ශ්‍රී ලංකා ක්‍රිකට් ආයතනය සහ එහි නිලධාරීන් සම්බන්ධයෙන් සිළුමිණ පුවත්පතේ ලිපි පළ කිරීමට එරෙහිව ශ්‍රී ලංකා ක්‍රිකට් සභාපති හා උප සභාපති පැවරූ නඩුව විභාගයට නොගෙන මුල් අවස්ථාවේම ප්‍රතික්ෂේප කරන්නැයි සීමාසහිත එක්සත් ප්‍රවෘත්ති පත්‍ර සමාගම (ලේක්හවුස්) නඩුවේ විරෝධතා ගොනු කරමින් කොළඹ දිසා අධිකරණයෙන් ඊයේ (25) ඉල්ලා සිටියේය.

පැමිණිලිකරුවන් වංචාකාරීව හා ප්‍රෝඩාකාරීව අත්‍යවශ්‍ය කරුණු වසන් කරමින් වාරණ නියෝග ලබාගෙන ඇති බවත් පිරිසුදු දෑතින් තොරව අධිකරණය ඉදිරියට පැමිණ ලබාගත් වාරණ නියෝග විසුරුවා හැර නඩුව නිෂ්ප්‍රභ කරන ලෙසත් විරෝධතා මඟින් ඉල්ලීය.

ශ්‍රී ලංකා ක්‍රිකට් සම්බන්ධයෙන් සිළුමිණ පුවත්පතේ ලිපි පළ කිරීම පොදු මහජන යහපත උදෙසා මහජනයා වෙත සත්‍ය කරුණු හෙළිදරව් කිරීමක් පමණක් බවත් මහජනයා සතු කරුණු දැන ගැනීමේ අයිතිය රඳවා තබමින් සාධාරණ විවේචනයක් සඳහා ලිපි පළ කර ඇති බවත් එමඟින් පැමිණිලිකරුවන් හෝ අන් කිසිවකුට හිංසනයක් කිරීමේ චේතනාවක් විත්තිකරුවන් සතුව නැති බවත් විරෝධතා මඟින් වැඩිදුරටත් සඳහන් කර ඇත.

මෙම නඩුව කොළඹ ප්‍රධාන දිසා විනිසුරු සඳුන් විතාන මහතා ඉදිරියේ ඊයේ (25) කැඳවූ අවස්ථාවේදී අදාළ වාරණ නියෝගය අගෝස්තු 4 වැනි දින දක්වා දීර්ඝ කළ අතර විත්තිකරුවෝ මෝසමක් මඟින් අධිකරණයට විරෝධතා ඉදිරිපත් කළහ.

2023 අප්‍රේල් මස 23 වැනි දින හා ජුනි මස 18 වැනි දින සිළුමිණ පුවත්පතේ පළවූ ලිපි දෙකකින් තමන්ට අපහාසයක් සිදු වූ බවට සඳහන් කරමින් ක්‍රිකට් සභා‍පති ෂම්මි සිල්වා සහ උප සභාපති රවීන් වික්‍රමරත්න මහත්වරු මෙම නඩු පැවරූහ.

නඩුවේ විත්තිකරුවන් ලෙස මාධ්‍යවේදී ෆවුස් මොහොමඩ් සහ සීමාසහිත එක්සත් ප්‍රවෘත්ති පත්‍ර සමාගම නම් කර ඇත.

අදාළ පැමිණිල්ල ඒකපාර්ශ්විකව සලකා බැලීමෙන් පසුව කොළඹ ප්‍රධාන දිසා විනිසුරුවරයා පසුගිය 26 වැනි දින මෙම වාරණ නියෝග නිකුත් කර තිබිණි.

විත්තිකරුවන් වෙනුවෙන් නීතිඥ කේ.අයි.එම්. ජයවර්ධන මහත්මිය මඟින් මෙම විරෝධතා අධිකරණයට ඉදිරිපත් කර තිබිණි.

එම විරෝධතාවල මෙසේ ද සඳහන් වේ.

පැමිණිලිකරුවන් විසින් බැලූ බැල්මට ජයගත හැකි නඩුවක් අධිකරණයට ඉදිරිපත් කර නැති අතර අදාළ ලිපිවලට එරෙහිව නීති ක්‍රියාමාර්ග ගැනීමට මාස දෙකකට අධික කාලයක් ගත වී ඇති අතර එය සිවිල් නඩු විධාන සංග්‍රහය ප්‍රකාරව අයුතු ප්‍රමාදයක් වේ. විත්තිකරුවන්ට පැමිණිලිකරුවන් සම්බන්ධයෙන් ද්වේෂසහගත අදහසක් නැති අතර සත්‍ය කරුණු හෙළිදරව් කිරීමට පමණක් මෙම ලිපි පළ කර ඇත.

නඩුවට පාදක අදාළ ලිපිවල හරය වී ඇත්තේ ක්‍රීඩා හා යෞවන කටයුතු අමාත්‍යාංශය පත් කළ විශ්‍රාමික මහාධිකරණ විනිසුරු සරෝජනී කුසලා වීරවර්ධන මහත්මිය ප්‍රමුඛ පංච පුද්ගල විශේෂ පරීක්ෂණ කොමිසම ඉදිරිපත් කළ වාර්තාව බව සඳහන් කර ඇති විත්තිකාර ආයතනය අදාළ වාර්තාවේ පිටපතක් ද විරෝධතා සමඟ අධිකරණයට ඉදිරිපත් කර ඇත.

පැමිණිලිකරුවන් වෙනුවෙන් නීතිඥ සංජය ෆොන්සේකා මහතාගේ උපදෙස් පරිදි ජනාධිපති නීතිඥ කුවේර ද සොයිසා මහතා පෙනී සිටි අතර විත්තිකරුවන් වෙනුවෙන් එම්.අයි. ජයවර්ධන මහත්මියගේ උපදෙස් පරිදි නීතිඥ සංජීව දහනායක මහතා පෙනී සිටියේය.

(දිනමිණ)