ආර්ථිකය ප්‍රකෘතිමත් කිරීම සඳහා රජය විසින් සිදු කර ඇති ප්‍රතිසංස්කරණ ක්‍රියාවලියේ යහපත් ප්‍රතිඵල ශ්‍රී ලාංකේය ජනතාවට ලැබෙමින් පවතින බවත් එසේ වුව ද තව දුරටත් ඒ සඳහා ද්වී පාර්ශ්වීය සහ බහු පාර්ශ්වීය හවුල්කරුවන්ගේ සහය අපේක්ෂා කරන බවත් මුදල් රාජ්‍ය අමාත්‍ය ශෙහාන් සේමසිංහ මහතා G-24 මුදල් අමාත්‍යවරුන්ගේ සහ මහ බැංකු අධිපතිවරුන්ගේ සමුළුව අමතමින් පවසා සිටියේය.

අමාත්‍යවරයා එහි දී පෙන්වා දුන්නේ ආර්ථිකය ස්ථාවර කිරීමේ ක්‍රියාමාර්ග සාර්ථක වී ඇති අතර අපනයන ක්‍රියාවලිය ශක්තිමත් කිරීම සහ ඍජු විදේශ ආයෝජන මගින් විදේශ ණය ලබා ගැනීමකින් තොරව ආර්ථිකය නව වර්ධන මාවතකට යොමු කිරීමේ ක්‍රියාවලියක රජය දැන් නිරතව සිටීන බවයි. 

තිරසර ආර්ථිකයක් ගොඩනැගීම සඳහා මෙවැනි සමුළුවල වැදගත්කම අවධාරණය කළ අමාත්‍යවරයා කියා සිටියේ ද්වී පාර්ශ්වීය සහ බහු පාර්ශ්වීය හවුල්කරුවන්ගේ සහයෝගය සමග ලෝකයේ හොඳම භාවිතයන් අනුගමනය කිරීමට රජය කටයුතු කරන බවයි.  

මේ අතර අමාත්‍යවරයා ජෛව විවිධත්ව මූල්‍ය සංසදයේදී අදහස් දැක්වු අතර COP 27 හි දී දියත් කරන ලද දේශගුණික සෞභාග්‍ය සැලැස්මට අනුව රටේ ප්‍රමුඛතා සහ ඉදිරි ගමන සම්බන්ධවයෙන් එහි දී අදහස් පළ කළේ ය. 

2030 වන විට රටේ පුනර්ජනනීය බලශක්ති උත්පාදනය 35% සිට 70% දක්වා ඉහළ නැංවීමේ ශ්‍රි ලංකාවේ ඉලක්කය බව එහි දී පෙන්වා දුන් අතර ශ්‍රී ලංකාව ශුන්‍ය කාබන් ආර්ථිකයක් බවට පත් කිරීමට රටේ සැලැස්ම සකසන බවත්, ශ්‍රී ලංකාව දැනටමත් සමුද්‍රීය අවකාශීය සැලැස්ම කෙටුම්පත් කිරීමේ වැඩකටයුතු ආරම්භ කර ඇති බවත්, ඒ සඳහා දැනටමත් වැඩ කටයුතු කරගෙන යන බවත් අමාත්‍යවරයා විසින් වැඩි දුරටත් සඳහන් කරන ලදී.