අමෙරිකාව විසින් ඉරානයට එල්ල කළ ප්‍රහාර හමුවේ ඉරානය අමෙරිකාවට අනතුරු අඟවා තිබේ.

ඒ සිය රටට එල්ල කළ ප්‍රහාරයට එරෙහිව අමෙරිකාවට ප්‍රතිචාරයක් ලබා දෙන බව පවසමිනි.

ඉස්ලාමීය විප්ලවවාදී ආරක්ෂක බළකායේ ප්‍රකාශක ඊබ්‍රහිම් සොල්ෆගාරි පවසන්නේ එක්සත් ජනපදය විසින් සෘජුවම යුද්ධයට අවතීර්ණ වී ඇති බවත් ඔවුන් ඉරානයේ පූජනීය භූමිය උල්ලංඝනය කර ඇති බවය.

බලවත් සහ ඉලක්කගත මෙහෙයුම් හරහා එක්සත් ජනපදය බරපතළ, කණගාටුදායක සහ අනපේක්ෂිත ප්‍රතිවිපාකවලට මුහුණ දෙනු ඇති බවත් ඊබ්‍රහිම් පවසා තිබේ.

එමෙන්ම  ඔහු වැඩිදුරටත් අදහස් දක්වමින් පැවසුවේ ට්‍රම්ප් යනු සූදුකාරයෙක් බවත් ඔහුට යුද්ධය ආරම්භ කළ හැකි වුවද යුද්ධය අවසන් කරනුයේ ඉරානය බවටය.

ඉරානයේ ඉස්ලාමීය විප්ලව ආරක්ෂක බලකාය යනු මින් වසර 40කට පෙර පිහිටුවන ලද එරට ඉස්ලාමීය ක්‍රමය ආරක්ෂා කිරීමට සහ නිත්‍ය සන්නද්ධ හමුදාවන්ට ප්‍රති බරක් සැපයීමටය.

එය ඉරානයේ ප්‍රධාන මිලිටරි දේශපාලනික සහ ආර්ථික බලවේගයක් බවට පත්ව ඇති අතර ඉරානයේ උත්තරීතර නායක අයතුල්ලා අලි කමේනි සහ සහ තවත් බොහෝ ජ්‍යෙෂ්ඨ පුද්ගලයින් සමග සමීප සබඳතාද පවත්වයි.

විදෙස් මාධ්‍ය සඳහන් කර ඇත්තේ ඉස්ලාමීය විප්ලව ආරක්ෂක බළකාය සතුව ක්‍රියාකාරි භටයින් 190,000කට අධික පිරිසක් සිටින බට ඇස්තමේන්තු කර ඇති බවය.

එම බළකාය විදේශීය මෙහෙයුම් වන කුඩ්ස් බළකාය හරහා මිත්‍ර පාක්ෂික රජයන්ට සහ සන්නද්ධ කණ්ඩායම්වලට මුදල්, ආයුධ, තාක්ෂණය, පුහුණුව සහ උපදෙස් ලබා දෙනු ඇති බවද සඳහන් වේ.

සිරියාවේ ඩැමැස්කස් හි පල්ලියකට එල්ල වූ මරාගෙන මැරෙන බෝම්බ ප්‍රහාරයකින් පුද්ගලයින් 22 දෙනෙකු මිය ගොස් තවත් 63 දෙනෙකු තුවාල ලබා ඇති බව විදෙස් වාර්තා සඳහන් කරයි.

ඉරිදා සවස දේව මෙහෙයක් අතරතුර පල්ලියේ දී පුද්ගලයෙකු විසින් මෙම මරාගෙන මැරෙන බෝම්බ ප්‍රහාරය එල්ල කර තිබේ. ඔහු පළමුව වෙඩි ප්‍රහාරයක් එල්ල කර ඇති අතර, පසුව මරාගෙන මැරෙන බෝම්බ ප්‍රහාරය එල්ල කර ඇත.

සිරියාවේ අභ්‍යන්තර කටයුතු අමාත්‍යංශය සඳහන් කර ඇත්තේ මෙම ප්‍රහාරකයා IS සටන්කාමීන් හා සම්බන්ධතා ඇති අයෙකු බවයි. කෙසේවෙතත්, මේ සම්බන්ධයෙන් IS සටන්කාමීන් මේ දක්වා ප්‍රතිචාර දක්වා නොමැත.

පල්ලිය ඇතුළත ඡායාරූප සහ වීඩියෝවල දැඩි ලෙස හානි වූ පූජාසනයක්, කැඩී ගිය වීදුරු හා ලේ පැල්ලම් සහිත බිත්ති  දිස්වෙන බව විදෙස් මාධ්‍ය වැඩිදුරටත් වාර්තා කරයි.

පවතින තත්වයට හමුදා විසඳුමක් නැති බවත්, එකම බලාපොරොත්තුව සාමය බවත් එක්සත් ජාතීන්ගේ මහලේකම් ඇන්ටෝනියෝ ගුටරෙස් මහතා පවසයි.

ඔහු මේ බව පවසා ඇත්තේ ඊයේ රාත්‍රියේ ඉරානයට එල්ල කරන ලද ඇමෙරිකානු ප්‍රහාරවලට ප්‍රතිචාර දක්වමිනි.

X සටහනක් එක්කරමින් ඔහු තවදුරටත් එක්සත් ජාතීන්ගේ සංවිධානයේ සාමාජික රටවල් වලින් ඉල්ලා ඇත්තේ ගැටුම්කාරී තත්ත්වය අඩුකර, එක්සත් ජාතීන්ගේ ප්‍රඥප්තිය හා අනෙකුත් ජාත්‍යන්තර නීති වලට ඇති බැඳීම ඉෂ්ට කරන ලෙසයි.

“මෙම භයානක පැයේදී, අවුල් සහගත තත්වය උත්සන්න වීම වළක්වා ගැනීම ඉතා වැදගත් වේ. මෙයට මිලිටරි විසඳුමක් නැත. ඉදිරියට ඇති එකම මාර්ගය රාජ්‍ය තාන්ත්‍රිකභාවයයි… එකම බලාපොරොත්තුව සාමයයි,” යැයි ඔහු වැඩිදුරටත් පවසා ඇත.

ප්‍රහාර සම්බන්ධයෙන් ඉරානයේ න්‍යෂ්ටික බලශක්ති සංවිධානය ද දැඩි ලෙස විවේචනය කර තිබුණි.

මීට පෙර ටෲත් සෝෂල් සමාජ මාධ්‍යයේ සටහනක් එක්කරමින් ඇමෙරිකානු ජනපති – ඩොනල්ඩ් ට්‍රම්ප් පවසා තිබුණේ ෆෝඩෝ, නටන්ස් හා එස්ෆහාන් යන න්‍යෂ්ටික මධ්‍යස්ථාන තුනකට ඇමරිකාව විසින් සාර්ථකව ගුවන් ප්‍රහාර එල්ල කළ බවයි.

පසුව ජාතිය අමතමින්  ට්‍රම්ප් පවසා ඇත්තේ ඉරානය දැන් සාමය ඇති කර ගත යුතු බවත් ඔවුන් එසේ නොකළහොත් අනාගත ප්‍රහාර බොහෝ විශාල වනු ඇති බවය.

“මතක තබා ගන්න, ඉලක්ක බොහොමයක් ඉතිරිව තිබෙනවා. සමහර විට වඩාත්ම මාරාන්තික විය හැකියි. නමුත් සාමය ඉක්මනින් උදා නොවන්නේ නම්, අපි නිරවද්‍යතාවයෙන්, වේගයෙන් සහ කුසලතාවයෙන් අනෙක් ඉලක්ක වෙත යන්නෙමු,” යැයි ට්‍රම්ප් වැඩිදුරටත් පවසා තිබුණි.