ජාත්‍යන්තර තහනමකට ලක්ව ඇති ශ්‍රී ලංකා පාපන්දු සම්මේලනයේ සභාපති තනතුරට හිටපු සභාපති ජස්වර් උමර් මහතා හා අනුරාධපුර දිස්ත්‍රික් පාපන්දු සංගමයේ සභාපති දක්ෂිත සුමතිපාල මහතා නාම යෝජනා භාර දී තිබේ.

ශ්‍රී ලංකා පාපන්දු සම්මේලන මූලස්ථානයේදී පෙරේදා නාම යෝජනා භාර ගැනීම සිදු විය. 

ජස්වර් උමර් මහතාගේ පාර්ශ්වයෙන් පාපන්දු ලීග් 13කින් තනතුරු 13කට නාම යෝජනා ලබා දුන් අතර, දක්ෂිත සුමතිපාල මහතාගේ පාර්ශ්වයෙන් පාපන්දු ලීග් 7කින් තනතුරු 13කට නාම යෝජනා ලබා දුන්නේය. 

පාපන්දු නිලවරණය ලබන සැප්තැම්බර් මස 29 දා පැවැත්වෙන අතර, රට පුරා පාපන්දු ලීග් 69කට ඡන්ද එක බැගින් හිමි වේ. 

පාපන්දු නාම යෝජනා සම්බන්ධ අභියාචනා විභාග කිරීමෙන් පසු අවසන් ලේඛනය ලබන මස 4 වැනිදා ප්‍රසිද්ධියට පත් කිරීමට නියමිතය.

නාම යෝජනා ලබා දීමෙන් අනතුරුව සභාපති අපේක්ෂක ජස්වර් උමර් මහතා පැවසුවේ පාපන්දුවට ළැදි සියලු පාර්ශ්ව එකතුවී සිටියදී සුළු පිරිසක් එක්ව අනවශ්‍ය සටනක් නිර්මාණය කිරීම පිළිබඳ කනගාටුවට පත්වන බවය.

“මම කොහොමත් විශාල ඡන්ද ගණනකින් දිනනවා. පුංචි හරි සටනක් තිබුණේ නැත්නම් අපි නිතරඟයෙන් එන බව පවසා හෙට අනිද්දාම පාපන්දු තහනම ඉවත් කර ගන්න තිබුණා. එහෙම වුණා නම් ජාතික පාපන්දු පිල නිල නොවන ලෙස හරි කටාර් රාජ්‍යයට යවා සූදානම් කරන්න පුළුවන්. තනතුරු 13කට නාම යෝජනා දීමේදී ලීග් 5කින් 10ක් දාලා. ආරම්භයේම බොරුවක් කරන්නේ කියා ඕන කෙනෙකුට තේරෙනවා. නාම යෝජනා දිනයේම පරාජය පේනවා” යැයිද ජස්වර් උමර් මහතා පැවසීය. 

අනුරාධපුර දිස්ත්‍රික් පාපන්දු සංගමයේ සභාපති දක්ෂිත සුමතිපාල මහතා පැවසුවේ ඉතා ගුණාත්මක වෘත්තියවේදී කණ්ඩායමක් තමන් යටතේ ඉදිරිපත්කොට ඇති බවය.

 “අපට පෞද්ගලික අවශ්‍යතා නෑ. වගකීමකින් නාම යෝජනා දුන්නා. රටක් ලෙස ඉදිරියට යන්න රජයේ, අන්තර්ජාතික හා අනුග්‍රාහකයන්ගේ සහයෝගය ගත යුතුයි. අපට ලීග් සහයෝගය තියෙනවා. ඡන්දදායකයන්ගේ සහයෝගය මට තියෙනවා. අපේ කණ්ඩායම කටයුතු බෙදා ගෙන සිදු කරනවා. නිසි පුද්ගලයාට නිසි තැන දෙනවා. විමධ්‍යගත පරිපාලනයක් කරනවා. දිනන හැටි මම පෙන්වන්නම්” යැයිද දක්ෂිත සුමතිපාල මහතා පැවසීය.

ජස්වර් උමර් මහතාගේ පාර්ශ්වයෙන් භාරදුන් නාම යෝජනා මෙසේය: 

සභාපති – ජස්වර් උමර් (විනිසුරු ලීගය), උප සභාපතිවරු – රංජිත් රුද්‍රිගූ (මීගමුව ලීගය), වෛද්‍ය මනිල් ප්‍රනාන්දු (කළුතර ලීගය), ජ්‍යෙෂ්ඨ පොලිස් අධිකාරී දිල්ෂාන් නාගහවත්ත (ගාල්ල ලීගය), නාවික කොමදෝරු ප්‍රදීප් කරුණාතිලක (නාවික ලීගය), විධායක සාමාජිකයන් – පොලිස් අධිකාරී අබ්දූල් ගෆාර් (මාවනැල්ල ලීගය), සායිෆ් යූසුප් (වෙ‍ෙළද සේවා ලීගය), ජගත් ද සිල්වා (නාවලපිටිය ලීගය), අබ්දුල් මනාෆ් (අම්පාර), ඒ. නාගරාජන් (වවුනියා ලීගය), ඉන්දික තේනුවර (මාතර ලීගය), මොහොමඩ් රිස්වි (කින්නියා ලීගය) කාන්තා නියෝජනය – දීපිකා කුමාරි (බියගම ලීගය)

දක්ෂිත සුමතිපාල මහතාගේ පාර්ශ්වයෙන් භාරදුන් නාම යෝජනා: 

සභාපති – දක්ෂිත සුමතිපාල (අනුරාධපුර ලීගය), උප සභාපතිවරු – ටී. අයි. උඩුවර (වත්තල ලීගය), ජී. පී. පීරිස් (දෙහිවල ගල්කිස්ස ලීගය), ජගත් රෝහණ (ජනසතු සේවා ලීගය), රෝහිත ප්‍රනාන්දු (වෙන්නප්පුව ලීගය), විධායක සාමාජිකයින් – නිහාල් පෙරේරා (වත්තල ලීගය), ඒ. ජී. සුනිල් (වෙන්නප්පුව ලීගය), ලියෝ ප්‍රනාන්දු (පොල්ගහවෙල ලීගය), සුදාකර් (ජනසතු සේවා), නාලක දිසානායක (ශ්‍රී ලංකා පාසල්), ආර්. ඒ. තරංග ( දෙනියාය ලීගය) කාන්තා නියෝජනය – හේෂිණී ආරියරත්න (දෙනියාය ලීගය)