MPOX වෛරසය ගෝලීය සෞඛ්‍ය හදිසි තත්ත්වයක් ලෙස ප්‍රකාශයට පත් කිරීමට ලෝක සෞඛ්‍ය සංවිධානය පියවර ගෙන තිබේ.
මධ්‍යම සහ නැගෙනහිර අප්‍රිකාවේ පැතිර යන MPOX වෛරසය පිළිබඳ ලෝකයම අවධානය යොමු කළ යුතු බව ලෝක සෞඛ්‍ය සංවිධානය පෙන්වා දෙනු ලබයි.
වෛරසය ලොවපුරා පැතිරීම වැළැක්වීමට ජාත්‍යන්තර සම්බන්ධීකරණ වැඩපිළිවෙළක් අවශ්‍ය බව ලෝක එම සංවිධානයේ ප්‍රධානී ටෙඩ්රෝස් ඇඩනොර්ම් පවසයි.
අප්‍රිකානු රෝග පාලන හා වැළැක්වීමේ මධ්‍යස්ථානය විසින් වහාම ක්‍රියාත්මක වන පරිදි, ඊයේ අප්‍රිකාව තුළ මහජන සෞඛ්‍ය හදිසි තත්ත්වයක් ද ප්‍රකාශයට පත් කළේ ය.
වසරේ මේ දක්වා කාලය තුළ අප්‍රිකානු කලාපයෙන් එම් පොක්ස් ආසාදිතයින්, 15,000කට වැඩි පිරිසක් සොයා ගෙන ඇති අතර වාර්තා වී ඇති මරණ සංඛ්‍යාව 461 කි.
1970 දශකයේදී ලොව පළමු එම් පොක්ස් අසදිතයා වාර්තා වූයේ කොංගෝ ජනරජයෙනි.
එම් පොක්ස් හෙවත් මන්කි පොක්ස් සතුන්ගෙන් මිනිසුන්ට බෝවන වෛරසයකි.
එය සමීප සම්බන්ධතා හරහා මිනිසුන් අතර ව්‍යාප්ත වේ.
උණ, මාංශ පේශි වේදනාව සහ ශරීරය පුරා ගැටිති වැනි තුවාල ඇතිවීම වෛරසයේ ප්‍රධාන රෝග ලක්ෂණ ලෙස සැලකේ.
ප්‍රතිකාර නොකළහොත්, එම් පොක්ස් වෛරසය මාරාන්තික විය හැකි ය.
2022 වසරේදී එම් පොක්ස් වෛරසයේ එක් ප්‍රභේදයක් ඕස්ට්‍රේලියාව, අමෙරිකාව සහ යුරෝපය ඇතුළු කලාපවලට පැතිරී ගියහ.
2022 වසරේ මුල සිට මේ දක්වා ලොව පුරා වාර්තා වී ඇති අදාළ එම් පොක්ස් ප්‍රභේදයේ ආසාදිතයින් සංඛ්‍යාව 10,000කට ආසන්නය.
