ක්‍රීඩා

චමරි එක්ක ක්‍රිකට් පිල අද රෑට දිවයිනට

Published

2 years ago

September 28, 2023

editor

ආසියානු ක්‍රීඩා උලෙළේ කාන්තා ක්‍රිකට් ඉසව්වේ රිදී පදක්කම දිනාගත් චමරි අතපත්තුගේ නායකත්වයෙන් යුත් ශ්‍රී ලංකා කාන්තා ක්‍රිකට් කණ්ඩායම අද (28) රාත්‍රියේ යළි ශ්‍රී ලංකාවට පැමිණීමට නියමිතය.

ශ්‍රී ලංකාවට ආසියානු ක්‍රීඩා පදක්කමක් දිනාගත්තේ වසර 9කට පසුවය.

මේ ක්‍රීඩා උලෙළේදී ක්‍රිකට් ඉසව්වෙන් හිමි වූ තෙවැනි පදක්කම මෙයයි.

මීට පෙර 2014 වසරේ ශ්‍රී ලංකා පිරිමි ක්‍රිකට් කණ්ඩායම රන් පදක්කමත්, කාන්තා කණ්ඩායම ලෝකඩ පදක්කමත් දිනා ගෙන තිබිණි.

මේ අතර ඊයේ ක්‍රිකට් ඉසව්වේ පිරිමි තරග ආරම්භ කරමින් මොංගෝලියාවට එරෙහිව පැවති පළමු තරගයේදී ක්‍රිකට් වාර්තා පොත අලුත් කිරීමට නේපාල කණ්ඩායම සමත් විය.

විස්සයි 20 ආකෘතිය යටතේ සෙජෑන්ග්හි තාක්ෂණ විශ්වවිද්‍යාල ක්‍රිකට් පිටියේ පැවති මේ තරගයේදී කණ්ඩායමක් රැස් කළ ඉහළම ලකුණු (314/3), වේගවත්ම ශතකය සහ අර්ධ ශතකය නේපාල පිතිකරුවන් වාර්තා කළහ.

ඊයේ තරගයේදී නේපාලය ඕවර 20 අවසානයේ කඩුලු 3ක් දැවී ලකුණු 314ක් රැස් කළ අතර, මින් පෙර එම වාර්තාවට හිමිකම් කී ඇෆ්ගනිස්තානය 2019දී අයර්ලන්තයට එරෙහිව ලකුණු 278ක් රැස් කර තිබිණි.

අංක 3 පිතිකරු ලෙස පිටියට පිවිසි කුෂාල් මල්ලා විස්සයි20 පිටියේ වේගවත්ම ශතකය තමන් සතු කර ගත්තේ පන්දු 34කදීය.

ඒ සමඟ දකුණු අප්‍රිකාවේ ඩේවිඩ් මිලර් සහ ඉන්දියාවේ යුවරාජ් සිං පන්දු 35කින් තබා තිබූ වාර්තා මැකී ගියේය.

ඉනිම නිමා වන විට ඔහු පන්දු 50කින් නොදැවී ලකුණු 137ක් රැස් කර තිබුණේ හතරේ පහර 8ක් සහ හයේ පහර 12ක් සමඟිනි.

යුවරාජ් සිං පන්දු 12කින් තබා තිබූ වාර්තාව මකා දැමීමට දීපෙන්ද්‍ර සිං අයිරී සමත් වූයේ පන්දු 9කින් ලකුණු 50ක් රැස් කරමිනි.

නායක රෝහිත් පෝඩෙල් පන්දු 27කින් ලකුණු 61ක් රැස් කළ අතර, ඔහු කුෂාල් සමඟ එක්ව තෙවැනි කඩුල්ලට ලකුණු 193ක සබඳතාවක් ගොඩනැඟුවේ පන්දු 63කිනි.

එය වාර්තා අතරට එක් වූයේ විස්සයි20 තරගයක තෙවැනි කඩුල්ල සඳහා ගොඩනැඟුණු හොඳම සබඳතාව ලෙසිනි.

නේපාල කණ්ඩායම මේ ඉනිමේදී හයේ පහර 26ක් එල්ල කරමින් විස්සයි20 ඉනිමකදී වැඩිම හයේ පහර වාර්තාව ද සතු කර ගත්තේය. ඒ සමඟ ඇෆ්ගනිස්තානය ඉනිමකදී රැස් කර තිබූ හයේ පහර 22ක වාර්තාව බිඳ වැටිණි.

මේ තරගයේ පිළිතුරු ඉනිම ක්‍රීඩා කළ මොංගෝලියානු කණ්ඩායම පන්දුවාර 13.1කදී ලකුණු 41කට දැවී ගිය අතර, දවාසුරෙන් ජමියන්සුරෙන් ලකුණු 10ක් රැස් කරමින් ඉනිමේ වැඩිම ලකුණුලාභියා විය.

මේ අනුව නේපාලයට ලකුණු 273ක ජයක් හිමි වූ අතර, එය විස්සයි20 තරගයකදී කණ්ඩායමක් ජයගත් ඉහළම ලකුණු සංඛ්‍යාව ලෙස වාර්තා අතරට එක් විය.

මොංගෝලියානු ක්‍රීඩකයන් සියලු දෙනා මේ තරගයේදී ජාත්‍යන්තර විස්සයි20 තරග වරම් දිනා ගැනීම විශේෂත්වයකි.

ක්‍රීඩා

රෝහිත් ශර්මා ටෙස්ට් පිටියට සමුදෙයි

Published

1 day ago

May 7, 2025

editor

ඉන්දීය ටෙස්ට් ක්‍රිකට් කණ්ඩායමේ නිත්‍ය නායක රෝහිත් ෂර්මා ජාත්‍යන්තර ටෙස්ට් ක්‍රිකට් පිටියට සමුදීමට තීරණය කර ඇත.

සිය තීන්දුව සමාජ මාධ්‍ය ඔස්සේ ප්‍රකාශයට පත් කළ ශර්මා පවසා ඇත්තේ ටෙස්ට් සුදු ඇඳුමින් සැරසී සිය රට නියෝජනය කිරීමට ලැබීම ගෞරවයක් බවයි.

කෙසේවෙතත්, තමා තවදුරටත් එක්දින ජාත්‍යන්තර තරග වල ක්‍රීඩා කරන බවද ඔහු පවසා ඇත.

2024 වසරේ පැවති විස්සයි20 ලෝක කුසලානයෙන් අනතුරුව ඔහු T20 ජාත්‍යන්තර තරග බිමෙන්ද විශ්‍රාම ගියේය.

මේ වනවිට 38වන වියේ පසුවන රෝහිත් ටෙස්ට් තරග 67ක ඉනිම් 116කදී ඉන්දියාව වෙනුවෙන් ක්‍රීඩාකර ඇත. එහිදී ලකුණු 4301ක් රැස්කර ඇති රෝහිත්, ශතක 12ක් හා අර්ධ ශතක 18ක් වාර්තාකර තිබේ.

ක්‍රීඩා

එක්දින ශ්‍රේණිගත කිරීම්වල ශ්‍රී ලංකාව ඉදිරියට

Published

4 days ago

May 5, 2025

editor

ජාත්‍යන්තර ක්‍රිකට් කවුන්සිලය (ICC) ප්‍රකාශයට පත්කළ නවතම එක්දින කණ්ඩායම් ශ්‍රේණිගත කිරීම්වල ශ්‍රී ලංකාව 4 වන ස්ථානය දක්වා ඉහළට පැමිණ තිබේ.

අවසන් වරට ඉකුත් පෙබරවාරි මස සිදුකල ශ්‍රේණිගත කිරීම අනුව ශ්‍රී ලංකාව රැදී සිටියේ 5වන ස්ථානයේය.

මෙහි පෙරමුණ ඉන්දියාවට හිමිව ඇත.

ඊට අමතරව දෙවැනි ස්ථානය නවසීලන්තයටත්, තෙවන ස්ථානය ඔස්ට්‍රේලියාවටත් හිමිව තිබේ.

ICC Mens ODI Team Rankings ICC Download

ක්‍රීඩා

හත්වසරකට පසු ලංකාවේ කෙල්ලෝ ඉන්දීය කෙල්ලන් දණගස්වයි!

Published

5 days ago

May 4, 2025

editor

තුන්කොන් කාන්තා එක්දින ක්‍රිකට් සටනේ අද (4) පැවති තරගයෙන් ඉන්දීය කණ්ඩායම පරාජය කර කඩුලු 3ක සටන්කාමී ජයක් ලැබීමට ශ්‍රී ලංකා කණ්ඩායම සමත් විය.

කොළඹ ආර්. ප්‍රේමදාස ක්‍රීඩාංගණයේ පැවති මෙම තරගයේ පළමුව පන්දුවට පහරදුන් ඉන්දියාව පන්දුවාර 50 තුළදී කඩුලු 9ක් දැවී ලකුණු 275ක් රැස්කිරීමට සමත් විය.

Richa Ghosh ලකුණු 58ක් රැස්කරමින් ඉන්දීය ඉනිම ඔසවා තැබුවාය.

ශ්‍රී ලංකාව වෙනුවෙන් පන්දු යැවීමෙන් දක්ෂතා දැක් වූ සුගන්දිකා කුමාරි (3/44) හා චමරි අතපත්තු (3/43) කඩුලු 3 බැගින් බිඳදැමූහ.

මෙහිදී ලකුණු 276ක ඉලක්කයක් හඹාගිය ශ්‍රී ලංකා පිතිකාරිනියෝ කඩුලු 7ක් දැවී තිබියදී තරගයේ අවසන් පන්දුවාරයේ දී (49.1) ලකුණු 278ක් රැස්කරමින් ජයග්‍රහණය සම්පූර්ණ කරගත්තේය.

ශ්‍රී ලංකා ජයග්‍රහණයේ නියමුවරියන් වූ හර්ෂිතා සමරවික්‍රම (53) හා නිලක්ෂිකා සිල්වා (56) අර්ධ ශතක රැස්කරමින් දක්ෂතා දැක්වූහ.

මෙවර වසර 7කට පසු ශ්‍රී ලංකා කාන්තා ක්‍රිකට් කණ්ඩායමක් එක්දින තරගයකදී ඉන්දියාව පරාජය කළ පළමු අවස්ථාව විය.

අවසන්වරට ශ්‍රී ලංකාව විසින් ඉන්දියාව පරාජය කර තිබුණේ 2018 වසරේදීය.

තරගයේ වීරවරිය ලෙසින් පන්දු 33කින් ප්‍රහාරාත්මක ලකුණු 56ක් රැස්කළ නිලක්ෂිකා සිල්වා සම්මාන දිනාගත්තාය.

මෙම ජයග්‍රහණයත් සමග ශ්‍රී ලංකාව මෙම තරගාවලියේ මේ දක්වා ක්‍රීඩාකළ තරග 3න් තරග 2ක් ජයගෙන තවමත් ප්‍රසාද ලකුණු සටහනේ දෙවන ස්ථානය රැකගෙන සිටියි.

ඉන්දියාව එහි පෙරමුණේ සිටින අතර, තවමත් එකඳු ජයක් හෝ ලබා නොමැති දකුණු අප්‍රිකාව අවසන් ස්ථානයේ පසුවේ.