වසරකට දිවා රාත්‍රි ජාත්‍යන්තර තරග තුන හතරකට වඩා නොපවත්වන දඹුල්ල ක්‍රිකට් ක්‍රීඩාංගණයේ ආලෝක ධාරා පද්ධතිය මුළුමනින්ම අලුත් කිරීමට ක්‍රිකට් ආයතනය මේ දිනවල කටයුතු කරමින් සිටී.

මෙහි ටෙන්ඩරය ලබා ගෙන ඇති ඩීමෝ සමාගම මේ දිනවල දඹුල්ලේ එහි වැඩ කටයුතු අරඹා ඇත.

ක්‍රිකට් ආයතනයේ ක්‍රීඩාංගණ වල ආලෝක ධාරා පද්ධති වල අලුත්වැඩියා කටයුතු භාර දෙනු ලබන්නේ ඩීමෝ සමාගමටය.

මෙවර දඹුල්ල ක්‍රීඩාංගණයේ ආලෝක ධාරා පද්ධති ව්‍යාපෘතිය සඳහා මිලියන 150 ක් පමණ  වැය වනු ඇතැයි අපේක්ෂා කෙරේ.

වසර 2001 ආරම්භ කරන ලද දඹුල්ල ක්‍රීඩාංගණයේ මෙතෙක් ජාත්‍යන්තර තරග 55 ක් පවත්වා තිබෙන අතර  ආරම්භයේ සිටම එහි කුළුණු උසින් අඩු බවත් ආලෝක ධාරා වල දීප්තියේ ( Lux ) අඩුවක් තිබුණු බවටත් ක්‍රීඩකයන් වෙතින් චෝදනා එල්ල වී තිබිණ.

එසේම ජාතික ක්‍රීඩකයන් සඳහා ආර්. ප්‍රේමදාස ක්‍රීඩා පිටියේ ගෘහස්ථ ක්‍රීඩාගාරයක්  හා පිහිනුම් තඨාකයක් ඉදිකිරීමට එවකට තිබූ අතුරු කමිටුව සැළසුම් කොට අඩිතාලම පවා දමා තිබියදී එය නතර කරන ලදී.

ක්‍රිකට් ආයතනයට මුදල් රැගෙන එන ක්‍රීඩකයන්ගේ පුහුණුවට අවශ්‍ය මූලික අවශ්‍යතා දෙකක් වන ගෘහස්ථ ක්‍රීඩාගාරය හා පිහිනුම් තඨාකය අමතක කොට වසරකට තරග කිහිපයක් පවත්වන ක්‍රීඩාංගණයක ආලෝකධාරා පද්ධති අලුත් කිරීම ගැන ක්‍රීඩකයන් අසතුට පළ කර ඇතැයි ශ්‍රී ලංකා මිරර් වෙත වාර්තා වේ.

ඩිමෝ ආයතනය මීට පෙර ඛෙත්තාරාම ක්‍රීඩාංගනයේ නොදැල්වෙන විදුලි බුබුලුවලට අලුතින් විදුලි බුබුලු එක් කිරීමේ කොන්ත්‍රාත්තුවක් ලබාගෙන එහි දැල්වෙන විදුලි බුබුලුද ගලවාගෙන ගොස් අලුත් විදුලි බුබුලු එක්කර තිබූ බවට මීට පෙර චෝදනාවක් එල්ලවී තිබිණි.