පසුගිය මාර්තු මස අවසන් වන විට ශ්‍රී ලංකාවේ දළ නිල සංචිත අමෙරිකානු ඩොලර් බිලියන 5 දක්වා වැඩි වී ඇතැයි ශ්‍රී ලංකා මහ බැංකුව පවසයි.

දළ නිල සංචිත වැඩිවීමට ප්‍රධාන වශයෙන් හේතුව වී ඇත්තේ ශ්‍රී ලංකා මහ බැංකුව විසින් දේශීය විදේශ විනිමය වෙළෙඳපොළෙන් විදේශ විනිමය සැලකිය යුතු ලෙස මිලදී ගැනීමයි.

එසේම උපයෝගිතා පිළිබඳ කොන්දේසිවලට යටත්ව, චීන මහජන බැංකුවේ ඩොලර් බිලියන 1.5කට සමාන හුවමාරු පහසුකම ද මෙයට ඇතුළත්ව ඇතැයි මහ බැංකුව පෙන්වා දෙයි.

මාර්තු මාසයේදී ශුද්ධ මැදිහත් වීම අමෙරිකානු ඩොලර් මිලියන 715ක් වූ අතර 2024 පළමු කාර්තුව තුළ ශුද්ධ මිලදී ගැනීම් ඩොලර් බිලියන 1.2ක් විය.

මූලාශ්‍රය – සිළුමිණ

මෙම වසරේ ලෝක ජනමාධ්‍ය නිදහස පිළිබඳ දර්ශකයේ ස්ථාන පහළොවක් පහළට පැමිණෙමින් 150 වැනි ස්ථානය හිමිකර ගැනීමට ශ්‍රී ලංකාව සමත් වී ඇත.

මෙවර දර්ශකයේදී ශ්‍රී ලංකාව ලකුණු 35.21  ක් හිමිකර ගැනීමට සමත් වූවේය.

දේශසීමා රහිත වාර්තාකරුවන්ගේ ජාත්‍යන්තර සංවිධානය විසින් අද (03) මෙම දර්ශකය එළි දක්වනු ලැබුවේය.

සෑම වසරකම එළිදැක්වෙන මෙම දර්ශකයට රටවල් 180 ක් ඇතුළත් වන අතර පසුගිය වර්ෂයේදී මෙම දර්ශකයේ 135 වෙනි ස්ථානය හිමිකර ගැනීමට ශ්‍රී ලංකාව සමත් විය.

මෙම වසරේදී ශ්‍රී ලංකාව ස්ථාන 15 ක් පහළට පැමිණීමට ආර්ථික ,සමාජීය, දේශපාලන සහ ආරක්ෂක ආදී  හේතුන් බලපා ඇතැයි දර්ශකයේ සඳහන් වේ.

(ලංකාදීප )

වතු කම්කරුවන්ට වැටුප් වැඩි වීමක් ලබා දීමට රජයට මෙන්ම වතු හාම්පුතුන්ගේ සංගමයටත් වගකීමක් තිබෙන බව ලංකා ජාතික වතු කම්කරු සංගමයේ මහ ලේකම් පාර්ලිමේන්තු මන්ත්‍රී වඩිවේල් සුරේෂ් මහතා පවසයි.

ලංකා ජාතික වතු කම්කරු සංගමයේ මහ ලේකම් පාර්ලිමේන්තු මන්ත්‍රී වඩිවෙල් සුරේෂ් මහතා මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (03) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

“සිලෝන් ටී” නාමය රැක ගනිමින් මෙරට ජාතික ආර්ථිකයට ඉහළ දායකත්වයක් ලබා දෙන වතු කම්කරුවන්ට වැටුප් වැඩි වීමක් ලබා දීමට රජයට මෙන්ම වතු හාම්පුතුන්ගේ සංගමයටත් වගකීමක් පැවරී තිබෙන බව ලංකා ජාතික වතු කම්කරු සංගමයේ මහ ලේකම් පාර්ලිමේන්තු මන්ත්‍රීවරයා පැවසීය.

මන්ත්‍රීවරයා සඳහන් කලේ, ඩොලරයේ අගය වෙනස් වීමෙන් විශාල ලාභයක් ලැබූ වතු සමාගම් සිය සේවකයන්ට වැටුප් වැඩිවීමක් ලබා නොදීම ගැන ලැජ්ජා විය යුතු බවත්, වතු කම්කරුවන්ගේ වැටුප් වැඩි කිරීම සම්බන්ධයෙන් කම්කරු කොමසාරිස් ජනරාල්වරයා නිකුත් කළ ගැසට් නිවේදනයට අනුව අදාළ වැටුප් වැඩිවීම ස්ථීර වශයෙන්ම ලබාදිය යුතු බවත්ය.

එහිදී වැඩිදුරටත් අදහස් දැක්වූ වඩිවෙල් සුරේෂ් මහතා, 

“වතු කම්කරුවන්ගේ වැටුප රුපියල් 1700 දක්වා වැඩි කිරීමට කටයුතු කිරීම පිළිබඳ ජනාධිපතිතුමාට සහ රජයට අපගේ ස්තූතිය පිරිනමනවා. නමුත් වතු හාම්පුතුන්ගේ සංගමය මීට අකුල් හෙළමින් සිටිනවා.  

ඩොලරයේ අගය වෙනස් වීමෙන් විශාල ලාභයක් ලැබූ වතු සමාගම් සිය සේවකයන්ට වැටුප් වැඩිවීමක් ලබා නොදීම ගැන ලැජ්ජා විය යුතුයි. තමන් යටතේ වැඩ කරන සේවකයන්ට, ඒ වගේම සිලෝන් ටී නාමය රැක ගනිමින් ජාතික ආර්ථිකය ශක්තිමත් කිරීමට කැපවන කම්කරු ජනතාවට වැටුප් වැඩි කිරීමක් සිදු කිරිමට ගත් තීරණයට විරුද්ධත්වය ප්‍රකාශ කිරීම කණගාටුවට කරුණක්. වතු සේවකයන්ගේ මෙම වැටුප් වැඩිකිරීම පිළිබඳ ගත් තීරණය  හදිසියේ ගත් තීන්දුවක් නොවෙයි. වසරක් පුරා කම්කරු දෙපාර්තමේන්තුව, වෘත්තීය සමිති සහ අදාළ පාර්ශ්වයන් සමග සිදු කළ සාකච්ඡා වට කිහිපයකින් පසුවයි එම තීරණය ගනු ලැබුවේ. 

හාම්පුතුන්ගේ සම්මේලනය වැටුප් නියම කිරීමේ කවුන්සිලයේ පැවති සාකච්ඡාවලට සහභාගි වීම දිගින් දිගටම මඟ හරිමින් සිටියා. රුපියල් 1000ක වැටුප් වැඩිවීමක් ඉල්ලූ අවස්ථාවේ දී ද හාම්පුතුන්ගේ සංගමය මුනිවත රකිමින් සිටියා. නමුත් කම්කරු කොමසාරිස් ජනරාල්වරයා සිය බලය යොදා ගනිමින් රුපියල් 1700ක වැටුප් වැඩිවීමක් සඳහා නීත්‍යානුකූලව ගැසට් නිවේදනයක් නිකුත් කළා. ඩොලරයේ අගය වෙනස් වීමත් සමඟ ජනතාවට සහන නොදී වතු සමාගම් කකුලෙන් ඇදීම අසාධාරණයි.

රජයට වගේම වතු හාම්පුතුන්ගේ සංගමයටත් මේ පිළිබඳ වගකීමක් පැවරි තිබෙනවා. ඒ නිසා සමාගම්වලට ආණ්ඩුවේ තීරණවලට විරුද්ධව යන්න බැහැ. වතු සමාගම් පවසන්නේ අවසන් තීරණය සඳහා ඉහළ මට්ටමේ කමිටුව සමඟ සාකච්ඡා කරමින් සිටින බවයි. නමුත් සම්පූර්ණ වතු සමාගම් 22 ම අයිති පුද්ගලයින් පස් දෙනෙකුටයි. ඔවුන් තේ වතු ක්ෂේත්‍රයේ පමණක් නොව සංචාරක ව්‍යාපාරය, කුඩා පරිමාණ නිෂ්පාදන, කෘෂිකර්මාන්තය සහ මැණික් වැනි ක්ෂේත්‍රවල ද නිරත වනවා. ඒ වගේම වතු කම්කරුවන් සහ වෘත්තීය සමිති එක්ව මෙම වැටුප් වැඩිවීම වෙනුවෙන් පෙනී සිටිය යුතුයි.”

( ජනාධිපති මාධ්‍ය අංශය )