පලතුරු පිටරට යවන ආයතනයක මුවාවෙන් රුපියල් කෝටි හයක් පමණ වංචා කරමින් කොළඹ ලෝක වෙළෙඳ මධ්‍යස්ථානයේ සිට ජාවාරමක් මෙහෙයවූ හිටපු හමුදා සෙබළකු කටාන පොලිසිය මගින් පෙරේදා (27 වැනිදා) අත්අඩංගුවට ගෙන ඇත.

ඇග්‍රෝ ලංකා නමින් ව්‍යාපාරික ආයතනයක මුවාවෙන් ලෝක වෙළෙඳ මධ්‍යස්ථානයේ 19 වැනි මහලේ පවත්වාගෙන ගොස් ඇති මෙම කාර්යාලය මගින් හමුදාවේ ඉහළ නිලධාරින්ගේ සිට සියලුම නිලයන්වල අයද මුදල් ආයෝජනය කර ඇතැයි හෙළි වී ඇත.

සැකකරු 2019 දී යුද හමුදා සේවයේ සිටියදීම ටයිකෝට් පැලඳ ආයතන ප්‍රධානියකු ලෙස මුදල් ආයෝජනය කිරීම සඳහා යුද හමුදාවේ මෙන්ම වෙනත් අංශවල පිරිස්ද බඳවාගෙන තිබේ.

මෙම සැකකරු යුද හමුදාවේ ඉහළ නිලධාරින්ට පමණක් ආයෝජනය කළ මුද්ලවලට සියයට හත බැගින් පොලිය ගෙවා ඇතැයිද හෙළි වී ඇත.

සැකකරු 2020 දී හමුදාව අතහැර ගොස් 2023 දක්වා ලෝක වෙළෙඳ මධ්‍යස්ථානයේ කාර්යාලය පවත්වාගෙන ගොස් තිබේ. මොහු විසින් පලතුරු අපනයනය කිරීමට අමතරව ලෝක වෙළෙඳපොළේ ආයෝජනය කරන බවද පවසා මුදල් එකතු කර ඇත.

මොහු විසින් රටපුරා වැඩමුළු පවත්වමින් ආයෝජකයන් ලෙස විවිධ තරාතිරමේ අය බඳවාගෙන ඇතැයි හෙළි වී තිබේ. ගුරුවරියකට රුපියල් ලක්ෂ දහයක් වංචාකර ඇත.

මොහු විසින් ගනුදෙනුකරුවන්ගෙන් ගත් මුදල්ම ආයෝජනය කළ පුද්ගලයන්ට පොලිය ලෙස ගෙවා ඇතැයි හෙළි වී ඇත.

මෙම සැකකරු කදිරාන ප්‍රදේශයේ රැඳී සිටින බවට කටාන පොලිසියට ලද තොරතුරක් මත පොලිස් කණ්ඩායමක් විසින් සැකකරු අත්අඩංගුවට ගෙන තිබේ. ලක්ෂ 11 ක් වංචා කිරීම ගැන කටාන පොලිසියට පැමිණිලි ලැබී ඇත.

බකමූණ, ගල්ලෑව පදිංචි ආලෝක සම්පත් (41) නමැති සැකකාර සෙබළා කාලතුවක්කු රෙජිමේන්තුවේ සිට පලාගිය අයෙකි.

කටාන පොලිස් ස්ථානාධිපති වසන්ත සුදසිංහගේ උපදෙස් මත මෙම සැකරකුට එරෙහිව ඇති පැමිණිලි සොයා දිවයින පුරා පොලිස් ස්ථාන වෙත පණිවුඩ යැවීමෙන් පසු ඊයේ (28 වැනිදා) වන විට ඇඹිලිපිටිය, අම්බලන්ගොඩ ඇතුළු ප්‍රදේශවලින් පැමිණිලි ලැබී ඇත.

(අරුණ)