ඡායාරූප සටහන
දේශීය කථානාද සිනමාවේ 78 සැමරුම
ශ්‍රී ලාංකේය කතානාද සිනමාවට වසර 78 ක් සපිරීම නිමිත්තෙන් සංවිධානය කරන ලද සැමරුම් උත්සවයක්, ඊයේ ( 21) පස්වරුවේ තරංගනී සිනමා ශාලාවේදී අති උත්කර්ෂවත් අන්දමින් පැවැත්වුණි.
බුද්ධශාසන, ආගමික හා සංස්කෘතික කටයුතු අමාත්‍ය, ආචාර්ය හිනිදුම සුනිල් සෙනෙවි මහතා ප්‍රධාන ආරාධිතයා වශයෙන් මීට එක්විය.
ශ්‍රී ලාංකේය කතානාද සිනමාවට වසර 78 ක් සපිරීම මෙන්ම ශ්‍රී ලංකා ජාතික චිත්‍රපට සංස්ථාවට වසර 53 ක් සම්පූර්ණ වීමද මෙහිදී සැමරීම සිදුවිය.
මෙම සුවිශේෂී අවස්ථාවට විෂය භාර අමාත්‍යවරයා මෙන්ම නියෝජ්‍ය අමාත්‍ය ගමගෙදර දිසානායක, ආචාර්ය රවීන්ද්‍ර රන්දෙණිය, වසන්ති චතුරාණි, ප්‍රියංකර පෙරේරා ඇතුළු මෙරට කලාවේ ප්‍රවීණ කලාකරුවන් සහ නවක කලා ශිල්පීන් රැසක් ද සහභාගීව සිටියහ.
ආචාර්ය සෙනේෂ් දිසානායක බණ්ඩාර මහතා විසින් ශ්‍රී ලාංකේය සිනමාව පිළිබඳ වූ හරවත් දේශනයක් පවත්වනු ලැබූ අතර ‘සංස්කෘතික මිනිසෙකු නිර්මාණය කිරීමෙහිලා, අධ්‍යයතන සිනමාවේ කාර්ය භාරය’ යන්න එහි මාතෘකාව විය.
මෙම සුවිශේෂී සංවත්සර සැමරුමේදී මෙරට කලාව පෝෂණය කිරීමෙහිලා සිය අනුපමේය දායකත්වය ලබාදුන් ප්‍රවීණ සිනමා කලාකරුවන් තිදෙනෙකු ඇගයීම ද සිදු වූ අතර එම සම්මානයෙන් පිදුම් ලැබුවේ ප්‍රවීණ රංගන ශිල්පි ආචාර්ය රවීන්ද්‍ර රන්දෙණිය, ප්‍රවීණ ගායන ශිල්පි සහ රංගන ශිල්පි ප්‍රියංකර පෙරේරා සහ ප්‍රවීණ සිනමා නිළි වසන්ති චතුරාණි යන මහත්ම මහත්මීන් ය.
එමෙන්ම සංස්ථාවේ ජ්‍යෙෂ්ඨතම නිලධාරීන් දෙදෙනෙකු අගයා සම්මානයට පාත්‍ර කිරීම ද මෙහිදී සිදුවිය.
සංවත්සර උත්සවයේ තවත් විශේෂ අංගයක් ලෙස චිත්‍රපට සඟරාව විශේෂ කලාපය එළිදැක්වීම (2025 පළමු කලාපය) මෙන්ම සංස්ථා ප්‍රකාශනයක් ලෙස සිනමා ග්‍රන්ථයක් එළිදැක්වීම ද සිදුවිය. ‘වාර්තා චිත්‍රපට වංශය’ නම් එම ග්‍රන්ථය රචනා කරන ලද්දේ කතුවර නාමල් ප්‍රසන්න මහතා විසිනි.
සංවත්සර උත්සවය පැවැත්වීමට පෙර දිනයන් තුළ, විශිෂ්ට සිනමා කෘතීන් කිහිපයක් නොමිලයේ නැරඹීමට ජාතික චිත්‍රපට සංස්ථාව මඟින් මෙරට සිනමා ප්‍රේක්ෂකයින් හට අවස්ථාව සලසාදී තිබිණි.
සභාව ආමන්ත්‍රණය කළ ජාතික චිත්‍රපට සංස්ථා සභාපති සුදත් මහදිවුල්වැව මහතා විසින් චිත්‍රපට සංස්ථාව මඟින් ඉදිරියේදී සිදු කිරීමට නියමිත කටයුතු රැසක් පිළිබඳව ද දැනුම් දී සිටියේය.
ජාතික සිනමා අරමුදලක් පිහිටුවීම, කොළඹ අන්තර්ජාතික සිනමා උළෙල, ජාතික සිනමා පාසලක් ආරම්භ කිරීම, චිත්‍රපට ශාලා නොමැති ප්‍රදේශවල ආසන 50කින් යුක්ත සිනමා ශාලා නිර්මාණය කිරීම, බස් රථයක් සිනමා ශාලාවක් ලෙස සංවර්ධනය කරමින් ‘ජංගම සිනමා ශාලා’ අත්දැකීම ලබාදීම, පාසල් සිනමා පර්ෂද පිහිටුවීම යනාදිය ඒ අතරට අයත්ය.
සභාපතිවරයා සඳහන් කර සිටියේ තිරගත වීමට නියමිතව ඇති ‘චිත්‍රපට පෝළිම්’ සඳහා ද නිසි විසඳුම් කාලයත් සමඟ ලබාදෙන බවයි.
සංවත්සර උත්සවයේ ප්‍රධාන ආරාධිතයා වූ බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතා සභාව අමතමින් අවධාරණය කර සිටියේ, ඉතිහාසයේ ප්‍රථම වරට ජනතාවගෙ වුවමනාවත් පාලකයන්ගේ අපේක්ෂාවත් සමපාතව ඇති කාල වකවානුවක, හීන හැබෑ කරගැනීම කළ නොහැකි කාර්‍යයක් නොවන බවයි.
එහිදී වැඩිදුරටත් අදහස් දැක්වූ අමාත්‍යවරයා,
”අපේ ජීවිතවල නොවිසඳුණු ගැටළු ටික අපි ඉතා ඉක්මනින් විසඳගන්න,ලංකාව නිසි මඟකට ගන්න තමයි අපේ මැදිහත්වීම සිද්ද වුණේ. මේක කරගන්න බැරි වැඩක් නෙවෙයි.චිත්‍රපට විෂය සම්බන්ධව නොවිසඳුණු ගැටළු රැසක් පාර්ලිමේන්තුවේදී එවකට මන්ත්‍රීවරයෙක් වුණු අනුර දිසානායක සහෝදරයා කතා කරපු හැටි මේ හැන්සාඩ් වාර්තාවේ තියෙනවා.
ඔහු ඇසූ ප්‍රශ්නවලට එවක ජනමාධ්‍ය අමාත්‍යවරයා වුණු කෙහෙළිය රඹුක්වැල්ල දීපු උත්තරත් මේකෙ තියෙනවා.
මේක බෝර්ඩ් අල්ලලා කෑගහලා කියන්න දෙයක් නෙවෙයි. අපි ආවේ ඒකට තමයි.
අප අමාත්‍යවරුන් හැටියට කටයුතු කරන සියලුදෙනාගෙ අමාත්‍යංශවල තියෙන්නෙ සමහරවෙලාවට ඒ ඇමතිවරුන්ට වඩා දෙගුණයක් තුන් ගුණයක් වඩා වයස පනත් කෙටුම්පත්. ඒවත් එක්ක කිසිවක් කරන්න බෑ. ඒ නිසා මේවා නැවත සලකා බලන්න කාලෙ හරි. දේශපාලකයෙක් හැටියට පොරොන්දු පුනරුච්ඡාරණය කරමින් කතා කරන එක මටවත් මගෙ දේශපාලන ව්‍යාපාරයටත් පුරුදු නෑ.
දැන් ලංකාවේ පළවෙනි වතාවට ඔබේ වුවමනාව, අපේ වුවමනාව බවට පත්වෙලා තියෙනවා.අප අතරෙ අපේ අවශ්‍යතාවල පරතරයක් නැති නිසා මේ හීනය ඇත්තටම හැබෑ කරගන්න පුළුවන්….”
කොළඹ හුණුපිටිය ගංගාරාම විහාරය, ජනාධිපති කාර්යාලය හා අග්‍රාමාත්‍ය කාර්යාලය එක්ව සංවිධානය කරනු ලබන බුද්ධ රශ්මි වෙසක් කලාපය මැයි 12 වන දින අග්‍රාමාත්‍ය ආචාර්ය හරිනි අමරසූරිය අතින් විවෘත විය.
මෙහිදී අග්‍රාමාත්‍යවරිය පළ කළ අදහස්,
“විවිධ ජාතීන් වෙසෙන කොළඹ නගරයේ සියලුම දෙනා සාමුහිකත්වයෙන් පවත්වන මෙම බුද්ධ රශ්මි වෙසක් කලාපය සුවිශේෂී වෙනවා. කොළඹ නගරය තුළ තියෙන ආගමික සහජීවනය මේ සදහා ඉතාම වැදගත් වෙනවා. මෙම සහජීවනය නිසාම තමයි අපිට විශාල දන්සල් ප්‍රමාණයක්, වෙසක් කලාප ප්‍රමාණයක් දැක ගන්න ලැබෙන්නේ. මේ දන්සැල් පවත්වන්නේ නගරයේ ඉන්න සියලු දෙනා එකතු වෙලා ඔවුන්ගේ මුදල් සහ ශ්‍රමය වැය කරලා.
ශ්‍රී ලාංකේය බෞද්ධ ප්‍රබෝධය, බෞද්ධ සංස්කෘතිය හා ජාතික අනන්‍යතාවය අපේ රටේ බෞද්ධයන්ට පමණක් නොව විදේශීය බෞද්ධයන්ටද විදෙස් සංචාරකයින්ට ද ලබාදීමට විහාරාධිකාරී කිරින්දේ අස්සජි ස්වාමීන් වහන්සේ දරනු ලබන ප්‍රයත්නය අගය කළ යුතුයි.
ඒ වගේම ඊයේ කොත්මලේ ප්‍රදේශයේදී සිදු වුණ බස් රථ අනතුරින් මියගිය පිරිස හා ඔවුන්ගේ පවුල්වල සාමාජිකයින් ඉතාම සංවේගයෙන් මේ මොහොතේ මතක් කරනවා. එමෙන්ම තුවාල ලැබූ පිරිසට ඉක්මන් සුවය ප්‍රාර්ථනා කරනවා.” යැයි අග්‍රාමාත්‍යවරිය පැවසුවාය.
මෙම අවස්ථාවට බුද්ධ ශාසන, ආගමික හා සංස්කෘතික කටයුතු අමාත්‍ය හිනිදුම සුනිල් සෙනෙවි මහතා, ඉන්දියානු මහ කොමසාරිස් සන්තෝෂ් ජා මහතා ඇතුළු මහ කොමසාරිස්වරුන්, තානාපතිවරුන් , අග්‍රාමාත්‍ය ලේකම් ප්‍රදීප් සපුතන්ත්‍රී මහතා ඇතුළු සම්භාවනීය අමුත්තන් රැසක් සහභාගී වූහ.
ශ්‍රී බුද්ධ වර්ෂ 2569 වන රාජ්‍ය වෙසක් මහෝත්සවය අතිපූජ්‍ය ත්‍රෛනිකායික මහානායක ස්වාමීන් වහන්සේලාගේ ප්‍රධානත්වයෙන් සහ ජනාධිපති අනුර කුමාර දිසානායක මහතාගේ සහභාගිත්වයෙන් අද (10) නුවරඑළිය ජාත්‍යන්තර බෞද්ධ මධ්‍යස්ථාන විහාරස්ථානයේදී ආරම්භ කෙරිණි.
“භජෙථ මිත්තෙ කල්‍යාණෙ භජෙථ පුරිසුත්තමෙ” (කලණ ගුණ ඇති උතුම් මිතුරන් ඇසුරු කරමු) තේමාව යටතේ පැවැත්වෙන මෙවර රාජ්‍ය වෙසක් මහෝත්සවය මැයි මස 10 වන දා සිට 16 වන දා දක්වා නුවරඑළිය දිස්ත්‍රික්කය කේන්ද්‍ර කර ගනිමින් පැවැත්වේ.
අතිපූජ්‍ය මහානායක ස්වාමින් වහන්සේලාගේ සහ සමස්ත ලංකා ශාසනාරක්ෂක බල මණ්ඩලයේ අනුශාසනා පරිදි, ජනාධිපති කාර්යාලය, අග්‍රාමාත්‍ය කාර්යාලය සහ බුද්ධශාසන, ආගමික හා සංස්කෘතික කටයුතු අමාත්‍යංශය, බෞද්ධ කටයුතු දෙපාර්තමේන්තුව, මධ්‍යම පළාත් සභාව සහ නුවරඑළිය දිස්ත්‍රික් ලේකම් කාර්යාලය එක්ව රාජ්‍ය වෙසක් මහෝත්සවය සංවිධානය කර තිබේ.
එමෙන්ම මැයි මස 10වන දින සිට 16වන දින දක්වා වෙසක් සතියක් ප්‍රකාශයට පත් කරමින් රජයේ ප්‍රතිපත්තිමය වැඩපිළිවෙළට අනුගතව ජනතාවගේ අධ්‍යාත්මික සංවර්ධනය ඇති කිරීම වෙනුවෙන් විවිධ බෞද්ධාගමික වැඩසටහන් සංවිධානය කර තිබෙන අතර මෙම කාල සීමාව තුළ නුවරඑළිය දිස්ත්‍රික්කයේ දැනට වැඩ නිම නොවූ විහාරස්ථානවල සංවර්ධන කටයුතු ත්‍රිවිධ හමුදාවේ සහාය ඇතිව අවසන් කිරීමටද පියවර ගෙන තිබේ.
එසේම රාජ්‍ය වෙසක් මහෝත්සවයට සමගාමීව ජනතාව තුළ අධ්‍යාත්මික සංවර්ධනයක් සහ බෞද්ධාගමික ප්‍රබෝධයක් ඇති කිරීම වෙනුවෙන් “ක්ලීන් ශ්‍රී ලංකා” වැඩසටහන මගින්ද විශේෂ වැඩසටහන් රැසක් ක්‍රියාවට නංවා ඇත.
බහු ආගමික සහ බහු සංස්කෘතික සමාජයක් සහිත නුවරඑළිය දිස්ත්‍රික්කය තුළ මෙවර රාජ්‍ය වෙසක් මහෝත්සවය සංවිධානය කිරීම විශේෂත්වයක් වන අතර රට පුරා බෞද්ධ ප්‍රබෝධයක් ඇති කිරීම මෙන්ම ලෝකයේ බෞද්ධ රටවල් සමඟ සම්බන්ධතා තවදුරටත් ශක්තිමත් කිරීම මෙවර රාජ්‍ය වෙසක් මහෝත්සවයේ අරමුණු වේ.
2025 රාජ්‍ය වෙසක් මහෝත්සවය නිමිත්තෙන් සමරු මුද්දරයක් එළිදැක්වීමද සිදු කෙරුණු අතර එහි පළමු සමරු මුද්දරය ජනාධිපතිවරයා වෙත පිළිගැන්විණි.
එමෙන්ම, 2025 රාජ්‍ය වෙසක් මහෝත්සවය වෙනුවෙන් කොත්මලේ මලියදේව පුරාණ රජමහා විහාරය පූජා භූමියක් බවට පත් කිරීමේ ශ්‍රී සන්නස් පත්‍රය පිළිගැන්වීම සහ කුරුණෑගල ශ්‍රී විෂ්ණු දේවාලය පූජා භූමියක් බවට පත් කිරීමේ සන්නස් පත්‍රය පිළිගැන්වීමද ජනාධිපතිවරයා අතින් සිදු කෙරිණි.
ස්‍යාමෝපාලි මහා නිකායේ මල්වතු මහා විහාර පාර්ශ්වයේ ප්‍රධාන ලේඛකාධිකාරී, සෝමාවතී රජමහා විහාරාධිපති, ආචාර්ය පූජ්‍ය පහමුණේ ශ්‍රී සුමංගල නායක හිමිපාණන් වහන්සේ, ස්‍යාමෝපාලි මහා නිකායේ අස්ගිරි මහා විහාර පාර්ශ්වයේ අනුනායක පූජ්‍ය ආණමඩුවේ ධම්මදස්සී නායක හිමිපාණන් වහන්සේ ප්‍රමුඛ ත්‍රෛනිකාය නියෝජනය කරමින් මහා සංඝරත්නයද, සමස්ත ලංකා ශාසනාරක්ෂක බලමණ්ඩලයේ සභාපති මහාචාර්ය පූජ්‍ය තුඹුල්ලේ සීලක්ඛන්ද නායක හිමිපාණන් වහන්සේ, සමස්ත ලංකා ශාසනාරක්ෂක බලමණ්ඩලයේ ප්‍රධාන ලේඛකාධිකාරී පූජ්‍ය මුගුණුවල අනුරුද්ධ නායක ස්වාමීන් වහන්සේ ප්‍රමුඛ සමස්ත ලංකා ශාසනාරක්ෂක බලමණ්ඩලයේ මහා සංඝරත්නයද, සර්ව ආගමික පූජකවරුන්ද, කථානායක ජගත් වික්‍රමරත්න, බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතා ඇතුළු මැති ඇමතිවරුද, ජනාධිපති ලේකම් ආචාර්ය නන්දික සනත් කුමානායක මහතා ඇතුළු රාජ්‍ය නිලධාරිහුද, විදෙස් නියෝජිතයන් ඇතුළු දෙස් විදෙස් සැදැහැවත් පිරිසක්ද මෙම අවස්ථාවට එක්ව සිටියහ.
(ජනාධිපති මාධ්‍ය අංශය)
මෙරටට පැමිණ සිටින ලෝක බැංකු සමූහයේ සභාපති අජේ බංගා (Ajay Banga) මහතා සහ ජනාධිපති අනුර කුමාර දිසානායක මහතා අතර හමුවක් අද (07) පස්වරුවේ ජනාධිපති කාර්යාලයේදී සිදු විය.
මෙලෙස ලෝක බැංකු සභාපතිවරයෙක් ශ්‍රී ලංකාවට පැමිණ ඇත්තේ වසර 20කට පමණ පසුව වීමද විශේෂත්වයකි.
ශ්‍රී ලංකාවේ ඉදිරි සංවර්ධන අරමුණු ජය ගැනීමට ලෝක බැංකු සමූහයේ සහාය ලබා දිය හැක්කේ කෙසේද යන්න පිළිබඳව මෙහිදී පුළුල් ලෙස සාකච්ඡා කෙරිණි.
ඩිජිටල්කරණය, සංචාරක කර්මාන්තය, කෘෂි කර්මාන්තය සහ යටිතල පහසුකම් ක්ෂේත්‍රය ඇතුළු කෙටිකාලීව ප්‍රතිලාභ ලබා ගත හැකි ක්ෂේත්‍ර හඳුනා ගනිමින් එහි ප්‍රවර්ධනයට කටයුතු කිරීම මෙන්ම උතුරු නැගෙනහිර සංවර්ධනය පිළිබඳවද මෙහිදී විශේෂ අවධානය යොමු විය.
නව ආයෝජන මෙරටට ආකර්ෂණය කර ගැනීම සඳහා අවශ්‍ය නෛතික රාමුව සකස් කිරීමට මේ වන විට ශ්‍රී ලංකා රජය ගෙන ඇති පියවර සහ ඒ වෙනුවෙන් වූ රජයේ ප්‍රතිපත්තිමය වැඩපිළිවෙළ පිළිබඳවද මෙහිදී සාකච්ඡා විය.
ලෝක බැංකු සමූහයේ විශේෂ උපදේශක ට්‍රෙවර් කින්කේඩ්(Trevor Kincaid), ශ්‍රී ලංකාව, නේපාලය සහ මාලදිවයින සඳහා ලෝක බැංකුවේ අධ්‍යක්ෂ ඩේවිඩ් සිස්ලන් (David Sislen), ජාත්‍යන්තර මූල්‍ය සමාගමේ දකුණු ආසියානු කලාපීය අධ්‍යක්ෂ ඉමාද් ෆැකවුරි (Imad Fakhoury), ලෝක බැංකුවේ මාලදිවයින සහ ශ්‍රී ලංකාව සඳහා නේවාසික නියෝජිත ගිවෝර්ග් සාර්කස්ජාන් (Gevorg Sargsyan) යන මහත්වරුද මීට එක්ව සිටියහ.
ශ්‍රී ලංකා රජය වෙනුවෙන් කම්කරු අමාත්‍ය සහ ආර්ථික සංවර්ධන නියෝජ්‍ය අමාත්‍ය අනිල් ජයන්ත ප්‍රනාන්දු, මුදල් හා ක්‍රම සම්පාදන නියෝජ්‍ය අමාත්‍ය හර්ෂණ සුරියප්පෙරුම, ජනාධිපති ජ්‍යෙෂ්ඨ අතිරේක ලේකම් රසල් අපොන්සු යන මහත්වරු ඇතුළු පිරිසක්ද මෙම අවස්ථාවට සහභාගී වූහ.
(ජනාධිපති මාධ්‍ය අංශය)
ජපන් වාහනවලට පවතින මෙරට අධික බදු ගැන තානාපතිගෙන් කනස්සල්ල
මාර්ග ආරක්ෂාවට අදාළ නීති දැඩිව ක්රියාත්මක කරනවා
