ශ්‍රී ලංකා ක්‍රිකට් කණ්ඩායමේ ක්‍රීඩකයින් 06 දෙනෙකු ජාත්‍යන්තර ක්‍රිකට් කවුන්සිලයේ නවතම ශ්‍රේණිගත කිරීම්හි පළමු දස දෙනා අතර රැදී සිටිමට සමත්ව තිබේ.

ඒ අනුව පන්දුවාර 20 පන්දු යවන්නන් අතර දෙවන ස්ථානයේ වනිඳු හසරංග රැදී සිටින අතර, එහි තුන් ඉරියව් ක්‍රීඩකයින් අතර ඔහු රැදී සිටින්නේ 4 වන ස්ථානයේදීය.

මහීෂ් තීක්ෂණ පන්දුවාර 20 පන්දු යවන්නන් අතර පස්වන ස්ථානයේ පසුවේ.

එමෙන්ම, නවතම ටෙස්ට් ශ්‍රේණිගත කිරීම්හි එංගලන්තයේ හැරී බෲක් පළමු තැන සහ ජෝ රූට් දෙවන තැනට පත්ව සිටින අතර, ශ්‍රී ලංකාවේ කමිදු මෙන්ඩිස්ට හිමිව ඇත්තේ 06 වන ස්ථානයයි.

ප්‍රභාත් ජයසූරිය ටෙස්ට් පන්දු යවන්නන් අතර 8 වන ස්ථානයේ රැදී සිටී.

පැතුම් නිශ්ශංක පන්දුවාර 20 පිතිකරණ ශ්‍රේණිගත කිරීම්හි 09 වන ස්ථානයේ පසුවන අතර, කුසල් මෙන්ඩිස්ට එහි හිම ව ඇත්තේ 11 වන ස්ථානයයි.

ශ්‍රී ලංකා ක්‍රිකට් ක්‍රීඩක නිරෝෂන් දික්වැල්ලට පනවා තිබූ වසර 03ක ක්‍රිකට් තහනම මාස 3 දක්වා අඩු කර තිබේ.

ඒ අනුව අද (11) සිට ඔහුට සියලුම ආකාරයේ ක්‍රිකට් ක්‍රීඩා කිරීමට සුදුසුකම් ලැබී ඇති බව වාර්තා වේ.

නිමාවූ ලංකා ප්‍රිමියර් ලීග් ක්‍රිකට් තරගාවලියේදී තහනම් උත්තේජක ලබාගත් බවට ඔහුට එරෙහිව චෝදනා එල්ල වී තිබුණි.

ශ්‍රී ලංකා තහනම් උත්තේජක මර්දන නියෝජිතායතනය විසින් සිදුකරනු ලැබූ පරීක්ෂණයේදී මේ බව අනාවරණය වීමත් සමග නිරෝෂන් දික්වැල්ලට නැවත දැනුම්දෙන තුරු සියලුම ක්‍රිකට් තරග තහනම් කිරීමට බලධාරීන් පියවර ගත් අතර එම තහනමට එරෙහිව දික්වැල්ල සිය නීතිඥවරුන් මඟින් අභියාචනයක් ඉදිරිපත් කලේය.

එම අභියාචනය අනුව දික්වැල්ලට මෙම සහනය ලැබී ඇති බවයි වාර්තා වේ.

ලංකා T10 තරගාවලිය අද (11) ආරම්භ වීමට නියමිතය.

කාණ්ඩ දෙකක් යටතේ පැවැත්වෙන මෙම තරගාවලියට කණ්ඩායම් හයක් ක්‍රීඩා කරන බව ශ්‍රී ලංකා ක්‍රිකට් ආයතනය නිවේදනය කළේය.

අද  (11) සිට ලබන 19 වැනිදා දක්වා මෙම තරග පැවැත්වෙනු ඇත.