Connect with us

පුවත්

ණය ප්‍රශස්තකරණය ගැන ඇත්ත ජනතාවට පැහැදිලි කරන්නැයි ජනපති ඉල්ලයි

Published

on

දේශීය ණය ප්‍රශස්තකරණය පිළිබඳ සත්‍ය තත්ත්වය ජනතාව හමුවේ තැබීමේ සුවිශේෂ කාර්යභාරයක් ව්‍යාපාරික ප්‍රජාවට සහ වෘත්තීය සමිති නියෝජිතයින් වෙත පැවරී තිබෙන බව ජනාධිපති රනිල් වික්‍රමසිංහ මහතා පැවසීය.

සැබෑ තත්ත්වය පැහැදිළි කිරීමෙන් ණය ප්‍රශස්තකරණය පිළිබඳ මෙරට ශ්‍රම බලකාය මෙන්ම සමස්ත ජනතාව තුළ ඇති අනවබෝධය සහ අනිසි බිය දුරු කළ හැකි බව ද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ මහතා මේ බව සඳහන් කළේ දේශීය ණය ප්‍රශස්තකරණය පිළිබඳ වාණිජ මණ්ඩල සාමාජිකයින්, ව්‍යාපාරික ප්‍රජාව සහ වෘත්තීය සමිති නියෝජිතයින් සමඟ ඊයේ (29) ජනාධිපති කාර්යාලයේ පැවති සාකච්ඡා දෙකකට එක් වෙමිනි.

පළමුව වාණිජ මණ්ඩල සාමාජිකයන් සහ ව්‍යාපාරික ප්‍රජාව සමග හමුවකට එක් වූ ජනාධිපතිවරයා පෙන්වා දුන්නේ මෙම ණය ප්‍රශස්තකරණ වැඩපිළිවෙළ තුළින් පොලී අනුපාත අඩුවීමක් සිදුවන නිසා මූල්‍ය බැඳීම්වලින් දැඩි බලපෑමට ලක් වූ පුද්ගලයන්ට සහනයක් හිමිවන බවයි.

පොලී අනුපාත අඩුවීමේ කාලසීමාව නිශ්චිතව සඳහන් කළ නොහැකි වුවත් මාස කිහිපයක් තුළ පොලී අනුපාතවල කැපී පෙනෙන අඩුවීමක් පිළිබඳ විශේෂඥයන් පුරෝකථනය කර ඇති  බවද ජනාධිපති රනිල් වික්‍රමසිංහ මහතා සඳහන් කළේය.

අනතුරුව වෘත්තීය සමිති නියෝජිතයන් සමඟ පැවති හමුවේදී ජනාධිපති රනිල් වික්‍රමසිංහ මහතා සඳහන් කළේ මෙම දේශීය ණය ප්‍රශස්තකරණ වැඩසටහන සිදු නොකළහොත් කුඩා ව්‍යාපාර මගින් ලබාගත් ණය සඳහා ගෙවිය යුතු පොළි අනුපාත නැවත වැඩි විය හැකි අවදානමක් ඇති බවයි.

එසේම රුපියල ශක්තිමත් වී තිබෙන මෙවැනි අවස්ථාවක ඩොලරය යළිත් ඉහළ යෑමේ අනතුරුදායක තත්ත්වයක් පවතින බව පැවසු ජනාධිපතිවරයා විදේශීය ණය ප්‍රශස්තකරණයට සමගාමීව දේශීය ණය ප්‍රශස්තකරණය ද අනිවාර්යයෙන්ම සිදුකළ යුතු බව පෙන්වා දුන්නේය.

සේවක අර්ථසාධක අරමුදල යටතේ ප්‍රතිලාභීන්ට ලබාදෙන 9%ක වාර්ෂික පොළිය ඒ ආකාරයෙන්ම ලබාදෙන බව නීතියෙන් සහතික කරන බවත්, එබැවින් ඉදිරියේදී ලැබෙන ප්‍රතිලාභ සම්බන්ධයෙන් කිසිදු අවිශ්වාසයක් ඇති කරගත යුතු නැති බවත් වෘත්තීය සමිති නියෝජිතයින් අමතමින් ජනාධිපතිවරයා වැඩිදුරටත් කීය.

දේශීය ණය ප්‍රශස්තකරණය කිරීමත් සමඟ සංවර්ධන ආධාර මෙරටට ලැබෙන බවත්, එමඟින් ඉදිකිරීම් ක්ෂේත්‍රය ඇතුළු පසුගිය සමයේ අඩාල වී තිබූ අනෙකුත් සංවර්ධන කටයුතු යළි ආරම්භ කිරීමට හැකිවන බවත් පැවසු ජනාධිපති රනිල් වික්‍රමසිංහ මහතා ඒ ඔස්සේ ඇතිවන ආර්ථික ප්‍රබෝධය තුළ නව රැකියා අවස්ථාව රැසක් ද බිහිවන බව කියා සිටියේය.

මෙහිදී අදහස් දැක්වූ මහබැංකු අධිපති ආචාර්ය නන්දලාල් වීරසිංහ මහතා

බැංකු තැන්පතුවලට බලපෑම් එල්ල වන බව පවසමින් සිදුකළ ප්‍රචාරයන් නිසා සමාජය තුළ යම් කණස්සල්ලක් පැවතුණා. නමුත් අපගේ සාකච්ඡාවලදී  අප අවධානයට ලක්කළ ප්‍රමුඛතම කාර්යක් තමයි බැංකු පද්ධතියේ ස්ථායීතාවය පවත්වා ගැනීම. දෙවැන්න සියලුම බැංකු තැන්පතු ආරක්ෂා කිරීම. බැංකු පද්ධතිය සම්බන්ධයෙන් ඇති කරන අනිසි බිය විශ්‍රාමික අරමුදල්වලට සාපේක්ෂව විශාල සමාජීය බලපෑමක් ඇති කළ හැකියි. එබැවින් ඉතා සාධාරණ විසඳුමක් අප ඉදිරිපත් කර තිබෙනවා.

බැංකු විසින් දැනටමත් 50%ක් බදු ලෙස ගෙවමින් සහ ණය සහන ලබාදෙමින් මහා භාණ්ඩාගාරයට මෙන්ම පොදුවේ සමස්ත ආර්ථිකයට විශාල දායකත්වයක් ලබා දී තිබෙනවා. එහි ප්‍රතිඵලයක් වශයෙන්, බැංකු පද්ධතිය හෝ තැන්පතු ලබා ගන්නා ආයතන සතු භාණ්ඩාගාර බැඳුම්කර ප්‍රතිව්‍යුහගත කිරීමෙන් බැහැර කිරීමට අප කටයුතු කළා. භාණ්ඩාගාර බිල්පත්වලට ද කිසිදු බලපෑමක් සිදු වන්නේ නැහැ. සිදු වන්නේ භාණ්ඩාගාර බිල්පත් ප්‍රතිව්‍යුහගත කිරීමයි. ඒ වගේම විශ්‍රාම අරමුදල් සම්බන්ධයෙන් සාධාරණ විසඳුමක් ලබා දී තිබෙනවා.

එහිදී සෑම වසරකම ඒවායේ ප්‍රතිලාභීන්ට 9%ක පොලියක් ලබාදීම  සහතික කරනවා. වත්මන් ශේෂය ආරක්ෂා වන අතර ශේෂයේ අඩුකිරීමක් ද සිදුවන්නේ නැහැ. තවද එම භාණ්ඩාගාර බැඳුම්කර ප්‍රතිව්‍යුහගත කර නව බැඳුම්කර සඳහා හුවමාරු වනු ඇතියි. එය ලබන අඟහරුවාදා උදෑසන පළමු වැඩ කරන දිනයේ දියත් කෙරෙනවා. ඒ පිළිබඳ පූර්ව දැනුම්දීමක් සිදුකරන අතර එතැන් සිට එය කඩඉම් දිනය වනු ඇතියි.

ඊ පී එෆ්, ඊ ටී එෆ් (EPF, ETF)  ඇතුළුව සියලුම විශ්‍රාම අරමුදල් (superannuation) සතු ඕනෑම බැඳුම්කරයක් හුවමාරු කරනු ලබනවා. පුද්ගලික අංශයේ විශ්‍රාම අරමුදල් ගණනාවක් තිබෙනවා. ඒවා ප්‍රතිව්‍යුහගත කරනවා. බැංකු ක්ෂේත්‍රය බදු වශයෙන් 50% ක් මහා භාණ්ඩාගාරයට ගෙවන විට ඊට සාපේක්ෂව විශ්‍රාම අරමුදල් මගින් බදු ගෙවීම සිදු කරන්නේ 14%ක් පමණයි. එසේ වුවත්, ඔවුන් මෙම බැඳුම්කර හුවමාරුවට සහභාගී වුවහොත් එම 14% අඛණ්ඩව භුක්ති විඳීමට අවස්ථාව හිමි වෙනවා.  එසේ නොමැති නම්, ඔවුන්ට ඉහළ බදු අනුපාත සඳහා යාමට විකල්පයක් තිබෙනවා. එසේ වුවහොත් ඔවුන්ට එය අවාසිදායකයි.

එබැවින් ඔවුන්ගේ තේරීම කුමක් දැයි තීරණය කිරීම විශ්‍රාම (superannuation) අරමුදල් වෙත පැවරෙනවා. එම තේරීම අප වෙත දන්වනු  ඇතැයි අප අපේක්ෂා කරන අතර ජූලි මාසය තුළ බැඳුම්කර හුවමාරුව අවසන් කරනවා. එවිට ඔවුන්ගේ ද්‍රවශීලතාවයෙන් රජයට ලොකු සහනයක් ලැබෙනවා. තවද ප්‍රධාන මෙවලම වන්නේ බැඳුම්කර හුවමාරුවේදී වසර පහක සහන කාලයක් පැවතීම සහ එම කාලය තුළ විනිමය බැඳුම්කර සඳහා පමණක් පොලී ගෙවනු ලැබීමයි. එහි කල්පිරීම  2032 සිට 2038 දක්වා ආරම්භ වෙනවා. ඉන්පසු ක්‍රමානුකූලව, වාර්ෂික පදනම මත කල්පිරීම සිදු වනු ඇතියි.

මහ බැංකුව වශයෙන් අපගේ මැදිහත්වීම සහ උනන්දුව වන්නේ එක් පැත්තකින් මූල්‍ය ස්ථාවරත්වය, බැංකු පද්ධතිය සහ තැන්පතු ආරක්ෂා කිරීමටයි. අනෙක් පැත්තෙන්, සේවක අර්ථසාධක අරමුදලේ භාරකරු, ලෙස අපට අවශ්‍ය වූයේ ඊ පී එෆ් (EPF) සාමාජිකයන් සහ විශ්‍රාමික අරමුදල් සඳහා හොඳම, ප්‍රශස්ත ගනුදෙනුව ලබා ගැනීමයි. මෙය පාර්ලිමේන්තුවට ඉදිරිපත් කර කාරක සභා අවස්ථාවේදී සාකච්ඡා කිරීමට බලාපොරොත්තු වෙනවා. ඉන්පසු සෙනසුරාදා එය පාර්ලිමේන්තුව විසින් අනුමත කරනු ඇතැයි බලාපොරොත්තු වෙනවා.

ශ්‍රී ලංකා ව්‍යාපාරිකයන්ගේ සංගමයේ  සභාපති බිංගුමාල් තේවරතන්ති මහතා

දේශීය ණය ප්‍රශස්තකරණය සඳහා බැංකු ඇතුළත් නොකිරීම පිළිබඳව අප සංගමය සතුටට පත් වෙනවා. එය දෙස බලන විට වැටහෙන්නේ මෙම තිබෙන  යෝජනාව සමඟ අපට දළ මූල්‍ය අවශ්‍යතා  (GFN)  ඉලක්ක කරා ළඟා විය හැකි බවයි. එය තීරණාත්මක සාධකයක්.

තවද මෙය මුදල් පිටතට ගලා යාමේ දෘෂ්ටිකෝණයෙන් බැලුවොත් විශාල සහනයක් වෙනවා. මම දකින විදිය අනුව ආදායම් පැත්තෙන් සහ වියදම් පැත්තෙන් ගත්තත්, දේශීය ණය සඳහා පොලී ගෙවීම සම්බන්ධයෙන් රජය තවමත් දැඩි සැලකිල්ලක් දක්වන බව පෙනෙනවා.

ඒ වගේම රාජ්‍ය ආදායම් වැඩි කිරීම සම්බන්ධ කාරණයේදී රජයට තවත් තීරණාත්මක පියවර වෙත යොමුවීමට සිදු වෙනවා. විශේෂයෙන් බදු ලිපිගොනු ප්‍රමාණය වැඩි කිරීමට සිදු වෙනවා. දැනට තියෙන බදු පදනම සමඟ අපේක්ෂිත ඉලක්කවලට යාමට හැකි වෙයි කියා මම විශ්වාස කරන්නේ නැහැ.

ලංකා වාණිජ මණ්ඩලයේ සභාපති විශ් ගෝවින්දසාමි  මහතා

පුද්ගලික අංශයේ මෙන්ම ලංකා වාණිජ මණ්ඩලය පැත්තෙන්, මම හිතන්නේ මෙම ගෙන ඇති පියවර බැංකු පද්ධතිය ආරක්ෂා කිරීම සදහා ගෙන ඇති සුදුසුම පියවර කියලයි. එසේ නොවුණා නම් මෙම අර්බුදකාරී ආර්ථික තත්ත්වය තුළ බැංකු පද්ධතියත් අභියෝගයට ලක් වෙනවා. ඒ වගේම තවත් ප්‍රශ්නවලට මුහුණදීමට සිදු වෙනවා.

මෙතැන් සිට බැංකු මගින්  පුද්ගලික අංශයට ලාභදායී අරමුදල් ලබා දීමට අවකාශ ඇතිවෙයි කියා මම විශ්වාස කරනවා. මෙතෙක් කල් එය සිදුව නැහැ. නමුත් අපි මින් ඉදිරියට එය සිදුවනු ඇති බව බලාපොරොත්තු වෙනවා. එසේ වුවහොත්ආයෝජන අඛණ්ඩව කරගෙන යා හැකියි. මම හිතන්නේ පසුගිය මාස 18 සිට 24 දක්වා කාලය තුළ සියල්ල ඇණහිට තිබෙනවා. එබැවින් ආර්ථිකය ඉදිරියට යාමට නම් පෞද්ගලික අංශයට  වඩා ලාභදායී අරමුදල් අවශ්‍ය වෙනවා.

ඒකාබද්ධ ඇඟලුම් සංගම් සංසදයේ සභාපති ශරාඩ් අමලීන් මහතා

රට තුළ තිබූ තත්ත්වය පාලනය කිරීමට හැකි වීම පිළිබඳ  මම රජයට සුබ පතනවා. එය සැබැවින්ම විශාල සහනයක්.  මෙම ශාලාවට ඇතුළු වන අවස්ථාවේ   ඔබතුමා දකින්න ඇති සියළු දෙනාගේම මූණුවල තිබූ හිනාව. ඒ වගේම අප ඔබෙන් ඇසිය යුතු ප්‍රශ්නය වන්නේ රජය ගෙන ඇති මෙම පියවරවලට අප සහාය වන්නේ කෙසේද යන්නයි.

ලංකා වාණිජ මණ්ඩලයේ  මහලේකම් / ප්‍රධාන විධායක නිලධාරී, බුවනෙකබාහු පෙරේරා

මූලික වශයෙන් අප දැනට සිදු කරන පොලී ගෙවීම්වල ප්‍රාග්ධනය සඳහා යම් සහනයක් ලබා දීම නිසැකවම ආයෝජනය ප්‍රවර්ධනයට වගේම පෞද්ගලික අංශයේ අඛණ්ඩ පැවැත්මට පිටිවහලක් බව කිවයුතුයි. මන්ද මේ වන විට කුඩා හා මධ්‍ය පරිමාණ මෙන්ම විශාල පෞද්ගලික ව්‍යාපාර වසා දමා වෙනත් වෙනත් වෙළෙඳපොල වෙත අවධානය යොමු කරමින් සිටිනවා. නමුත් අප ඒවා මෙරටේම තබා ගැනීමට ප්‍රයත්න දැරිය යුතුයි. ඒ මොකද මෙම ඇතැම් සමාගම් වසර තිහක් හතළියක් වැනි දීර්ඝ කාලයක් තිස්සේ මෙරට ව්‍යාපාර කටයුතුවල නිරත වූ නිසා. එබැවින් ඔවුන් සම්බන්ධයෙන් විසඳුමක් සෙවිය යුතුයි.

ඉදිරි මාස කිහිපය තුළ ලංවිම ප්‍රතිව්‍යුහගත කිරීම මූලික වශයෙන් කළ යුතුයි. අඩුම තරමින් පුද්ගලික අංශයට ජාත්‍යන්තර වශයෙන් තරඟකාරී ආකාරයකට තම ව්‍යාපාරය දැරිය හැකි මිලකට කරගෙන යාමට යම් සහනයක් ලබා දිය යුතුයි.

වෘත්තීය සමිති නායකයන් සහ නියෝජිතයන් ද මෙහිදී  අදහස් දැක්වූ අතර මෙරට වැඩකරන ජනතාව ආරක්ෂා කරමින් ණය ප්‍රශස්තකරණ වැඩසටහන ක්‍රියාවට නැංවීම පිළිබඳව ඔව්හු සිය ප්‍රසාදය පළ කළහ.
අග්‍රාමාත්‍ය දිනේෂ් ගුණවර්ධන, කම්කරු හා විදේශ රැකියා අමාත්‍ය මනුෂ නානායක්කාර, මුදල් රාජ්‍ය ආමාත්‍ය ෂෙහාන් සේමසිංහ, පාර්ලිමේන්තු මන්ත්‍රීවරුන් වන සිසිර ජයකොඩි, ගාමිණී ලොකුගේ,  වඩිවෙල් සුරේශ්, ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානී සාගල රත්නායක, ජනාධිපති ලේකම් සමන් ඒකනායක,ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්. එච්. එස්. සමරතුංග, අග්‍රාමාත්‍ය ලේකම් අනුර දිසානායක, ජනාධිපති වෘත්තීය සමිති අධ්‍යක්ෂ ජනරාල් සමන් රත්නප්‍රිය යන මහත්වරුන් ද මෙම අවස්ථාවට එක්ව සිටියහ.

(ජනාධිපති මාධ්‍ය අංශය)

පුවත්

වැසි තත්ත්වය සමඟ නායයෑම් සහ ගංවතුර ගැන අනතුරු ඇඟවීම්

Published

on

By

පවතින අයහපත් කාලගුණ තත්ත්වය හේතුවෙන් ප්‍රදේශ කිහිපයක ගංවතුර අවදානමක් මතුවිය හැකි බව වාරිමාර්ග දෙපාර්මේතන්තුව පවසයි.

ඒ අනුව දැදුරු ඔය, මහ ඔය, අත්තනගලු ඔය, කැලණි ගඟ, බෙන්තර ගඟ, ගිං ගඟ, නිල්වලා ගඟ, කිරම ඔය, ඌරු බොකු ඔය, කලා ඔය, මහවැලි ගඟ, මල්වතු ඔය ද්‍රෝණි ආශ්‍රිත පහත් බිම් ගංවතුර අවධානමකට ලක්විය හැකි බව දැනුම්දී තිබේ.

අධික වැසි සහිත කාලගුණ තත්ත්වය ඉදිරි දින කිහිපයේදීත් ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

මේ අතර රජරට ප්‍රදේශයට ඇදහැලෙන අධික වර්ෂාවත් සමග රාජාංගනය ජලාශයේ ජල මට්ටම අඩි 31ක් දක්වා ඉහළ ගොස් ඇති අතර ඒ හේතුවෙන් රාජාංගනය ජලාශයේ වාන් දොරටු 4ක් විවෘත කර ඇති අතර ඉන් තත්පරයට ඝණ අඩි 2,100 බැගින් ජලය මුදා හැරේ.

අංගමුව ජලාශයේ වාන් දොරටු දෙක ද විවෘත කර ඇති අතර ඒ හේතුවෙන් පහත් බිම්වල වෙසෙන ජනතාවට ඒ පිළිබඳව අවධානයෙන් පසුවන ලෙස ජලාශ භාර ඉංජිනේරුවන් ඉල්ලා සිටී.

මේ අතර, පසුගිය දින කිහිපයේදී ඇල්ල ප්‍රදේශයට ඇදහැලුණු අධික වර්ෂාවත් සමග සක්‍රීය වූ කරඳගොල්ල මලිත්තගොල්ල ප්‍රදේශයේ නායයාම් තත්ත්වය තවදුරටත් වර්ධනය වෙමින් පවතී.

අවස්ථා කිහිපයකදීම පස් කඳු කඩාවැටීම හා ගල් පෙරළීම් වාර්තා වූ ඇල්ල වැල්ලවාය මාර්ගය ඊයේ (17) රාත්‍රියේ ද රථ වාහනයට වසා දැමීම සිදුවිය.මාර්ගය යළි විවෘත කෙරුණේ අද (18) පෙරවරු 6.00 ටය.

කෙසේවෙතත් මෙම මාර්ගයට අධික ලෙස රොන් මඩ ගලා ඒමක් නිරීක්ෂණය වෙයි.මේ හේතුවෙන් නිරන්තරයෙන් මාර්ගයට ගලා එන මඩ සහ පස් ඉවත්කිරීමට මාර්ග සංවර්ධන අධිකාරිය කටයුතු කරමින් සිටී.

පවතින තත්ත්වය සැලකිල්ලට ගනිමින් තද වැසි පවතින අවසථාවලදී මාර්ගය තාවකාලිකව වසා දැමීම, අනතුරු හැඟවීමට මාර්ගයේ සංඥාකරුවන් යොදවා රථවාහන ධාවනය කිරීමට සැලැස්වීම, රාත්‍රී කාලවලදී විදුලි පහන් සවිකර අනතුරුදායක ස්ථානය ආලෝකමත් කිරීමට කටයුතු කිරීම ඇතුළු පියවර අනුගමනය කරන ලෙස කාලගුණ විද්‍යා දෙපාර්තමේන්තුව අදාළ අංශ වෙත උපදෙස් ලබාදී තිබේ.

Continue Reading

පුවත්

ශ්‍රී ලංකා රජයට ප්‍රසිද්ධියේ සමාව ගන්නා ලෙස  දැනුම්දෙයි

Published

on

By

දශක ගණනාවක් පුරාවට අතුරුදන් කිරීමට ලක්වූ දහස් ගණනකගේ ඉරණම පිළිබඳව සහ ඔවුන් සිටින ස්ථාන හෙළි කිරීමටත් එම අපරාධවලට වගකිව යුත්තන්ට දඬුවම් පැනවීමටත් ශ්‍රී ලංකා රජය අර්ථාන්විත පියවර අනුගමනය කළ යුතු බවට එක්සත් ජාතීන්ගේ මානව හිමිකම් කොමිසම ඊයේ (17) වාර්තාවක් නිකුත් කරමින් දන්වා තිබේ.

එහි වැඩිදුරටත් දැක්වෙන්නේ, එම අපරාධ සඳහා රාජ්‍ය ආරක්ෂක අංශවල සහ අනුබද්ධ සන්නද්ධ කණ්ඩායම්වල මැදිහත්වීම පිළිගෙන ප්‍රසිද්ධියේ සමාව අයැද සිටිය යුතු බවය.

අතුරුදන් කිරීම්වලට ලක්වූ සියලුම ශ්‍රී ලාංකිකයින් කිසිදා අමතක නොකළ යුතු බවට මෙම වාර්තා මගින් යළිත් සිහිකැඳවන බව එක්සත් ජාතීන්ගේ මානව හිමිකම් පිළිබඳ මහකොමසාරිස් වෝල්කර් ටර්ක් මහතා පවසයි.

බොහෝ කාලයක සිටි අතුරුදන් කිරීම්වලට ලක්වූවන් පිළිබඳව තොරතුරු දැනගැනීමට බලා සිටින ඥාතීන්ට සත්‍ය දැනගැනීමේ අයිතියක් පවතින බවත් අතුරුදන් කිරීම්වලට ලක් වූවන්ට රජය ණයගැති බවත් වෝල්කර් ටර්ක් මහතා එම වාර්තාව හරහා දන්වා තිබේ.

මෙවැනි අපරාධ ඒවාට මුහුණ දුන් පිරිසට පමණක් නොව සමාජයක් ලෙස සමස්ත ශ්‍රී ලාංකීය ප්‍රජාවටම කම්පනය දනවන සුළු බව වාර්තාවේ දැක්වෙයි.

අතුරුදන් කිරීම්වලින් සියලුම පුද්ගලයින් ආරක්ෂා කිරීම සඳහා වූ ජාත්‍යන්තර සම්මුතිය අනුමත කිරීම වැනි ධනාත්මක පියවර අනුගමනය කර තිබුණත් ඒක පුද්ගල අතුරුදන්වීම් පිළිබඳව විමර්ශන කිරීම් සීමිත බව එක්සත් ජාතීන්ගේ මානව හිමිකම් කොමිසමේ වාර්තාවේ අවධාරණය කර ඇත.

අතුරුදන් කිරීම්වලට ලක්වූවන් පිළිබඳව සෑම තොරතුරක්ම අනාවරණය වන තෙක් විමර්ශන සිදුකිරීමට රජය බැඳී සිටින බවට වන ජාත්‍යන්තර නීතිය දිගින් දිගටම උල්ලංඝනය වෙමින් පවතින බව එක්සත් ජාතීන්ගේ මානව හිමිකම් කොමිසමේ මතය බව සඳහන් ය.

සිවිල් යුද්ධය අවසන් වී වසර 15ක් ගතවී තිබුණත්, අතුරුදන් කිරීමේ පළමු රැල්ල ආරම්භ වී දශක ගණනාවක් ගතවී තිබුණත්, එම ප්‍රචණ්ඩ ක්‍රියාවලට වගවීම තහවුරු කිරීමට ශ්‍රී ලංකා බලධාරීන් අපොහොසත් වී ඇති බව වාර්තාවේ දැක්වෙයි.

ඒ අනුව එක්සත් ජාතීන්ගේ මානව හිමිකම් පිළිබඳ කොමිසම අවධාරණය කරන්නේ දශක ගණනාවක් පුරා සිදුවූ අතුරුදන් කිරීම් සම්බන්ධයෙන් ශ්‍රී ලංකාව වගවීම සහතික කළ යුතු බවය.

Continue Reading

පුවත්

මුහුදුබඩ ප්‍රදේශවලට අනතුරු ඇඟවීමක්

Published

on

By

කල්පිටියේ සිට කොළඹ, ගාල්ල සහ හම්බන්තොට හරහා පොතුවිල් දක්වා වන මුහුදු ප්‍රදේශ සඳහා තද වැසි, තද සුළං සහ රළු මුහුදු පිළිබඳව අවවාදාත්මක නිවේදනයක් නිකුත් කර ඇත.

ඒ අනුව බේරුවල සිට ගාල්ල හරහා හම්බන්‍තොට දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය විටින් විට පැ.කි.මී 60 -70 දක්වා වැඩිවන අතර එම මුහුදු ප්‍රදේශ විටින් විට ඉතා රළු වන බව එම නිවේදනයේ සඳහන්ය.

කල්පිටිය සිට කොළඹ හරහා ‍බේරුවල දක්වා සහ හම්බන්තොට සිට පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළගේ වේගය විටින් විට පැ.කි.මී 50 -60 දක්වා වැඩි වන අතර එම මුහුද විටින් විට රළු වන බවයි වාර්තා වේ.

Continue Reading
Advertisement

Trending

Copyright © 2023 Sri Lanka Mirror. All Rights Reserved