ජාතිකයන් දෙදෙනා සම්බන්ධ කරුණු අනාවරණය වූ බවත් කීය.
සැකකරුවන් වෙනුවෙන් පෙනී සිටි නීතිඥයා මෙම සැකකරුවන් සම්බන්ධයෙන් මීට පෙර අධිකරණයට කරුණු වාර්තා කර නැති බවත්, මෙය වරදක් නොව ඩිජිටල් කරන්සි යටතට අයත් වන කාර්යයක් බවත් මෙය නොබෝ දිනකින් ශ්‍රී ලංකාවේ ද නීතිගත කිරීමට අවධානය යොමු ව ඇති බව සඳහන් කළේය.
එසේම ශ්‍රී ලංකාවේ ලොකුම චීන ආයෝජකයාගේ පුතු වන මේ සැකකරු මෙවැනි වරදක් සිදු කර නැති බවද පැවසීය.
සිද්ධිය සම්බන්ධයෙන් දැනට පැමිණිලි 70ක් ලැබි ඇති බවත් සිද්ධියට අදාළව තවත් සැකකරුවන් අත්අඩංගුවට ගැනීමට ඇති බවටත් රහස් පොලිසිය අධිකරණය හමුවේ පැවසීය.
පිරමිඩ ක්‍රමයට මුදල් ආයෝජනය කළ පිරිසකගෙන් රුපියල් කෝටි 800කට අධික මුදලක් වංචා කළැයි කියන “ස්පෝර්ට් චේන් සොසයිටි ශ්‍රී ලංකා” නමැති ආයතනයේ ප්‍රධානීන් හත් දෙනකුගේ විදෙස් ගමන් තහනම් කළ කොළඹ අතිරේක මහේස්ත්‍රාත් හර්ෂණ කැකුණවෙල මහතා ඔවුන්ගේ බැංකු ගිණුම් පහක් අත්හිටුවීමට ද නියෝග කළේය.
මූලාශ්‍රය – දිවයින
