එක්සත් අරාබි එමීර් රාජ්‍යයේ පැවැත්වෙන “A” කණ්ඩායම් තුන්කොන් එක්දින ක්‍රිකට් තරගාවලියේ ඊයේ (15) පැවැති තරගයෙන් ශ්‍රී ලංකා “A” කණ්ඩායම ජයගැනීමට සමත්විය.

ඒ ඇෆ්ගනිස්තාන “A” කණ්ඩායම කඩුලු 6කින් පරාජයට පත්කරමිනි.

තරගයේ කාසියේ වාසිය දිනු ඇෆ්ගනිස්තාන “A” කණ්ඩායමේ නායකයා පළමුව පන්දුවට පහර දීමට තීරණය කළේය.

ඒ අනුව පිටියට පිවිසි ඇෆ්ගනිස්තාන “A” කණ්ඩායම නියමිත පන්දුවාර 50 අවසානයේ කඩුලු 8ක් දැවී ලකුණු 248ක් රැස්කළේය.

පන්දු යැවීමේ දී ශ්‍රී ලංකා “A” කණ්ඩායමේ දිල්ෂාන් මධුසංක කඩුලු 4ක් සහ මොහොමඩ් ෂිරාස් කඩුලු 02ක් බිඳ හෙළීමට සමත් විය.

ලකුණු 249ක ජයග්‍රාහි ඉලක්කයක් හඹාගිය ශ්‍රී ලංකා “A” කණ්ඩායම පන්දුවාර 41යි පන්දු 03ක් අවසානයේ කඩුලු 4ක් දැවි ලකුණු  249ක් රැස් කරමින් ජයග්‍රහණය වාර්තා කළේය.

ශ්‍රී ලංකා “A” කණ්ඩායම වෙනුවෙන් අගනා ඉනිමක් ක්‍රීඩාකළ නායක සදීර සමරවික්‍රම නොදැවී ලකුණු 129ක් රැස්කළේය.

තරගයේ වීරයා ලෙස සම්මාන දිනාගත්තේද නායක සදීර සමරවික්‍රමයි.

ලහිරු උදාර ලකුණු 81ක් රැස් කිරීමට සමත් විය.

පන්දු යැවීමේදී ඇෆ්ගනිස්තාන “A” කණ්ඩායම වෙනුවෙන් කලීල් අහමඩ් කඩුලු 02ක් දවාගත්තේය.

එංගලන්තයේ එතෙක් මෙතෙක් බිහි වූ විශිෂ්ටතම ටෙස්ට් පන්දු යවන්නා වන ජේම්ස් ඇන්ඩර්සන් ක්‍රිකට් ක්‍රීඩාවට කළ සේවය වෙනුවෙන් නයිට් පදවිය පිරිනැමීමට නියමිත බව වාර්තා වේ.

හිටපු අගමැති රිෂි සුනක්ගේ ඉල්ලා අස්වීමේ ගෞරව ලැයිස්තුවේ ඇන්ඩර්සටන්ට නයිට් පදවිය ලබා දී ඇති අතර, එය සුනක් අගමැතිවරයා ක්‍රීඩකයෙකුට එම  සම්මානය ලබා දුන් එකම අවස්ථාවද වෙයි.

ඇන්ඩර්සටන්ට ලබාදුන් ගෞරවනාමය සම්බන්ධයෙන් අදහසක් දක්වන එංගලන්ත සහ වේල්ස් ක්‍රිකට් මණ්ඩලයේ සභාපති රිචඩ් තොම්සන් පවසා සිටියේ, “එංගලන්ත ක්‍රිකට් වෙනුවෙන්  බොහෝ දේ ලබා දුන් පුරාවෘත්තයකට ඇත්තටම ලැබිය යුතු ගෞරවයක්” බවයි.

ඒ අනුව මෙම නයිට් පදවියත් සමග ඔහු ශ්‍රීමත් ජේම්ස් ඇන්ඩර්සන් නැතහොත් සර් ජේම්ස් ඇන්ඩර්සන් ලෙසින් හැඳින්වෙනු ඇත.

42 හැවිරිදි ඇන්ඩර්සන් පසුගිය වසරේ දී ජාත්‍යන්තර ටෙස්ට් ක්‍රිකට් පිටියෙන් විශ්‍රාම ගිය අතර, ඒ වනවිට ඔහු කඩුලු 704ක් දවාගෙන සිටියේය.

ඔහු අදටත් ලොව වැඩිම ටෙස්ට් කඩුලු දවාගත් වේග පන්දු යවන්නා වේ.

දශක දෙකකට අධික කාලයක් පුරා එංගලන්තය නියෝජනය කළ ඇන්ඩර්සන් ටෙස්ට් තරග 188කට, එක්දින තරග 194කට සහ විස්සයි20 තරග 19කට ක්‍රීඩාකර ඇත.

ඔස්ට්‍රේලියාවේ ශ්‍රීමත් (සර්) ඩොනල්ඩ් බ්‍රැඩ්මන්, නවසීලන්තයේ රිචඩ් හැඩ්ලි, බ.ඉ. කොදෙව්හි ක්ලයිව් ලොයිඩ් මෙම ගෞරවාන්විත නයිට් පදවිය ලැබූවන් අතරින් කිහිප දෙනෙකු වෙති.

එක්සත් එමීර් රාජ්‍යයේ පැවැත්වෙන තුන්කොන් ක්‍රිකට් තරගාවලියට සහභාගී වන ශ්‍රී ලංකා ඒ කණ්ඩායම නම් කර තිබේ.

කණ්ඩායමේ නායකත්වය හිමිව ඇත්තේ, සධීර සමරවික්‍රමටයි.

ළහිරු උදාර, කමිල් මිෂාර, ලසත් කෲස්පුල්ලේ, නුවනිඳු ප්‍රනාන්දු, පසිඳු සූරියබණ්ඩාර, පවන් රත්නායක, සහන් ආරච්චිගේ සොනල් දිනූෂ, දුෂාන් හේමන්ත, තරිඳු රත්නායක, වංජු සහන්, මිලාන් රත්නායක, චමිදු වික්‍රමසිංහ, ඩිල්ෂාන් මධුසංඛ සහ මොහොමඩ් ශිරාස් යන ක්‍රීඩකයෝ මෙම කණ්ඩායම නියෝජනය කරති.

ශ්‍රී ලංකා ක්‍රිකට් ආයතනය නිකුත් කළ නිවේදනයේ දැක්වෙන පරිදි මෙම ක්‍රීඩකයින් හෙට (10) එක්සත් එමීර් රාජ්‍යය බලා පිටත්ව යාමට නියමිතය.

ඇෆ්ගනිස්තානු ක්‍රිකට් ආයතනය විසින් සංවිධානය කරනු ලබන මෙම තුන්කොන් තරගාවලිය, ඇෆ්ගනිස්තානු ‘ඒ‘ පිල හැරුණු කොට අයර්ලන්ත ‘ඒ‘ කණ්ඩායම සහභාගිවනු ඇත.

අදාළ තරගාවලියෙන් පසු ශ්‍රී ලංකා ‘ඒ‘ කණ්ඩායම සත්කාරක ඇෆ්ගනිස්තානු ‘ඒ‘ කණ්ඩායමට එරෙහිව සිවුදින ක්‍රිකට් තරගයකටද සහභාගිවීමට නියමිතය.

මෙම තරගාවලියේ සියලුම තරග අබුඩාබිහිදී පැවැත්වෙනු ඇත.

• අප්‍රේල් 13                                අයර්ලන්ත ඒ සහ ශ්‍රී ලංකා ඒ
• අප්‍රේල් 15                                ඇෆ්ගනිස්තානු ඒ සහ ශ්‍රී ලංකා ඒ
• අප්‍රේල් 19                                අයර්ලන්ත ඒ සහ ශ්‍රී ලංකා ඒ
• අප්‍රේල් 23                                ඇෆ්ගනිස්තානු ඒ සහ ශ්‍රී ලංකා ඒ
• අප්‍රේල් 25                                අවසන් මහ තරගය