ඡායාරූප සටහන

ඇමෙරිකාව, ශ්‍රී ලංකා ගුවන් හමුදාවට බීච් ක්‍රාෆ්ට් කිංග් එයාර් 360ER යානය භාරදෙයි (ඡායා)

Published

8 months ago

October 10, 2024

editor

කටුනායක ශ්‍රී ලංකා ගුවන් හමුදා කඳවුරේ අද (10) පැවති උත්සවයකදී, එක්සත් ජනපදය විසින් ත්‍යාග කරන ලද බීච් ක්‍රාෆ්ට් කිංග් එයාර් 360ER ගුවන් යානයක්,එක්සත් ජනපද නාවික හමුදා අද්මිරාල්, එක්සත් ජනපද පැසිෆික් බලඇණියේ අණදෙන නිලධාරී, ස්ටීව් කේලර් විසින් ශ්‍රී ලංකා ගුවන් හමුදාවට නිල වශයෙන් භාර දෙන ලදී.

එක්සත් ජනපද තානාපතිනී ජුලී චන්ග්, ආරක්ෂක අමාත්‍යාංශයේ ලේකම් එයාර් වයිස් මාර්ෂල් සම්පත් තුය්යකොන්ත (විශ්‍රාමික) සහ ශ්‍රී ලංකා ගුවන් හමුදාධිපති එයාර් මාර්ෂල් උදේනි රාජපක්ෂ යන මහත්ම මහත්මීන්ගේ සහභාගීත්වයෙන් පැවති උත්සවයකදී මෙම අති නවීන ගුවන් යානය භාරදීම සනිටුහන් විය.

මෙම අවස්ථාව එක්සත් ජනපද-ශ්‍රී ලංකා දෙරටෙහි දිගු කාලීන සහයෝගිතාවය සංකේතවත් කරන අතර ශ්‍රී ලංකාවේ සමුද්‍රීය ආරක්ෂාව සහ ස්වෛරීභාවය ශක්තිමත් කිරීමේ තීරණාත්මක පියවරක් වනු ඇත.

නවීනතම නිරීක්ෂණ තාක්‍ෂණයෙන් සන්නද්ධ කිංග් එයාර් ගුවන් යානය, ශ්‍රී ලංකා මුහුදු සීමාවේ මුර සංචාරයේ යෙදීමට, සමුද්‍රීය තර්ජන වලින් ආරක්ෂා වීමට සහ ඉන්දියන් සාගරයේ වැදගත් වෙළෙඳ මාර්ග සුරක්ෂිත කිරීමට ශ්‍රී ලංකාවට ඇති හැකියාව ශක්තිමත් කරනු ඇත.එක්සත් ජනපද තානාපතිනි ජුලී චන්ග්, කිංග් එයාර් ගුවන් යානය ලබා දීමේ වැදගත්කම අවධාරණය කළ අතර, එය එක්සත් ජනපදය හා ශ්‍රී ලංකාව අතර පවතින ශක්තිමත් සහයෝගිතාවය ,ඉන්දු-පැසිෆික් කලාපයේ සාමය සහ සෞභාග්‍යය සහතික කිරීම උදෙසා වන ශ්‍රී ලංකාවේ කාර්යභාරය පිළිබඳ සාක්ෂියක් ලෙස හඳුන්වා දුන්නාය: “සමුද්‍රය අප එකිනෙකා හා සම්බන්ධ කරන බැවින් එහි ආරක්ෂාව සාමූහික වගකීමක් බවට වන ශ්‍රී ලංකාවේ දැක්ම,හවුල්කරුවෙකු ලෙස,එක්සත් ජනපදය ශ්‍රී ලංකාව සමග එක්ව බෙදා ගනියි. ආර්ථිකයේ ජීවනාලිය වන ශ්‍රී ලංකාවේ සමුද්‍රීය වෙළඳ මාර්ග ආරක්ෂා කිරීම සඳහා සමුද්‍රීය වසම් දැනුවත් කිරීම ඉතා වැදගත් වේ. සාගරකලාප , ආර්ථික අවස්ථාවන්ගෙන් පොහොසත් වන අතරම , නීති විරෝධී මසුන් ඇල්ලීමේ සිට මිනිස් ජාවාරම් සහ වෙනත් නීති විරෝධී, බලහත්කාර සහ වංචාකාරී ක්‍රියාකාරකම් දක්වා සැලකිය යුතු තර්ජනවලට ඒවා ගොදුරු වේ. මෙම බීච් ක්‍රාෆ්ට් කිංග් එයාර් යානය ඔබේ ජාතික සමගියේ සහ සෞභාග්‍යයේ නිරන්තර ආරක්ෂකයෙකු ලෙස ඔබට අයිති දේ සාධාරණ ලෙස ආරක්ෂා කිරීමට සැමවිටම සුපරීක්ෂාකාරී වෙමින් සේවය කරනු ඇතැයි මම බලාපොරොත්තු වෙමි.”

ශ්‍රී ලංකා ගුවන් හමුදාධිපති එයාර් මාර්ෂල් උදේනි රාජපක්ෂ විසින් ශ්‍රී ලංකාව සහ එක්සත් ජනපදය අතර දිගුකාලීන හවුල්කාරිත්වයේ සුවිශේෂී සන්ධිස්ථානයක් ලෙස බීච් ක්‍රාෆ්ට් කිංග් එයාර් 360ER ගුවන් යානය පිළිගනු ලැබීය. “බීච් ක්‍රාෆ්ට් කිංග් එයාර් 360 ER ගුවන් යානය හඳුන්වාදීම, සමුද්‍රීය වසම් දැනුවත් කිරීම සඳහා වන ගුවන් හමුදාවේ ගුවන් බලය කාර්යක්ෂම කිරීමේ එක් ප්‍රධාන පියවරක්” යැයි ඔහු ප්‍රකාශ කළේය. “වගකීම් සහගත හා ප්‍රධාන පාර්ශවකරුවෙකු ලෙස අපගේ කාර්යභාරය පිළිබිඹු කරමින්, ඉන්දියානු සාගර කලාපය තුළ සමුද්‍රීය ආරක්ෂාව සහ HADR ධාරිතාව ඉහළ නැංවීම කෙරෙහි අපගේ වැඩි අවධානය යොමු කිරීම මෙම අවස්ථාවෙන් අවධාරනය කරයි.” තවද, මෙම නවීන ISR පද්ධතිය ගුවන් සහ සමුද්‍රීය වසම්වල තර්ජනවලට මුහුණ දීම සඳහා ද, අපගේ කලාපයේ අන්තර් ජාතික අපරාධ මැඩලීම සඳහා වන සාමූහික ආරක්ෂාව සහ අන්තර් ක්‍රියාකාරීත්වය පෝෂණය කිරීමේ අඛණ්ඩ උත්සාහයන් සඳහා ද වන නවතම එකතුවක් වනු ඇත. කලාපීය සාමය සහ ආරක්ෂාව සඳහා වන අපගේ වගකීම් ඉටු කරන අතරම,කලාපීය සමුද්‍රීය වසම් දැනුවත් කිරීම සඳහා විශේෂයෙන් සමුද්‍රීය නිරීක්ෂණ, අධීක්ෂණ සහ මුර සංචාරයේ දී ප්‍රමුඛ කාර්යභාරයක් ඉටු කිරීමට අපි බලාපොරොත්තු වෙමු.

අද්මිරාල් ස්ටීව් කේලර් ශ්‍රී ලංකාව සමඟ කලාපීය ආරක්ෂාව සහ හවුල්කාරිත්වය සඳහා වූ එක්සත් ජනපදයේ කැපවීම යලි තහවුරු කරමින් මෙසේ ප්‍රකාශ කළේය: “අද උත්සවය,එක් ගුවන් යානාවකට වඩා බොහෝ පුළුල් වූ අවස්ථාවක් ,එය අප දෙරටේ ස්වෛරීභාවය ආරක්ෂා කිරීම සහ ඉන්දියන් සාගරයේ සංකීර්ණ සමුද්‍ර අභියෝගවලට මුහුණ දීම සඳහා වූ කැපවීම පිළිබිඹු කරන අවස්ථාවක්. අපගේ සහයෝගීතාවය ශක්තිමත් කිරීමට ද සාමය සහ ස්ථාවරත්වය සඳහා වන හවුල්කාරී දැක්ම, නීතිරීති පදනම් කරගත් ජාත්‍යන්තර පිළිවෙත් වලට අනුකුලව ඉදිරියට ගෙන යාමට මම බලාපොරොත්තු වෙමි.”

එක්සත් ජනපද ආරක්ෂක දෙපාර්තමේන්තුවේ හවුල්කරුවන්ගේ ධාරිතාව ගොඩනැංවීමේ වැඩසටහන මගින් අරමුදල් සපයන ලද කිංග් එයාර් යානය, බීච් ක්‍රාෆ්ට් ටෙක්ස්ට්‍ර්න් ඒවියේෂන් ( Beechcraft Textron Aviation ) විසින් නිෂ්පාදනය කරන ලද අතර 2022 වසරේදී සාදා නිම කරන ලදී. මෙම යානයෙහි සමුද්‍රීය නිරීක්ෂණ පහසුකම් වැඩිදියුණු කර එක් කිරීම 2024 වසරෙහිදී සිදු කරන ලදී.

ගුවන් යානයේ මෙහෙයුම් කටයුතු සම්බන්ධයෙන් ශ්‍රී ලංකා ගුවන් හමුදා සාමාජිකයින් කැන්සාස් සහ ෆ්ලොරිඩා හි විශේෂ පුහුණුවක් ලබා ඇති අතර, ඉදිරි මාස තුන ඇතුළත එක්සත් ජනපද රජයේ නිලධාරීන් විසින් වැඩිදුර පුහුණුවක්ද ලබා දෙනු ඇත.

කිංග් එයාර් 360ER ගුවන් යානය ත්‍රිකුණාමලයේ චීන වරායේ පිහිටි සමුද්‍ර මුර සංචාර 3 වැනි බලඝණයට සම්බන්ධ වීමට පෙර රත්මලාන ගුවන් හමුදා කඳවුරේ දී තවදුරටත් අවසාන සැකසුම් කටයුතු සඳහා සුදානම් කෙරෙනු ඇත.

ක්‍රීඩා

චීනයෙන් ලංකාවට මකර බෝට්ටු 5ක් (ඡායා)

Published

15 hours ago

June 2, 2025

editor

චීනය විසින් ශ්‍රී ලංකාවට මකර බෝට්ටු 5ක් ලංකාවට ප්‍රදානය කර තිබේ.

මෙම ප්‍රදානය කිරීම පසුගිය 31 වැනිදා දියවන්නා ඔරු පැදීමේ මධ්‍යස්ථානයේදී පැවැත්වුණු චීන – ශ්‍රී ලංකා මිත්‍රත්ව ඩ්‍රැගන් බෝට්ටු ශූරතාවලිය අතරතුරදී සිදුවිය.

මෙරට චීන තානාපති කාර්යාලය හා තරුණ කටයුතු සහ ක්‍රීඩා අමාත්‍යංශය විසින් පැවැත්වූ මෙම තරගාවලිය සංවිධානය කර තිබුණේ ශ්‍රී ලංකාවේ කැනූඉං සහ කායැකිං ජාතික සංගමය, කලම්බු ඉන්ටර්නැෂනල් කන්ටේනර් ටර්මිනල් සමාගම, මෙරට පවතින චීන වාණිජ මණ්ඩලය හා Sri Lanka Overseas Chinese Association විසිනි.

පාසැල් හා විශ්ව විද්‍යාල කණ්ඩායම් මෙන්ම ක්‍රීඩා සමාජ, ආරක්ෂක අංශ හා චීන කණ්ඩායම් ද මීට එක්විය. මොවුන් අතරට යොවුන් ක්‍රීඩක ක්‍රීඩිකාවන් රැසක් ඇතුළත් කණ්ඩායම් 05ක් යාපනයෙන් ද එක්වීම සුවිශේෂී විය.

මකර බෝට්ටු 5ක් ලංකාවට ප්‍රදානය කිරීම සම්බන්ධයෙන් සිය ස්තූතිය පුද කළ තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ මහතා වැඩිදුරටත් පවසා සිටියේ මෙය හුදෙක් ක්‍රීඩා තරගාවලියක් පමණක් නොව දෙරට අතර මිත්‍රත්වය, සංස්කෘතිය හා සහයෝගීතාවයේ ප්‍රබල සංකේතයක් බවයි.

මෙහිදී අදහස් දැක්වූ චීන තානාපති – චී ජන්හොංග් මහතා පවසා සිටියේ මෙම ශූරතාවය, දෙරට අතර ක්‍රීඩා හා සංස්කෘතික හුවමාරුවන් තවදුරටත් ගැඹුරු කිරීමටත් දෙරට ජනතාව අතර අන්‍යෝන්‍ය අවබෝධය සහ මිත්‍රත්වය වැඩි දියුණු කිරීම සඳහා නව ආරම්භක ලක්ෂ්‍යයක් වන බවයි.

ශ්‍රී ලංකාවේ කැනූඉං සහ කායැකිං ජාතික සංගමයේ සභාපති – රියර් ඇඩ්මිරල් එච්.එන්.එස්. පෙරේරා මහතා පැවසූවේ මෙම අවස්ථාව සම්ප්‍රදාය හා නූතනත්වය අතර පාලමක් බඳු බවයි.

තරුණ කටයුතු සහ ක්‍රීඩා අමාත්‍ය – සුනිල් කුමාර ගමගේ, තරුණ කටයුතු නියෝජ්‍ය අමාත්‍ය එරංග ගුණසේකර, චීන තානාපති – චී ජන්හොංග් යන මහතුන් අතින් ජයග්‍රාහකයන් හට කුසලාන සහ සහතික පත්‍ර පිරිනැමුණි.

පිරිමි හා කාන්තා විවෘත අංශ වල ජයග්‍රහණය ලැබීමට පිළිවෙලින් ශ්‍රී ලංකා නාවික හමුදාවේ හා කොළඹ විශාඛා විද්‍යාලයේ කණ්ඩායම් සමත් වූ අතර, කණිෂ්ට කාන්තා අංශයේ ජයග්‍රහණය හිමිවූයේද විශාඛා විද්‍යාලයටයි.

මේ අතර, කණිෂ්ට පිරිමි අංශයේ ජය හිමිවූයේ යාපනයේ තම්පඩ්ඩි රජයේ දෙමළ මිශ්‍ර පාසලේ කණ්ඩායමටයි.

මාස්ටර්ස් කාන්තා අංශයේ ජය සීලෝං කණ්ඩායමටත්, මිශ්‍ර අංශයේ ජය සබරගමු විශ්ව විද්‍යාලයේ කණ්ඩායමටත් හිමිවිය.

(ඡායා : ශානිකා ජයසේකර)

ඡායාරූප සටහන

ශ්‍රී ලංකා පාර්ලිමේන්තු නියෝජිත පිරිසක් ඉන්දියාවේ පැවැත්වූ ධාරිතා සංවර්ධන වැඩසටහනකට සහභාගී වෙති

Published

16 hours ago

June 2, 2025

editor

නියෝජ්‍ය කථානායක (වෛද්‍ය) රිස්වි සාලි මහතාගේ නායකත්වයෙන් යුත් මෙරට පාර්ලිමේන්තු නියෝජිත පිරිසක් 2025 මැයි 25 සිට 31 දක්වා ඉන්දියාවේ පැවති ධාරිතා සංවර්ධන වැඩසටහනකට සහභාගී වූහ.

ශ්‍රී ලංකාවේ ඉන්දීය මහ කොමසාරිස් ගරු සන්තෝෂ් ජා මහතා විසින් කරන ලද ආරාධනයකට අනුව, මෙම වැඩසටහන ලෝක් සභා ලේකම් කාර්යාලයේ පාර්ලිමේන්තු අධ්‍යයන හා පුහුණු කාර්යාංශය (BPST) විසින් සංවිධානය කරනු ලැබිණි.

නියෝජිත පිරිසට ගරු නියෝජ්‍ය කාරක සභා සභාපති පාර්ලිමේන්තු මන්ත්‍රිනි හේමාලි වීරසේකර මහත්මිය, සභාගර්භයේ සභාපති මණ්ඩලය නියෝජනය කරන පාර්ලිමේන්තු මන්ත්‍රීවරු, රජයේ ගිණුම් පිළිබඳ කාරක සභාවේ (COPA) සහ පොදු ව්‍යාපාර පිළිබඳ කාරක සභාවේ (COPE) සභාපතිවරු, රජය සහ විපක්ෂය නියෝජනය කරන මන්ත්‍රීවරු පිරිසක් මීට ඇතුළත් වූහ. එසේම පාර්ලිමේන්තුවේ මහලේකම් කුෂානි රෝහණදීර මහත්මිය සහ පාර්ලිමේන්තු මහ ලේකම් කාර්යාලයේ ජ්‍යෙෂ්ඨ නිලධාරීන් පිරිසක් ද මෙම වැඩසටහනට එක්වූහ.

මැයි 26 වන දින නවදිල්ලියේ පාර්ලිමේන්තු පුස්තකාල ගොඩනැගිල්ලේ පැවති පිළිගැනීමේ උත්සවයක් සහ දැනුවත් කිරීමේ සැසියක් සමඟ වැඩසටහන ආරම්භ විය. අනතුරුව ලෝක් සභාව, රාජ්‍ය සභාව, ඇතුළු වැදගත් ස්ථාන දැකබලා ගැනීමට ද පිරිස එක්වූ අතර ඉන්දියානු පාර්ලිමේන්තු ප්‍රජාතන්ත්‍රවාදයේ ආයතනික හා ඓතිහාසික වැදගත්කම පිළිබඳව එහිදී හදුන්වාදීම සිදු කෙරිණි.

ඉන්දියානු පාර්ලිමේන්තුවේ මූල්‍ය කාරක සභා පිළිබඳව දැනුවත් කිරීමකට නියෝජිත පිරිස එක්වූහ. ඒකාබද්ධ ලේකම් ශ්‍රී එච්. රාම් ප්‍රකාශ් සහ ව්‍යවස්ථාදායක සේවා අධ්‍යක්ෂ ශ්‍රී මුරලීධරන් පී. විසින් මෙහෙයවන ලද මෙම සැසිය, මූලික මූල්‍ය කාරක සභා, විශේෂයෙන් ජ්‍යෙෂ්ඨ විපක්ෂ නායකවරයාගේ සභාපතිත්වයෙන් යුත් රාජ්‍ය ගිණුම් කාරක සභාව (PAC) පිළිබඳව හදුන්වා දීම සිදු කෙරිණි.

මෙම කාරක සභාව විසින් විගණකාධිපතිවරයාගේ වාර්තා පරීක්ෂා කිරීම සිදුකරන අතර මෙම කමිටුවේ කටයුතු මාධ්‍ය සඳහා විවෘත නොවේ.

දෙපාර්තමේන්තු සම්බන්ධ ස්ථාවර කාරක සභා (DRSCs) පිළිබඳව සැසිය ගරු හිටපු මන්ත්‍රී සත්‍යපාල් සිං විසින් මෙහෙයවන ලදී. විසර්ජන පනත් කෙටුම්පතට අදාළව අමාත්‍යාංශවලට මුදල් වෙන් කිරීම් සම්බන්ධව මෙම කමිටුව විසින් විශ්ලේෂණය කරන ආකාරය පිළිබඳව මෙහිදී සාකච්ඡා විය.

පාර්ලිමේන්තුවේ අසනු ලබන ප්‍රශ්න සහ පොදු වැදගත්කමක් සහිත කරුණු පිළිබඳව ගරු පාර්ලිමේන්තු මන්ත්‍රී එන්.කේ. ප්‍රේමචන්ද්‍රන් මහතා විසින් මෙහෙයවන ලද සැසිවාරයේදී සාකච්ඡා කෙරිණි. එරට ප්‍රශ්න වේලාව තුළ දිනකට ප්‍රශ්න 20 කට අවසර දී ඇති බව මෙහිදී පෙන්වා දෙන ලදී.

අමාත්‍යවරුන්ට ප්‍රතිචාර දැක්වීම සඳහා දින 14 ක දැනුම් දීමේ කාල සීමාවක් ලබා දෙන බවත් පෙ.ව. 10:30 වන විට ලිඛිත පිළිතුරු සභා මේසය මත තැබීම සිදු කරන බවත් මෙහිදී සාකච්ඡා විය.

ඉන්දියාවේ ශක්තිමත් අධීක්ෂණ සහ ව්‍යවස්ථාදායක පද්ධති පිළිබඳ වටිනා අවබෝධයක් ලබා දීම මෙමගින් සිදුවූ අතර ශ්‍රී ලංකා පාර්ලිමේන්තු මන්ත්‍රීවරුන්ට සංසන්දනාත්මකව ව්‍යවස්ථාදායක ක්‍රියාවලිය අධ්‍යයනය කිරීමේ අවස්ථාව හිමිවිය.

මැයි 28 වන බදාදා, දූත පිරිස දිල්ලියේ පිහිටි ඉන්දියානු අනන්‍ය හඳුනාගැනීමේ අධිකාරියේ (Unique Identification Authority of India /UIDAI) මූලස්ථානයට ගියහ. එහි ප්‍රධාන විධායක නිලධාරී ශ්‍රී බුවනේෂ් කුමාර්, විසින් ඔවුන් පිළිගනු ලැබූ අතර ඉන්දියාවේ ජෛවමිතික හඳුනාගැනීමේ පද්ධතිය වන AADHAAR යටතේ පවතින ඩිජිටල් යටිතල පහසුකම් පිළිබඳව අවබෝධය ලබාදීම මෙහිදී සිදුවිය. ජෛවමිතික සත්‍යාපනය, දත්ත ආරක්ෂාව සහ ඉන්දියාවේ ආර්ථික සංවර්ධනය සහ රාජ්‍ය සේවා සැපයීමේදී AADHAAR ඉටු කරන තීරණාත්මක කාර්යභාරය ඇතුළුව එහි මූලික සංරචක පිළිබඳව ප්‍රධාන විධායක නිලධාරියා විස්තර කළේය.

සංචාරය අතරතුර, නියෝජිත පිරිස ලෝක් සභාවේ කථානායක ගරු ශ්‍රී ඕම් බිර්ලා මහතා හමුවිය. සාකච්ඡාවලදී ඉන්දියාව සහ ශ්‍රී ලංකාව අතර ශක්තිමත් සංස්කෘතික හා ප්‍රජාතන්ත්‍රවාදී සබඳතා අවධාරණය කෙරිණි.

ගෝලීය ත්‍රස්තවාදයට එරෙහිව ඒකාබද්ධ ක්‍රියාමාර්ග ගැනීමේ වැදගත්කම සහ අන්තර් පාර්ලිමේන්තු සහයෝගීතාවයේ අවශ්‍යතාව කථානායකවරයා අවධාරණය කළේය. ව්‍යවස්ථාදායක ක්‍රියාවලීන්හි විනිවිදභාවය සහ කාර්යක්ෂමතාව වැඩි දියුණු කිරීමේදී ඩිජිටල් නවෝත්පාදනයේ පරිවර්තනීය කාර්යභාරය ද මෙම සංවාදයේදී ඉස්මතු විය.

නියෝජිත පිරිස, සංවර්ධනය වෙමින් පවතින රටවල් සඳහා පර්යේෂණ සහ තොරතුරු පද්ධතිය (Research and Information System for Developing Countries /RIS) නැරඹීමට ගිය අතර එහිදී සංවර්ධන උපාය මාර්ග සහ ගෝලීය සහයෝගීතාව පිළිබඳ අධ්‍යක්ෂ ජනරාල් මහාචාර්ය සචින් චතුර්වේදි මහතා සමඟ සම්බන්ධ විය.

සංචාරය අතරතුර ඉන්දියාවේ විදේශ කටයුතු අමාත්‍ය ආචාර්ය සුබ්‍රමනියම් ජයශංකර් මහතා හමුවූ මෙරට දූත පිරිස කලාපීය සහයෝගීතාව, ඉන්දියාවේ “අසල්වැසියා පළමුව” ප්‍රතිපත්තිය සහ ශ්‍රී ලංකාවේ ආර්ථිකය ස්ථාවර වීම සඳහා ඉන්දියාවේ අඛණ්ඩ සහයෝගය පිළිබඳව සාකච්ඡා කළහ.

මෑතදී පහල්ගම් ප්‍රහාරය පිළිබඳව කනගාටුව පළ කරමින් ඉන්දියාව සමඟ සහයෝගීතාවය ප්‍රකාශ කළ දූත පිරිස, ත්‍රස්තවාදී ක්‍රියා හෙළා දකිමින් සහ සාමය සහ ආරක්ෂාව සඳහා අන්‍යෝන්‍ය කැපවීම නැවත අවධාරණය කළේය.

මැයි 29 වන බ්‍රහස්පතින්දා, නියෝජිත පිරිස අග්‍රා වෙත සංස්කෘතික සංචාරයක් කළ අතර එහිදී ඔවුන් ඓතිහාසික ටජ්මහල සහ රතු කොටුව දැකබලා ගැනීමට එක්වූහ.

ධාරිතා ගොඩනැගීමේ වැඩසටහනට, මහජන නියෝජිතයන්ට පක්ෂ මාරුවීම් විරෝධී නීතිය, ආණ්ඩුපක්ෂ හා විපක්ෂ සංවිධායකවරුන්ගේ කාර්යභාරය, ව්‍යවස්ථාදායක සහ අයවැය ක්‍රියාවලිය, පාර්ලිමේන්තු වරප්‍රසාද සහ ආචාර ධර්ම, මුද්‍රිත සහ විද්‍යුත් මාධ්‍ය සමඟ අන්තර්ක්‍රියා ආදී සාකච්ඡා ගණනාවක් ඇතුළත් විය.

මෙම වැඩසටහන හරහා පාර්ලිමේන්තු රාජ්‍ය තාන්ත්‍රිකභාවය වැඩිදියුණු කිරීම, අන්‍යෝන්‍ය අවබෝධය ශක්තිමත් කිරීම සහ ඉන්දියාව සහ ශ්‍රී ලංකාව අතර දිගුකාලීන සහයෝගීතාව වර්ධනය කිරීමේ වැදගත් පියවරක් සනිටුහන් කෙරිණි.