එක්සත් ජාතික පක්ෂ මූලස්ථානය වන සිරිකොත සමඟි ජන බලවේගය වෙත භාර දෙන ලෙස එම පක්ෂය  ජනාධිපති රනිල් වික්‍රමසිංහගෙන් ඉල්ලා සිටී.

ප්‍රවෘත්ති සාකච්ඡාවකට එක් වෙමින් සමඟි ජන බලවේගයේ ජනාධිපතිවරණ මෙහෙයුම් ප්‍රධානී සුජීව සේනසිංහ මහතා  ඊයේ (31) මේ බව සඳහන් කලේය.

සිරිකොත පක්ෂ මූලස්ථානයේ තිබූ අකුණු සන්නායකයක් අතුරුදන් වීම සම්බන්ධයෙන් මාධ්‍යවේදියෙකු යොමු කළ ප්‍රශ්නයකට පිළිතුරු ලබා දෙමින් සුජීව සේනසිංහ මහතා මේ බව පවසා සිටියේය.

සිරිකොත යනු ඔවුන්ගේ මහගෙදර බවත් රනිල් වික්‍රමසිංහ මැතිතුමාට පක්ෂයේ හිටපු නායකයන් ගැන යම් හෝ ආදරයක් ඇති නම් එය සමඟි ජන බලවේගය වෙත භාර දිය යුතු බව සුජීව සේනසිංහ මහතා මෙහිදී සඳහන් කලේය.

“සිරිකොත ඉතාම අන්තරාදායක තැනක තියෙන්නේ. සිරිකොත කියන්නේ අපේ මහගෙදර, අපිට තමා ඕක අයිති වෙන්නේ. අන්තිම වශයෙන් හරි රනිල් වික්‍රමසිංහ මැතිතුමාට සිරිකොතයි  UNP එකයි අපිට භාර දෙන්න පුළුවන්නම් එතුමාට පොඩ්ඩක් හරි පවු කමා කරගන්න පුළුවන් වෙයි”

අස්වැසුම සඳහා මෙතෙක් ඉල්ලුම් කිරීමට නොහැකි වු අයට ඒ වෙනුවෙන් තවමත් අවස්ථාව පවතින බව මුදල් රාජ්‍ය අමාත්‍ය ශෙහාන් සේමසිංහ මහතා පවසයි.

එප්පාවල ලංකා රාජ්‍යය පොස්පේට් සමාගමේ නිරීක්ෂණ චාරිකාවකට සහභාගී වෙමින් අමාත්‍යවරයා මේ බව සඳහන් කලේය.

ශෙහාන් සේමසිංහ මහතා මෙහිදී පවසා සිටියේ අස්වැසුම දෙවැනි අදියර ලෙස ජූලි මාසයේ සිට පවුල් ඒකක ලක්ෂ 24 කට ගෙවීම කරන්න බලාපොරොත්තු වන බවය.

මේ සඳහා හිමිකම් ඇති පවුල් මේ වන තෙක් අස්වැසුම ප්‍රතිලාභීන් හැටියට ඉල්ලුම් කරලා නොමැති නම් ඒ අය සඳහා ඉල්ලුම් කිරීමට තවදුරටත් අවස්ථාවක් ලබා දෙන බවත්, අස්වැසුමේ රෙගුලාසී හා ගෙවීම් සම්බන්ධයෙන් ලබන සතියේදී පාර්ලිමේන්තුවේ අනුමැතියට ඉදිරිපත් කරන බවත් අමාත්‍යවරයා විසින් මෙහිදී දැනුම් දෙන ලදී.

දේශීය පාරිභෝජනය සඳහා වසර පහක කාලයක් සඳහා ලෙලි කජු ආනයනය කිරීමට රජය කටයුතු යොදා ඇතැයි වාර්තා වේ.

දේශීය කජු අස්වැන්න නොලැබෙන දෙසැම්බර් සිට අප්‍රේල් මාසය දක්වා වූ කාලය තුළ මෙසේ ලෙලි කජු ආනයනය කිරීමට නියමිතය. 

ඒ අනුව මේ වසරේදී මෙට්‍රික් ටොන් 15,000 ක උපරිමයකට යටත්ව ලෙලි කජු ආනයනය කිරීම සඳහා කැබිනට් මණ්ඩල අනුමැතියද හිමිවී ඇත.

ඉදිරි වසර සඳහා ආනයනය කිරීමට නියමිත කජු ප්‍රමාණය කෘෂිකර්ම හා වැවිලි කර්මාන්ත අමාත්‍යාංශය, කජු සංස්ථාව, මුදල් අමාත්‍යාංශය හා වෙළෙඳ අමාත්‍යාංශය එක්ව තීරණය කිරීමට නියමිතය. ලෙලි කජු ආනයනය කිරීමේදී සෙස් ඇතුළු බදු සහන ලබාදීමටද කටයුතු යොදා තිබේ.