පුද්ගලික ආයතන සේවකයින්ගේ විශ්‍රාම වැටුප් පනත් කෙටුම්පතට එරෙහිව විරෝධතා ව්‍යාපාරයක නියැළෙමින් සිටියදී පොලිස් වෙඩි ප්‍රහාරයකට ලක්ව ජීවිතක්ෂයට පත්වූ කටුනායක නිදහස් වෙළෙඳ කලාපයේ සේවකයෙකු වූණු රොෂේන් චානකගේ අම්මා ගාලු මුවදොර අරගල භූමියට එක්වුණා.
දිනය 2011 මැයි මාසේ 30 වැනිදා පෞද්ගලික අංශයේ සේවකයින්ට විශ්‍රාම වැටුපක් එහෙම නැත්නම් පෙන්ශන් එකක් නැහැ. රැකියාව හමාර කෙරෙන කාලෙක ඔවුන්ට තියෙන එක ම බලාපොරොත්තුව ඊ.පී.එෆ් එක.
එවකට රාජපක්ෂ පාලනය විසින් ඒකටත් විදින්න සූදානම් වුණු මොහොතක ඊට එරෙහිව නැඟිච්චි කටුනායක වෙළඳ කලාපයේ කම්කරු අරගලය ඉතාම තිරිසන් විදිහට ආණ්ඩුවේ නිළ පොලිසිය යොදවලා සමතලා කෙරුණා. නිකම්ම නෙවෙයි මිනිස් බිල්ලකුත් අරගෙන. ඒ රොශේන් චානක.
එදා පොලීසියට ලැබුණු නියෝගය අනුව උන් විරෝධතාවයට වෙඩි තිබ්බා. දුවන මිනිසුන්ට ගැහැණුන්ට අන්ත තිරිසන් විදිහට පහර දුන්නා. ගැබිණියන්ට පවා පහර දුන්නා. සේවකයන් වැඩට ආපු බයිසිකල් වලටත් ගිනි තිබ්බා. වෙඩි වැදිලා වැටිලා ඉඳපු රොශේන්ව ඉස්පිරිතාලෙකට ගෙනියන්න නොදී රඳවාගෙන හිටියා.
අවසානයේ දී ආණ්ඩුවේ වංචාකාරී පනත අකුලා ගන්න වුණා. කැළඹිල්ල වහගන්න පොලිස්පති ඉල්ලා අස්වුණා. ඉල්ලා අස් වුණු පොලිස්පතිට ආණ්ඩුවෙන් තානාපති කමක් ලැබුණා. දරු කැක්කුම, විඳ දරාගන්න බැරි ශෝකය මැද්දෙම අම්මා කෙනෙක්ට කරන්න පුළුවං ලොකුම අසාධරණය කරමින් රොශේන්ගෙ ජීවිතයට මිලක් නියම කරපු ආණ්ඩුව ඒ අම්මගෙ අසරණකමත් මාධ්‍ය ඉදිරියේ වෙන්දේසි කරලා ශුද්ධවන්තයින් වුණා.
දැන් අවුරුදු 11ක්. රොශේන්ලා විරෝධතා කළේ ජනාධිපති මන්දිරය ඉස්සරහා නෙවෙයි, තමුන් වැඩ කරපු කම්හල් ඉස්සරහ. වෘත්තීය අයිතිවාසිකම් වෙනුවෙන් උද්ඝෝෂණය කරන්න කම්කරුවන්ට තියෙන අයිතිය අමුඅමුවේම උල්ලංඝනය කරමින් අහිංසක කොල්ලෙක්ගෙ ජීවිතේ බිලිගත්තු මිනීමරු රාක්ෂයින්ට දැන්වත් දඬුවම් ලැබෙන්න ඕනෙ.
අරගලභූමියට ආපු රොෂේන්ගේ අම්මා මෙහෙම කියනවා
“මගෙන් ඇහුවා වාර්තාව ඕනද කියලා. පිටුවයි දෙකයි කිව්වා තියෙන්නේ. කොහොමහරි තොරතුරු දැනගැනීමේ පනත මගින් අපිට ලබාගන්න හම්බවුණා පුතාගේ වාර්තාව. ඒ වුනත් නඩුව යනවා තාමත් අවුරුදු 11ක් තිස්සේ මීගමුවේ මහාධිකරණයේ. තවත් නැහැ ඒකට විසඳුමක්. සාධාරණය ඉෂ්ඨවෙලා නෑ. මගේ දරුවා වෙනුවෙන් සාධාරණයක් ඉෂ්ඨ කරන්න කියල මම ඉල්ලනවා. එකළ පොලිස්පතිට දඬුවම විදියට හම්බවුණේ බ්‍රසීලයේ තානාපතිකම. ඒක තමයි හොඳම වැඩේ. මගේ පුතා කම්කරුවන් වෙනුවෙන් ජීවිතය පූජා කරලා. ඒ අයගේ අර්ථසාධකය ඉතුරු කරලා දීලා තියෙනවා. මගේ පුතා වීරයෙක් කියලා මම මේ වෙලාවේ කියනවා.”
රන්දි කිඳෙල්පිටිය
