ක්‍රීඩා

ශ්‍රී ලංකා දැල්පන්දු පිල අද ජැමෙයිකාව සමඟ ගැටෙයි!

Published

2 years ago

July 28, 2023

editor

දහසය වැනි ලෝක කුසලාන දැල්පන්දු තරගාවලිය අද (28) දකුණු අප්‍රිකාවේ කේප්ටවුන්හිදී ආරම්භ වේ.

මෙවර තරගාවලියට සත්කාරක දකුණු අප්‍රිකාව සමඟින් කණ්ඩායම් 16ක් තරග වැදීමට නියමිතය.

පසුගිය වසරේ අගෝස්තු 12 වැනිදා වන විට ලෝක ශ්‍රේණිගත කිරීම්වල ඉදිරියෙන්ම පසු වූ කණ්ඩායම් 5 වන වත්මන් ශූරීයන් වන නවසීලන්තය, ඔස්ට්‍රේලියාව, ජැමෙයිකාව, එංගලන්තය සහ උගන්ඩාව මේ තරගාවලියට ඍජුවම සුදුසුකම් ලැබූ කණ්ඩායම් වේ.

එසේම සත්කාරක දකුණු අප්‍රිකාව ද මෙවර තරගාවලියට එක්වූයේ සෘජුවම සුදුසුකම් ලැබූ කණ්ඩායමක් ලෙසයි.

සෙසු කණ්ඩායම් 10 සුදුසුකම් ලැබීමේ තරගාවලි මඟින් ලෝක ශූරතාවලියට එක් විය.

ශ්‍රී ලංකාව, සිංගප්පූරුව, ටොන්ගෝ, ෆීජී, මලාවි, සිම්බාබ්වේ, ස්කොට්ලන්තය, වේල්සය, බාබඩෝස් සමඟ ට්‍රිනිඩෑඩ් සහ ටොබැගෝ සුදුසුකම් ලැබීමේ තරගාවලි මඟින් මේ තරගාවලියට එක්වූ කණ්ඩායම් වෙති.

මේ කණ්ඩායම් 16 මූලික වටයේදී කාණ්ඩ 4ක් යටතේ තරග බිමට පිවිසෙයි.

ආසියානු ශූරියන් වෙමින් මෙවර ලෝක කුසලාන තරගාවලියේ ස්ථානයක් වෙන් කරගත් ශ්‍රී ලංකා කණ්ඩායම ‘සී’ කාණ්ඩයෙන් තරග වදින අතර, එම කාණ්ඩයට සත්කාරක දකුණු අප්‍රිකාව, ජැමෙයිකාව සහ වේල්සය ඇතුළත්ව සිටී.

සිංහධේනුවන් (The Lionesses) ලෙස අන්වර්ථ නාමයෙන් හඳුන්වන ශ්‍රී ලංකා කණ්ඩායම ලෝක කුසලාන තරගාවලියට එක්වන 11 වැනි අවස්ථාව මෙයයි.

මේ වන විට ලෝක ශ්‍රේණිගත කිරීම්වල 15 වැනි ස්ථානයේ පසුවන ශ්‍රී ලංකා පිල අවසන් වරට පැවති (2019) තරගාවලියට එක් විය.

එහිදී 15 වැනි ස්ථානයට පත් වූ අතර, ලෝක කුසලාන තරගාවලිය ආරම්භ වූ 1963දී සිලෝන් ලෙස එක් වූ මේ කණ්ඩායම 9 වැනි ස්ථානය හිමි කර ගෙන ඇති අතර, එය මෙතෙක් තරගාවලියේ හිමි කර ගෙන ඇති ඉහළම ස්ථානයයි.

තරගාවලිය ආරම්භ වන අද දිනයේම ශ්‍රී ලංකා පිල මූලික වටයේ පළමු තරගයේදී ජැමෙයිකාවට එරෙහිව තරග බිමට පිවිසෙන අතර, හෙට (29) දෙවැනි තරගයට එක් වන්නේ දකුණු අප්‍රිකාවට එරෙහිවය.

ශ්‍රී ලංකා පිල සහභාගී වන මූලික වටයේ අවසන් තරගය ඉරිදා (30) වේල්සයට එරෙහිව පැවැත්වේ.

අවසන් වරට 2019 වසරේ එංගලන්තයේ පැවති තරගාවලියේදී ඔස්ට්‍රේලියාව පරදවා ශූරතාව දිනා ගැනීමට නවසීලන්තය සමත් විය.

මේ වන විට නවසීලන්තය ලෝක කුසලානය 5 වරක් දිනා ගෙන ඇති අතර, සෙසු තරගාවලි 10දීම ඔස්ට්‍රේලියාව ශූරියන් වී තිබේ.

1979 වසරේ තරගාවලියේදී මේ දෙපිල සමඟින් ට්‍රිනිඩෑඩ් සහ ටොබැගෝ සම ශූරියන් බවට පත් විය.

මේ කණ්ඩායම් දෙකට අමතරව දකුණු අප්‍රිකාව සහ එංගලන්තය එක් වරක් බැගින් අනුශූරතාව දිනා ඇත.

ශ්‍රී ලංකා දැල්පන්දු කණ්ඩායම
ගයන්ජලී අමරවංශ (නායිකාව), දුලංගි වන්නිතිලක (උප නායිකාව), තිසාලා අල්ගම, ගයනි දිසානායක, සෙමිණී අල්විස්, චතුරංග ජයසූරිය, මල්මි හෙට්ටිආරච්චි, භාෂිණී ද සිල්වා, රශ්මි පෙරේරා, කෞෂල්‍යා විජේසූරිය, ශානිකා පෙරේරා සහ තර්ජනී සිවලිංගම්.

ක්‍රීඩා

IPL ක්‍රිකට් තරගාවලියේ අවසන් මහා තරගය අද

Published

6 hours ago

June 3, 2025

editor

ඉන්දීය ප්‍රිමියර්ලීග් ක්‍රිකට් තරගාවලියේ අවසන් මහා තරගය අද (03) පැවැත්වීමට නියමිතය.

ඒ පන්ජාබ් කිංග්ස් කණ්ඩායම සහ රෝයල් චැලෙන්ජර්ස් බැංගලෝර් කණ්ඩායම් අතරය.

තරගය අහමදාබාද්හි දී ශ්‍රී ලංකා වේලාවෙන් රාත්‍රී 07.30ට ආරම්භ වීමට නියමිතය.

දෙවන වරට ඉන්දීය ප්‍රිමියර්ලීග් ක්‍රිකට් තරගාවලියේ අවසාන මහා තරගයකට සුදුසුකම් ලැබීමට පංජාබ් කිංග්ස් පිල සමත්ව තිබේ.

ඔවුන් පළමු වරට 2014 වසරේ අවසාන මහා තරගයකට සුදුසුකම් ලැබීමට සමත් වුවත් කොල්කටා නයිට්රයිඩර්ස් පිල හමුවේ පරාජයට පත්වුණි.

රෝයල් චැලෙන්ජර්ස් බැංග්ලෝර් කණ්ඩායම 2009, 2011 හා 2016 යන වසරවල දී ඉන්දීය ප්‍රිමියර්ලීග් අවසාන මහා තරගයට සුදුසුකම් ලැබුව ද ඔවුන්ට ශූරතාවය හිමිකර ගැනීමට නොහැකි වුණි.

ක්‍රීඩා

ICC කාන්තා ක්‍රිකට් ලෝක කුසලානය ලංකාවේ හා ඉන්දියාවේදී

Published

18 hours ago

June 2, 2025

editor

මේ වසරේ ICC කාන්තා ක්‍රිකට් ලෝක කුසලානය පැවැත්වෙන දින හා ක්‍රීඩාංගන ප්‍රකාශයට පත් කර තිබේ.

13 වරටත් පැවැත්වෙන මෙම එක්දින ජාත්‍යන්තර තරගාවලියට ඉන්දියාව, ඕස්ට්‍රේලියාව, එංගලන්තය, දකුණු අප්‍රිකාව, නවසීලන්තය, ශ්‍රී ලංකාව, බංගලාදේශය හා පාකිස්තානය යන රටවල් 08ක් එක්වේ.

සැප්තැම්බර් 30දා – නොවැම්බර් 02දා දක්වා පැවැත්වෙන මෙම තරගාවලිය, ඉන්දියාවේ හා ලංකාවේ ක්‍රීඩාංගන 05ක පැවැත්වෙනු ඇති බව ජාත්‍යන්තර ක්‍රිකට් කවුන්සිලය පවසයි. එම ක්‍රීඩාංගන වන්නේ බෙංගාලූරූ හි එම්. චින්නස්වාමි ක්‍රීඩාංගනය, ගුහාවතී හි ACA ක්‍රීඩාංගනය, ඉන්දෝර් හි හොල්කාර් ක්‍රීඩාංගනය, විශාඛාපට්නම් හි ACA-VDCA ක්‍රීඩාංගනය හා කොළඔ ආර්. ප්‍රේමදාස ක්‍රීඩාංගනයයි.

සමාරම්භක තරගය සැප්තැම්බර් 30දා බෙංගාලූරූ හි දී පැවැත්වීමට නියමිත අතර, පළමු අර්ධ අවසන් පූර්ව තරගය ඔක්තෝබර් 29දා ගුහාවතී හිදී හෝ කොළඹ දී පැවැත්වෙනු ඇත. දෙවැනි අර්ධ අවසන් පූර්ව තරගය ඔක්තෝබර් 30දා බෙංගාලූරූ හි දී පැවැත්වීමට නියමිතය.

මෙහි අවසන් මහා තරගය නොවැම්බර් 02දා බෙංගාලූරූ හි දී හෝ කොළඹදී පැවැත්වීමට නියමිතය.

ක්‍රීඩා

ජාතික තේරීම් කමිටුව පත්කරයි

Published

1 day ago

June 2, 2025

editor

ජාතික තේරීම් කමිටුව පත් කිරීමට ක්‍රීඩා අමාත්‍යංශය කටයුතු කර තිබේ.

තරුණ කටයුතු සහ ක්‍රීඩා අමාත්‍ය සුනිල් කුමාර ගමගේ සහ ක්‍රීඩා නියෝජ්‍ය අමාත්‍ය සුගත් තිලකරත්න යන අමාත්‍යවරුන්ගේ ප්‍රධානත්වයෙන් පසුගිය 30 වැනිදා තරුණ කටයුතු සහ ක්‍රීඩා අමාත්‍යංශයේදී මෙම පත් කිරීම සිදුකර ඇත.

එහිදී ජාතික තේරීම් කමිටුවේ නව සභාපතිනිය ලෙස ශ්‍රියානි කුලවංශ මහත්මිය පත් කිරීමටද පියවර ගෙන තිබේ.

එම කමිටු නිලධාරීන් පහතින්

01. ශ්‍රියානි කුලවංශ – (සභාපති – ජාතික ක්‍රිඩා තෙරීම් කමිටුව)
02. මේජර් ජෙනරාල් රවී පතිරවිතාණ – (ලේකම් – ජාතික ක්‍රිඩා තේරීම් කමිටුව )
03. මේජර් රාජිත සමරසේකර – (සම්බන්ධීකරණ නිලධාරී – ජාතික ක්‍රිඩා තේරීම් කමිටුව)
04. කමල් ගම්ලත් – විශ්‍රාමික (ක්‍රීඩා භාර නිලධාරී – ක්‍රීඩා අමාත්‍යංශය )
05. රුවන් පෙරේරා – (පාසල් ක්‍රීඩා නියෝජ්‍ය අධ්‍යක්ෂ – සසෙක්ස් විදුහල)
06. ජයමිනි ඉලෙපෙරුම – (විශ්‍රාමික බැංකු නිළධාරීනී – හැටන් නැෂනල් බැංකුව )
07. සුරේෂ් සුබ්‍රමනියම් – (සභාපති – ජාතික ඔලිම්පික් කමිටුව)
08. අනුරාධා ඉලෙපෙරුම – (අතිරේක ලේකම් – තරුණ කටයුතු සහ ක්‍රීඩා අමාත්‍යංශය)