පාර්ලිමේන්තු මන්ත්‍රී නිමල් ලන්සා පිල ලබන 08 වැනිදා හම්බන්තොට, අම්බලන්තොට නගරයේදී මැතිවරණ ඉලක්ක කරගත් සිය සන්ධානයේ පළමු රැලිය කියමින් රැලියක් පැවැත්වීමට සූදානම්වන බව වාර්තා වේ.
ලන්සාගේ පිල මීට මාස පහකට පෙර පසුගිය ජනවාරි 27 වැනිදා ද ජනාධිපති රනිල් වික්‍රමසිංහ මහතා ජනාධිපති කරවීමට පවත්වන පළමු ප්‍රචාරක රැලිය බව කියමින් ජා-ඇල දී අලුත් සන්ධානය නමින් සන්ධානයක් ද පිහිටුවමින් රැලියක් පවත්වනු ලැබීය.
ජනපති වික්‍රමසිංහ මහතා මෙයට සහභාගි වන බවට ද ඔවුන් එම රැලියට පෙර ප්‍රචාරයක් දියත් කර තිබිණි.
කෙසේවුවද, ලබන 08 වැනිදා පැවැත්වෙන මෙම රුස්වීම සංවිධානය කිරීමේදී මූලිකත්වය ගෙන සිටින්නේ අමාත්‍ය මහින්ද අමරවීර මහතාය.
මෙම සන්ධානයේ දේශපාලන ආරංචි මාර්ග සඳහන් කරන ආකාරයට පසුගිය බදාදා ඔවුන් කොළඹ හෝටලයකදී රුස්ව රුස්වීම සංවිධානය කරන ආකාරය සහ වර්තමාන දේශපාලන තත්ත්වය පිළිබඳ සාකච්ඡා කොට තිබේ.
එහිදී හිටපු ජනපති ගෝඨාභය රාජපක්ෂ මහතාගේ කලක් පෞද්ගලික ලේකම්වරයා ලෙස කටයුතු කළ සුගීෂ්වර බණ්ඩාරය මහතා “ඔව් ඔව් අපි මේකෙදි පෙන්නන්න ඕනෑ අමරවීර ඇමැතිතුමාගෙ දිස්ත්‍රික්කයේ හයිය වගේම අපේ සන්ධානයේ හයිය.” යනුවෙන් අමරවීර මහතා ට අභියෝගයක් ද ලබා දී ඇතැයි පැවසේ.
මෙම රුස්වීම සඳහා දිස්ත්‍රික්කයෙන් පිටත පිරිස් රුගෙන ඒමෙන් වැළකිය යුතු බව පිරිස මෙහිදී තීරණය කර ඇතැයි කියැවේ.
එසේම මෙහිදී රංගේ බණ්ඩාර සිදු කළ ප්‍රකාශය පිළිබඳවද සාකච්ඡාවක් ඇතිව ඇතැයි ආරංචි මාර්ග සඳහන් කරයි.
සන්ධානයේ බොහෝ දෙනකු එම ප්‍රකාශය විවේචනය කර ඇති අතර එහිදී ජනාධිපතිවරයාගේ අදහස පිරිස හමුවේ නිමල් ලන්සා දීර්ඝව පැහැදිලි කර ඇතැයි ද පැවසේ.
සබැඳි පුවත්
ලන්සා JVP නායකයින්ගේ බිරින්දෑවරුන්ට අමුතු කතාවක් කියයි (වීඩියෝ)
