2023 අධ්‍යයන පොදු සහතික පත්‍ර සාමාන්‍ය පෙළ විභාගය අද (06) ආරම්භ වේ.

විභාගය අද( 6) සිට 15 දා දක්වා දිවයින පුරා විභාග මධ්‍යස්ථාන 3527 කදී පැවැත්වීමට නියමිතය.

මෙවර  අයදුම්කරුවන් 452, 979 දෙනෙකු විභාගය සඳහා පෙනී සිටීමට නියමිත බව විභාග දෙපාර්තමේන්තුව සඳහන් කරයි. ඊට පාසල් අයදුම්කරුවන් තුන් ලක්ෂ 87, 648ක් සහ පෞද්ගලික අයදුම්කරුවන් 65,331 දෙනෙකු ඇතුළත් වේ.

මේ දින­යන්හි ඇතැම් ප්‍රදේ­ශ­ව­ලට ඇති වන වර්ෂා තත්ත්ව­යත් සමඟ හදිසි ආපදා තත්ත්ව­යන් ඇති වුව­හොත් ඒ සඳහා අවශ්‍ය කට­යුතු ද සිදු කිරී­මට ද සැල­සුම් කර ඇති බව  විභාග දෙපාර්තමේන්තුව වැඩිදුරටත් සඳහන් කරයි.

විභාග කොමසාරිස් ජනරාල්වරයා සඳහන් කරන්නේ, වර්ෂාව නිසා කිසි­යම් සිසු­ව­කුට විභා­ගය පව­ත්වන මධ්­ස්ථා­නය වෙත ළඟා වීමට අප­හ­සු­තා­වක් ඇති වුව­හොත් 117 ක්ෂණික දුර­ක­තන අංකය අමතා ඒ බව දැනුම් දිය හැකි බවය.

ජනාධිපති රනිල් වික්‍රමසිංහ මහතා විසින් පාර්ලිමේන්තුවට ඉදිරිපත් කිරීමට නියමිත ජාත්‍යන්තර මූල්‍ය අරමුදල සමග ඇතිකරගත් එකඟතාවලට සහාය ලබාදීම හා රටේ ශීඝ්‍ර සංවර්ධනයට අදාළ නීතිරීති ඇතුළත් කෙටුම්පතට විපක්ෂයේ මන්ත්‍රිවරු පහළොස් දෙනකු පමණ සහාය දීමට සූදානමින් සිටින බව වාර්තා වේ.

ජාත්‍යන්තර මූල්‍ය අරමුදල සමග ඇතිකරගත් එකඟතාවලට සහාය ලබාදීම සහ රටේ ශීඝ්‍ර සංවර්ධනයට අදාළ නීතිරීති ඇතුළත් මෙම කෙටුම්පත ජනාධිපති රනිල් වික්‍රමසිංහ මහතා විසින් ලබන 8 වැනිදා පාර්ලිමේන්තුවට ඉදිරිපත් කිරීමට නියමිතය.

මාලිගාවත්තේදී පැවැති එක්සත් ජාතික පක්ෂ‍ මැයි දින සැමරුම් උළෙලේදී ද ජනාධිපති රනිල් වික්‍රමසිංහ මේ සම්බන්ධයෙන් කරුණු ඉදිරිපත් කළ අතර එයට සහාය දෙන්නැයි සමගි ජන බලවේගය සහ ජාතික ජන බලවේගයට ආරාධනා කළේය.

විපක්ෂය මෙයට විරුද්ධ වුවද එයට සහාය ලබාගැනීමේ අරමුණෙන් විපක්ෂයේ මන්ත්‍රිවරු සමග ආණ්ඩුවේ මන්ත්‍රිවරු සාකච්ඡා කර තිබිණි. ඒ අනුව මෙය ජාතික වශයෙන් වැදගත් කෙටුම්පතක් ලෙස සලකා එයට කැමැත්ත පළකිරීමට විපක්ෂයේ මන්ත්‍රිවරු 10ත් 15ත් අතර පිරිසක් සූදානමින් සිටින බව වාර්තා වේ. 

එම මන්ත්‍රිවරු පසුගියදා ජනාධිපති රනිල් වික්‍රමසිංහ මහතා සමගද සාකච්ඡා කර ඇත. 

මේ පිරිස ඉකුත් මැයි 1 වැනිදා පැවැති එක්සත් ජාතික පක්ෂ රැළියට එක්වීමට සූදානමින් සිටියද එය ජනාධිපතිවරයා විසින් වළක්වා තිබිණි. 

කෙසේ වෙතත් කෙටුම්පත පාර්ලිමේන්තුවට ඉදිරිපත් කරන අවස්ථාවේ එයට සහාය දීමට බලාපොරොත්තුවෙන් සිටින බව වාර්තා වේ.

සමගි ජන බලවේගයේ මන්ත්‍රිවරුන් 15ක් පමණ දැඩි තීරණයක සිටින බව පාර්ලිමේන්තු මන්ත්‍රිනී තලතා අතුකෝරාළ මහත්මිය මීට දෙසතියකට පමණ ඉහතදී මාධ්‍ය වෙත කියා තිබුණි. 

තලතා අතුකෝරාළ, රාජිත සේනාරත්න, රිෂාඩ් බදියුදීන්, රවුෆ් හකීම් ඇතුළු මන්ත්‍රිවරු රැසක් මෙවර සමගි ජන බලවේගයේ මැයි රැළියටද එක්ව නොසිටීමද කැපී පෙනුණි.

ආර්ථික ප්‍රශ්න හේතුවෙන් මවුපියන් තම බිළිඳු දරුවන් වෙනත් පුද්ගලයන්ට හට දරුකමට හදා ගැනීම සඳහා ලබාදීම වැඩි වී ඇති බව තොරතුරු රෙජිස්ට්‍රාර් දෙපාර්තමේන්තු වාර්තා වලින් හෙළි වී ඇත.

ඉන් සැලකිය යුතු දරු පිරිසක් ලබාදි ඇත්තේ විදේශිකයන්ටය.

සාමාන්‍යයෙන් වසරක් තුළ දරුවන් 1700ක් පමණ එසේ දරුකමට හදා ගැනීම ලබා දෙන බව රෙජිස්ට්‍රාර් දෙපාර්තමේන්තුවේ ජ්‍යෙෂ්ඨ නියෝජ්‍ය රෙජිස්ට්‍රාර් ජනරාල් (සිවිල් ලියාපදිංචි කිරීම්) නීතිඥ ලක්ෂිකා  ගනේපොළ මහත්මිය පවසයි.

ආර්ථික ප්‍රශ්න, අනියම් සබඳතා වැනි සමාජීය ප්‍රශ්න මේ සඳහා හේතු වී ඇති බව සමාජ විද්‍යාඥයෝ පෙන්වා දෙති.

එසේම රටේ ගබ්සා කිරීම්ද සැලකිය යුතු ලෙස වැඩිවී ඇති බව පොලිස් ආරංචි මාර්ග සඳහන් කරයි.

 මුලාශ්‍රය – දිවයින