දකුණු කොරියාවේ පැවැති ආසියානු සත් සාමාජික රග්බි තරගාවලිය නිමා වීමෙන් පසු අතුරුදන් වූ බව කියන ශ්‍රී ලංකා කාන්තා රග්බි පිලේ නායිකා දුලානි පල්ලියකොන්දගේ පිළිබඳ එරට පොලිසිය විමර්ශන ආරම්භ කර ඇතැයි වාර්තා වේ.
ඊයේ (14) තරගාවලියේ ත්‍යාග ප්‍රදානෝත්සවය නිමා වීමෙන් පසු අතුරුදන් වූ බව කියන කණ්ඩායම් නායිකාව පිළිබඳ දකුණු කොරියාවේ රග්බි සංගමය හරහා එරට පොලිසියට පැමිණිලි කිරීමට කණ්ඩායමේ කළමනාකාරිත්වය පියවර ගෙන ඇති අතර, ඊයේ පස්වරුව වනතුරු ඇය පිළිබඳ තොරතුරක් ලැබී නැතැයි පැවසේ.
ශ්‍රී ලංකා කාන්තා හා පිරිමි රග්බි කණ්ඩායම් ඊයේ රාත්‍රියේදී යළි ශ්‍රී ලංකාවට පැමිණීමට නියමිතව සිටි අතර, ඊට පෙර ඇය සොයා ගැනීමට අවසන් මොහොත දක්වාම උත්සාහයක නිරතවන බවට දකුණු කොරියානු පොලිසියේ ලාංකික නිලධාරීන්ට දැනුම් දී තිබූ බවද මේ අතර වාර්තා වේ.
දකුණු කොරියාවේ නම්ඩොං නුවර පැවැති ආසියානු සත් සාමාජික රග්බි තරගාවලියේ අවසන් දිනය වූ පෙරේදා හොංකොං පිල සමඟ පළඟ ශූරතා කාන්තා අවසන් තරගයට ක්‍රීඩා කළ දුලානි සිය කණ්ඩායම සමඟ තුන්වැනි ස්ථානය සඳහා ශ්‍රී ලංකාව සහ පිලිපීනය අතර පැවති පිරිමි කණ්ඩායම් තරගය නැරඹීමට එක්වී ඇති අතර, පසුව මාධ්‍ය හමුවට එක්වෙමින් සිය කණ්ඩායමේ පරාජය සහ කණ්ඩායමේ දුර්වලතා පිළිබඳ අදහස් පළ කර ඇතැයි ද වාර්තා වේ.
අනතුරුව ශ්‍රී ලංකා කාන්තා සහ පිරිමි කණ්ඩායම් රැඳී සිටි හෝටලය වෙත නැවත යෑම සඳහා ක්‍රීඩිකාවන් එක්රැස් කිරීමේදී කණ්ඩායමේ නායිකාව නොමැති බව දැන ගත් කළමනාකාරීණිය ඇයට යළි කණ්ඩායම රැඳී සිටි ස්ථානය කරා පැමිණෙන ලෙස ක්‍රීඩාංගණයේ ශබ්ද විකාශන යන්ත්‍ර මගින් සිංහල බසින් පණිවිඩ දෙකක් ප්‍රචාරය කර ඇතැයි ද වැඩිදුරටත් වාර්තා වේ.
ඉන් පැයකට පමණ පසු ක්‍රීඩක ක්‍රීඩිකාවන් නැවත හෝටලය දක්වා කණ්ඩායම් බස් රථයෙන් පිටත් කළ කළමනාකාරිණිය පිරිමි කණ්ඩායමේ කළමනාකරු, දකුණු කොරියානු රග්බි සංගමයේ නිලධාරීන් සහ පොලිස් නිලධාරීන් සමඟ එක්ව ඇය සොයා ගැනීමට දැඩි උත්සාහයක නිරත වී ඇතැයි වාර්තා වේ.
ශ්‍රී ලංකා කාන්තා රග්බි ක්ෂේත්‍රයට මාතරෙන් බිහි වූ විශිෂ්ට ක්‍රීඩිකාවක වන 30 හැවිරිදි දුලානි පල්ලියකොන්දගේ දශකයකට ආසන්න කාලයක් ජාතික කණ්ඩායම නියෝජනය කරමින් ආසියානු රග්බි තරග බිමේ කැපී පෙනෙන දස්කම් දක්වා තිබේ.
ඇය පසුගියදා එංගලන්තයේ පැවැති පොදු රාජ්‍ය මණ්ඩලීය ක්‍රීඩා උලෙළේ රග්බි තරගාවලියට ද සහභාගි වී ඇත.
ශ්‍රී ලංකා යුද හමුදා ක්‍රීඩා සමාජය නියෝජනය කරන ඇය අන්තර් සමාජ රග්බි තරග බිමේ දී සිය කණ්ඩායමේ ජයග්‍රහණ වෙනුවෙන් විශිෂ්ට කාර්යභාරයක් ඉටු කර ඇති ක්‍රීඩිකාවකි.
