ඇෆ්ගනිස්තාන ‘A’ කණ්ඩායම පරාජය කර අබුඩාබිහිදී පැවති එකම නිල නොවන ටෙස්ට් ක්‍රිකට් තරගයෙන් ලකුණු 308ක දැවැන්ත ජයක් ලැබීමට ශ්‍රී ලංකා ‘A’ කණ්ඩායම සමත් විය.

සිව්දින තරගයක් ලෙස පැවති මෙම තරගය ඊයේ (02) අවසන් විය. ඇෆ්ගනිස්තානයේ සත්කාරකත්වය යටතේ මෙය පැවැත්විණි.

ශ්‍රී ලංකා ‘A’ කණ්ඩායම පළමු ඉනිමට ලකුණු 406/10ක් රැස් කළේය. එහිදී ළහිරු උදාර (107), සොනාල් දිනුෂ (104) ශතක රැස්කළහ.

පිළිතුරු ඉනිම ක්‍රීඩාකළ ඇෆ්ගනිස්තාන ‘A’ කණ්ඩායමට පළමු ඉනිම වෙනුවෙන් රැස්කළ හැකිවූයේ ලකුණු 168ක් පමණි.

ශ්‍රී ලංකාව වෙනුවෙන් කැපීපෙනෙන පන්දු යැවීමක නිතර වූ ඉසිත විජේසුන්දර ලකුණු 35කට කඩුලු 6ක් දවාගත්තේය.

ලකුණු 238ක් ඉදිරියෙන් සිටිමින් යළි දෙවන ඉනිම ඇරඹූ ශ්‍රී ලංකාව එවර ලකුණු 376/4ක් රැස්කර ඉනිම අත්හිටුවීය.

එහිදී නුවනිදු ප්‍රනාන්දු (102), නායක පසිඳු සූරියබණ්ඩාර (100) හා පවන් රත්නායක (නොදැවී 100) ශතක රැස්කිරීමට සමත් වූහ.

ඒ අනුව ඇෆ්ගනිස්තාන කණ්ඩායමට ජයග්‍රහණය සඳහා ලකුණු 615ක දැවැන්ත ඉලක්කයක් හිමිවිය.

කෙසේ නමුත් ඊට පිළිතුරු ලෙස ඔවුන් රැස්කළේ ලකුණු 306ක් පමණක් වූ අතර, ඒ හේතුවෙන් තරගය ජයපරාජයෙන් තොරව හෝ අවසන්කර ගැනීමට ඇෆ්ගනිස්තානයට නොහැකි විය.

තරගයේ වීරයා ලෙස ඉනිම් දෙකෙහිම කඩුලු 10ක් (6/35, 4/75) දවාගත් ඉසිත විජේසුන්දර සම්මාන දිනාගත්තේය.

නවසීලන්ත 85kg අඩු රග්බි පිල පසුගිය අප්‍රේල් 30 වැනි දින ලංකාවට පැමිණි අතර ශ්‍රීලංකාව හා නවසීලන්තය අතර තරඟය (මැයි 04) මහනුවර නිත්තවෙල ක්‍රීඩාංගණයේදී පැවැත්වීමට නියමිතව ඇත.

දෙවන තරගය කොලබ තුරඟ තරඟ පිටියේ දී ලබන 10 වැනිදා පැවැත්වීමට සැලසුම් කර ඇත .

පසුගිය දා පැවැති මැලේසියා තරඟය මෙහෙය වූ නයිජල් රත්වත්තේ විසින් ම මෙවරත් ශ්‍රී ලංකා කණ්ඩායම මෙහෙයවන අතර නවසීලන්ත කිලෝග්‍රෑම් 85ට අඩු කණ්ඩායමේ නායකත්වය ජෙරඩ් පර්සිවල් වෙත හිමි ව තිබේ.

නවසීලන්ත කණ්ඩායමේ පුහුණුකරු ලෙස නගායි වෝකර් ද, කළමනාකරු ලෙස ග්‍රාන්ට් විල්සන් ද කටයුතු කරති.

නවසීලන්ත පිල 85 ට අඩු බර අඩු වුවද ලංකා පිලට එවැනි තහනමක් නොමැති අතර ශ්‍රී ලංකා පිලේ ‘ස්ක්‍රම්’හි ක්‍රීඩාකරන ක්‍රීඩකයින් කිලෝග්‍රෑම් 105ට අඩු බරකින් යුතු ක්‍රීඩකයන් විය යුතු ය. එම සීමාව භාවිත වන්නේ ද එයට සහභාගී වන නවසීලන්ත ක්‍රීඩකයන්ගේ ආරක්ෂාව වෙනුවෙනි.

ආසියානු කලාපයේ මේ වන විට මෙම කාණ්ඩයේ රග්බි තරග නොපැවැත්වෙන පසුබිමක ශ්‍රී ලංකා ප්‍රධාන පෙළේ රග්බි පිල සමග තරග වැදීමට නවසීලන්ත රග්බි ආයතනය සිය ක්‍රීඩකයන් සහභාගී කරවීමට ඉදිරිපත් වීම ද විශේෂත්වයකි.

මෙම තරඟාවලිය වෙනුවෙන් සහභාගී වන ශ්‍රී ලංකා සංචිතය

නයිජල් රත්වත්තේ (නායක), විමුක්ති ගමගේ, ශාමික කෞෂාන්, තනුජ ජයවීර, නවීන් මාරසිංහ, තිළිණ බණ්ඩාර, නිස්රාන් නිල්ලර්, ලහිරු තිලකරත්න, දහන් වික්‍රමාරච්චි, මොහොමඩ් රිෆාන්, කවිඳු පෙරේරා, හිරන්ත පෙරේරා, ශාහිඩ් සුම්රි, ජයතු රාජරත්න, පසිඳු බණ්ඩාර, වෙනුර කෝදාගොඩ, ජනිදු ප්‍රනාන්දු, හෆීස් තබීත්, සෙනුර පෙරේරා, චතුර සොයිසා, දිනේෂ් ද සිල්වා, සුදේශ් ජයවික්‍රම, ශ්‍රීනාත් සූරියබණ්ඩාර, නිරෝෂ් පෙරේරා, තේනුක නානායක්කාර, ජනිදු දිල්ශාන්, මුර්ශිද් දොරේ, දුලාජ් නවෝද්‍ය, ධනුෂ්ක රන්ජන්, ඩිනල් ඒකනායක, පුලස්ති දසනායක, හේෂාන් ජැන්සන්, යෙහාන් බුලත්සිංහලගේ, ලසිඳු කරුණාතිලක, තරිඳු චතුරංග, ප්‍රිමේෂ් ධනුෂ්ක

අබුඩාබිහි පැවැති තුන්කොන් ක්‍රිකට් තරගාවලියේ අවසන් තරගයේදී අයර්ලන්ත ඒ පිල පරදා කඩුලු 5 ක ජයක් වාර්තා කළ ශ්‍රී ලංකා ඒ පිල එහි ශූරතාව දිනා ගැනීමට සමත් විය.

මුලින්ම පන්දුවට පහර දුන් අයර්ලන්ත ඒ පිලට පන්දු වාර 47.3 කදී රැස් කර ගත හැකි වූයේ සියලු දෙනා දැවී ලකුණු 200 ක් පමණි.

මූලික වටයේ තරග හතරම ජයගෙන තිබුණු ශ්‍රී ලංකා පිලට මෙය පහසු ඉලක්කයක් සේ පෙනුනද එක් අවස්ථාවක මුල් කඩුලු 5 ම ලකුණු 43 කට දැවී යාම නිසා තරගයේ බලාපොරොත්තු අත හරින තත්තවයක් උදා වුවද පිටියේ එක්වූ පවන් රත්නායක හා මිලාන් රත්නායක 6 වන කඩුල්ල සඳහා ලකුණු 160 ක අගනා අඛණ්ඩ සබඳතාවක් පවත්වමින් ශ්‍රී ලංකා ඒ පිලට අවසානයේ පහසු ජයග්‍රහණයක් අත් කර දුන්නේ තවත් පන්දු වාර 15.3 ක් ඉතිරිව තිබියදීය.

මිලාන් රත්නායක පන්දු 83 කදී හතරේ පහර 9 ක් හා හයේ පහර 2ක් සමග නොදැවී ලකුණු 77 ක්ද පවන් රත්නායක පන්දු 76 කදී හතරේ පහර 9 ක් හා හයේ පහර 2 ක් සමග නොදැවී ලකුණු 77 ක්ද රැස් කළෝය.

අයර්ලන්ත ඉනිමේ ලකුණු 24 කට කඩුලු 3 ක්ද බිඳ හෙලූ මිලාන් රත්නායක අවසන් තරගයේ වීරයා ලෙස නම් කෙරිණ.

තරගාවලිය පුරා පන්දුවෙන් දස්කම් දැක්වූ තරිඳු රත්නායක ලකුණු 33කට කඩුලු 4:ක් දවාලීමට සමත් විය.
මෙම තරගයේදී ශ්‍රී ලංකා ඒ පිලේ ජයග්‍රහණය සඳහා රත්නායකලා තිදෙනකුම දායක වීම විශේෂ සිද්ධියකි.

මෙම තරගාවලියේදී ශ්‍රී ලංකා ඒ පිලේ නායකත්වය සදීර සමරවික්‍රම විසින් දරනු ලැබූ අතර අවිෂ්ක ගුණවර්ධන පුහුණුකරු ලෙස කටයුතු කළේය.

විශේෂ වාර්තාකරුවකු අබුඩාබියේ සිට ..
අනුග්‍රහය ශ්‍රී ලන්කන්