ඡායාරූප සටහන
“BRI සහයෝගීතාවයේ පදනම එක්ව සැලසුම් කිරීම, ගොඩනැගීම හා ප්‍රතිලාභ ලබා ගැනීමයි”
‘එක් තීරයක් එක් මාවතක්’ සහයෝගීතාවය පදනම් වී ඇත්තේ “එක්ව සැලසුම් කිරීම, එක්ව ගොඩනැගීම සහ එක්ව ප්‍රතිලාභ ලබා ගැනීම” යන මූලධර්මය මත බව චීන ජනාධිපති ෂී ජින්පිං මහතා පවසයි.
චීනයට සාර්ථක විය හැක්කේ ලෝකය හොඳින් ක්‍රියාත්මක වන විට පමණි. චීනය හොඳින් ක්‍රියාත්මක වන විට ලෝකය තවත් යහපත් වනු ඇත,” යැයි ඔහු පැවසීය.
චීන ජනපතිවරයා මෙසේ පැවසුවේ අද (18) පෙරවරුවේ බෙයිජිං හි මහජන මහා ශාලාවේදී ආරම්භ වූ තෙවැනි ‘එක් තීරයක් එක් මාවතක්’ (BRI) සමුළුව අමතමිනි.
BRI සහයෝගීතාවය යනු ඉතිහාසයේ නිවැරදි පසෙහි ඇති දෙයක් බවට පසුගිය දස වසර තුළ සාක්ෂාත් කර ගෙන ඇති දේ මගින් පෙන්නුම් කරන බවත්, එය අප කාලයන් ගේ ප්‍රගතිය නියෝජනය කරන අතරම, නිවැරදි ඉදිරි මාර්ගය බවද චීන ජනපතිවරයා මෙහිදී පැහැදිලි කළේය.
බලශක්තිය, බදුකරණය, මූල්‍ය කටයුතු, හරිත සංවර්ධනය, ආපදා අවම කිරීම, දූෂණ විරෝධීබව, මාධ්‍ය, සංස්කෘතිය ඇතුළු ක්ෂේත්‍ර රැසක් ආවරණය වන පරිදි බහුපාර්ශ්වික සහයෝගීතා වේදිකා ගොඩනැගීම මෙන්ම ශක්තිමත් කිරීමට චීනය සිය BRI හවුල්කාර රටවල් හා එක්ව කටයුතු කරන බවද ෂී මහතා වැඩිදුරටත් පැවසීය.
අට වැදෑරුම් ප්‍රතිපත්තියක්
BRI වැඩපිළිවෙළ ආරම්භ කර ගෙවී ගිය වසර 10 තුළ කැපී පෙනෙන ජයග්‍රහණ රැසක් උදාකර ගැනීමට ඊට සම්බන්ධ වූ සියලු රටවලට හැකි වූ බවත් එම රටවල් අතර ආර්ථික සබඳතා ශක්තිමත් කර ගැනීමට නව මාවත් රැසක් විවර වූ බවත් ෂී ජින් පිං මහතා පෙන්වා දුන්නේය.
අනාගතයේ දී “එක් තීරයක් – එක් මාවතක්” වැඩසටහන සඳහා පදනම් කර ගන්නා අට වැදෑරුම් ප්‍රතිපත්ති මාලාවක් ද මෙහිදී චීන ජනාධිපතිවරයා විසින් ප්‍රකාශයට පත් කරනු ලැබීය.
ජාත්‍යන්තර බහු පාර්ශ්වීය සම්බන්ධතා ජාලයක් නිර්මාණය කිරීම, ජගත් විවෘත ආර්ථිකයක් සඳහා සහාය දැක්වීම, සහයෝගීතාව උදෙසා ප්‍රායෝගික ප්‍රවේශයක් සැකසීම, හරිත සංවර්ධනය දිරිමත් කිරීම, විද්‍යා හා තාක්ෂණ නවෝත්පාදන සඳහා අවස්ථා සැලසීම, අන්තර් පුද්ගල සබඳතා ශක්තිමත් කිරීම, “එක් තීරයක් – එක් මාවතක්” සාමාජික රටවල් අතර නොබිදෙන සබඳතාවන් දිරිමත් කිරීම සහ එම රටවල් අතර ආයතනික සබඳතා ශක්තිමත් කිරීම එකී අට වැදෑරුම් ප්‍රතිපත්ති වේ.
ඓතිහාසික අවස්ථාවක්
මේ අතර, උත්සවය අමතමින් එක්සත් ජාතීන්ගේ මහලේකම් ඇන්ටෝනියෝ ගුටරෙස් මහතා පැවසුවේ BRI ව්‍යාපෘතිය ඓතිහාසික අවස්ථාවක් ලබාදෙන බවයි.
මෙමගින් ගෝලීය යටිතල පහසුකම් සඳහා ලබාදෙන දායකත්වයද ගුටරෙස් මහතාගේ ප්‍රශංසාවට ලක්විය.
ඔහු වැඩිදුරටත් පැවසුවේ සංවර්ධන සහාය නොමැතිව සංවර්ධනයක් ඇතිවිට නොහැකි බවත්, එවැන්නක් නොතිබුණහොත් අත්‍යවශ්‍යව පවතින යටිතල පහසුකම් බොහෝ සංවර්ධනය වෙමින් පවතින රටවල් අහිමි වන බවත්ය.
BRI ව්‍යාපෘතිය මෙතරම් වැදගත් වීමට හේතුව මෙයයි, යැයි ඔහු පෙන්වා දුන්නේය.
හරිත නගර, ප්‍රජාවන් සහ ප්‍රවාහන හා බලශක්ති පද්ධතිවලට වඩා වැඩි යමක් ගොඩනැගීමට අපට ඓතිහාසික අවස්ථාවක් ඇති බව BRI ව්‍යාපෘතිය මගින් පෙන්වා දෙන බවද ඔහු පැවසීය.
BRI ව්යාපෘතියේ සහයෝගීතාවයද ඇතිව සෑමදෙනාම එක්ව කටයුතු කළහොත් යටිතල පහසුකම් සදහා ඇති අපට යටිතල පහසුකම් සදහා ඇති හදිසි අවස්ථාව ද යටිතල පහසුකම් සකස්කර ගැනීමේ අවස්ථාවක් බවට පත්කර ගත හැකි බව එක්සත් ජාතීන්ගේ මහලේකම්වරයා වැඩිදුරටත් කියා සිටියේය.
ලෝක නායකයන් රැසක්
මෙම සමුළුවේ සමාරම්භව අවස්ථාවට රටවල් 20ක පමණ රාජ්‍ය නායකයන් සහ රටවල් 130ක හා ජාත්‍යන්තර සංවිධාන 30ක පමණ නියෝජිතයන් මීට සහභාගී විය.
සම්බන්ධතාවය, හරිත සංවර්ධනය, ඩිජිටල් ආර්ථිකය, යන මාතෘකා යටතේ ඉහළ මට්ටමේ අනු සමුළු තුනක්ද සම්මන්ත්‍රණ කිහිපයක්ද මෙම සමුළුවට ඇතුළත් වේ.
විවිධ මහද්වීපයන් නියෝජනය කරමින් රුසියානු ජනාධිපති ව්ලැද්මිර් පුටින්, කසකස්ථාන ජනාධිපති කාසීම් ජොමාර්ට් ටොකයෙව්, ඉන්දුනිසියානු ජනාධිපති ජොකෝ විදොදෝ, ආර්ජන්ටිනා ජනාධිපති ඇල්බර්ටෝ ෆර්නෑන්ඩස්, ඉතියෝපියානු අග්‍රාමාත්‍ය අබේ අහමඩ් යන මහත්වරු ද සමුළුව ඇමතූහ.
ශ්‍රී ලංකා ජනාධිපති රනිල් වික්‍රමසිංහ මහතා ද මෙම අවස්ථාවට එක් විය. සමුළුව සඳහා සහභාගී වූ රාජ්‍ය නායකයන් හමුදා උත්තමාචාර පිරිනමමින් පිළිගනු ලැබුණු අතර, පසුව ඔවුහු චීන ජනාධිපතිවරයා සමග සමූහ ඡායාරූපයකට ද පෙනී සිටියහ.
– ශානිකා ජයසේකර බෙයිජිං සිට
(ඡායාරූප : ෂින්හුවා පුවත් ඒජන්සිය)
ශ්‍රී ලංකා ඉදිකිරීම් කර්මාන්ත මණ්ඩලය විසින් 20 වෙනි වරටත් සංවිධානය කරන ලද “Build Sri Lanka නිවාස හා ඉදිකිරීම් ජාත්‍යන්තර ප්‍රදර්ශනය” නැරඹීම සඳහා ජනාධිපති අනුර කුමාර දිසානායක මහතා අද (31) පෙරවරුවේ එක් විය.
ශ්‍රී ලංකාවේ පවත්වනු ලබන ප්‍රධානතම නිවාස හා ඉදිකිරීම් ජාත්‍යන්තර ප්‍රදර්ශනය වන Build Sri Lanka නිවාස හා ඉදිකිරීම් ප්‍රදර්ශනය ඊයේ (30) කොළඹ සිරිමාවෝ බණ්ඩාරනායක අනුස්මරණ ප්‍රදර්ශන මධ්‍යස්ථානයේදී ආරම්භ වූ අතර එය හෙටින් (01) අවසන් වේ.
ප්‍රදර්ශන කුටි 280කට ආසන්න ප්‍රමාණයකින් සමන්විත මෙම ප්‍රදර්ශනය නිවාස හා ඉදිකිරීම් ක්ෂේත්‍රයේ ප්‍රධානම පාර්ශ්වකරුවන් ඒකරාශි වන වේදිකාවක් වන හෙයින්, මෙමගින් තම සබඳතා ගොඩනගා ගැනීමටත්, ව්‍යාපාර අවස්ථා ලබා ගැනීමටත්, නව නිර්මාණ හා නවීන තාක්ෂණික ක්‍රම පිළිබඳ අවබෝධයක් ලබා ගැනීමටත් ප්‍රදර්ශකයන්ට අවස්ථාව උදා කරයි.
මෙවර ප්‍රදර්ශනය නැරඹීම සඳහා 30,000කට වැඩි නරඹන්නන් පිරිසක් එක් වනු ඇතැයි අපේක්ෂා කෙරෙන අතර විදේශීය රටවල් කිහිපයක ප්‍රදර්ශන කුටි හා භාණ්ඩ හා සේවාවන් ලබා ගැනීමේ අවස්ථාවද පාරිභෝගිකයන්ට උදා කර දී තිබේ. එමෙන්ම විශේෂයෙන් ජාත්‍යන්තරව පිළිගත් පරිසර හිතකාමී ගොඩනැගිලි ද්‍රව්‍ය නිෂ්පාදන රාශියක් මෙවර ප්‍රදර්ශනයේදී දැක බලා ගත හැකිය.
ප්‍රදර්ශන කුටි වෙත යමින් ප්‍රදර්ශනකරුවන්ගේ තොරතුරු විමසීමටද මෙහිදී ජනාධිපති අනුර කුමාර දිසානායක මහතා කටයුතු කළ අතර ප්‍රදර්ශනය නැරඹීමට පැමිණ සිටි ජනතාව සමගද සුහද කථා බහක නිරත විය.
ප්‍රදර්ශනයට එක්ව සිටින අනුග්‍රාහක ආයතන වෙත සමරු තිළිණ පිළිගැන්වීමද ජනාධිපතිවරයා අතින් සිදු කෙරිණි.
නාගරික සංවර්ධන, ඉදිකිරීම් හා නිවාස අමාත්‍යාංශයේ ලේකම් රංජිත් ආරියරත්න, ශ්‍රී ලංකා ඉදිකිරීම් කර්මාන්ත මණ්ඩලයේ සභාපති ජයන්ත පෙරේරා, ප්‍රධාන විධායක නිලධාරී, විශ්‍රාමික කර්නල්, ඉංජිනේරු නිශ්ශංක එන්. විජේරත්න යන මහත්වරුන් ද, ශ්‍රී ලංකා ඉදිකිරීම් කර්මාන්ත මණ්ඩලයේ ආරම්භක සභාපති දේශමාන්‍ය ආචාර්ය සුරත් වික්‍රමසිංහ මහතා ඇතුළු හිටපු සභාපතිවරුන්ද, Colonial Engineering පෞද්ගලික සමාගමේ කළමනාකරණ අධ්‍යක්ෂ එන්. සතීෂ්රාජා මහතා ඇතුළු අනුග්‍රාහක භවතුන් මෙම අවස්ථාවට එක්ව සිටියහ.
2025 මැයි 26 වන දින ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා සහ නියෝජ්‍ය නාගරික සංවර්ධන, ඉදිකිරීම් සහ නිවාස අමාත්‍ය ටී. බී. සරත් මහතා විසින් මන්නාරම දිස්ත්‍රික්කයේ ජිම් බ්‍රවුන් නගර් ආදර්ශ ගම්මානය ප්‍රතිලාභී පවුල් 24 වෙත භාර දෙන ලදී.
පාර්ලිමේන්තු මන්ත්‍රී මයිල්වාගනම් ජෙගදීශ්වරන් මහතා, නාගරික සංවර්ධන, ඉදිකිරීම් සහ නිවාස අමාත්‍යාංශයේ ලේකම් රංජිත් ආරියරත්න මහතා, මන්නාරම් දිස්ත්‍රික් ලේකම්තුමා, නිවාස සංවර්ධන අධිකාරියේ සභාපතිතුමා සහ ජ්‍යෙෂ්ඨ නිලධාරීන් සහ නාගරික සංවර්ධන, ඉදිකිරීම් සහ නිවාස අමාත්‍යාංශයේ, උතුරු පළාත් සභාවේ සහ මන්නාරම දිස්ත්‍රික් පරිපාලනයේ ජ්‍යෙෂ්ඨ නිලධාරීන් රැසක් ද මෙම අවස්ථාවට සහභාගී වූහ.
ඉන්දියානු රජයේ ප්‍රදාන සහයෝගය සහිත ආදර්ශ ගම්මාන ව්‍යාපෘතිය නාගරික සංවර්ධන, ඉදිකිරීම් සහ නිවාස අමාත්‍යාංශය සමඟින් දිවයිනේ දිස්ත්‍රික් 25 තුළම ක්‍රියාත්මක වෙමින් පවතී.
මෙම ව්‍යාපෘතිය සඳහා වන අවබෝධතා ගිවිසුම සඳහා ඉන්දීය රජය සහ ශ්‍රී ලංකා රජය 2017 ඔක්තෝබර් මාසයේ දී අත්සන් තබන ලදී. මෙම ව්‍යාපෘතිය යටතේ දිස්ත්‍රික්
නිවාස කමිටු විසින් තෝරා ගනු ලබන පවුල් 24ක් සඳහා වන ආදර්ශ ගම්මානය බැගින් ශ්‍රී ලංකාවේ සෑම දිස්ත්‍රික්කයකම අඩු ආදායම්ලාභී පවුල් 600ක් සඳහා නිවාස ඉදි කෙරෙනු ඇත.
මේ වන විට මෙම ව්‍යාපෘතිය යටතේ ආදර්ශ ගම්මාන මඩකලපුව, වවුනියාව, යාපනය, මහනුවර, ගම්පහ, අනුරාධපුරය, බදුල්ල, මාතලේ, පුත්තලම, කොළඹ, ත්‍රිකුණාමලය, මොනරාගල සහ කිලිනොච්චි යන දිස්ත්‍රික්ක 13 තුළ ඉදි කර ප්‍රතිලාභීන් වෙත භාර දී තිබේ. ව්යාපෘතියේ ප්‍රගතිය 97%ක් ඉක්මවා තිබෙන අතර ඉතිරි ආදර්ශ ගම්මාන ද නුදුරේදී ම ප්‍රතිලාභින් වෙත භාර දීමට නියමිතය.
ලොකු කුඩා කා අතරත් එක සේ ජනප්‍රියත්වයට පත් Harry Potter පොත් මාලාවෙන් Harry Potter රූපවාහිනී කතාමාලාව නිපදවීමට යන බව වාර්තා වේ.
ඒ අනුව හැරී පෝටර්, හර්මයිනී ග්‍රේන්ජර් සහ රොන් වීස්ලි යන ප්‍රධාන චරිත ත්‍රිත්වය සඳහා ළමා ශිල්පීන් තෝරාගෙන ඇති බව සඳහන්ය.
මෙසේ තෝරා ගත් ශිල්පීන් ලෙස හැරී පෝටර්ගේ චරිතය වෙනුවෙන් Dominic McLaughlin ද, හර්මයිනී ග්‍රේන්ජර්ගේ චරිතයට Arabella Stanton මෙන්ම රොන් වීස්ලිගේ චරිතයට Alastair Stout ද රංගනයෙන් දායක වීමට නියමිතය.
මෙම තෝරගැනීමට අඳාළ තිර පරීක්ෂණ සඳහා ළමා නළු නිළියන් 32,000 වැඩි පිරිසක් සහභාගී වී තිබේ.
එසේම අල්බස් ඩම්බල්ඩෝර්ගේ චරිතයට John Lithgow, මිනර්වා මැක්ගොනගල්ගේ චරිතයට Janet McTeer, සෙවරුස් ස්නේප් ලෙස Paapa Essiedu ද, රුබියස් හැග්රිඩ්ට Nick Frost ද තෝරා ගෙන ඇත.
එහෙත් වොල්ඩර්මෝට් චරිතය සඳහා කතාමාලාවට රංගනයෙන් දායක වීමට සුදුසු නළුවෙකු මේ වන තෙක් තෝරාගෙන නැති බව වාර්තා වේ.
එසේම J.K. රොව්ලින්ග් ලියූ මෙම පොත් මාලාවේ මුල් පොත් 7ට අනුකූල වන අයුරින්, එක් පොතකට එක් කතාසමයක් ලෙස සැලසුම් කර ඇත.
ඒ අනුව එය වසර 10ක් පුරා දිවයන අයුරින් සැලසුම් වී තිබෙන අතර Mark Mylod කතා මාලාවේ අධ්‍යක්ෂකවරයා වේ.
පෙර චිත්‍රපට පරිදීම Waer Bros.Studios මඟින් මෙය ද නිශ්පාදනය කරනු ලබන බව සඳහන්ය.
මෙම ව්යාපෘතියේ විධායක නිෂ්පාදිකාව J.K. Rowling වන අතර 2027 වසරේ දී මෙහි පළමු කතා සමය නිකුත්වීමට නියමිතව තිබේ.
72 වන ලෝක රූ රැජින කිරුළ තායිලන්තයට
ආසියාවේ පැතිර යන නව කොවිඩ් ප්රභේදය ලංකාවේත්
