ප්‍රමාණවත් වර්ෂාවක් නොලැබීම හේතුවෙන් උඩවලව ජලාශයේ ජල මට්ටම සීග්‍රයෙන් පහළ යෑමත් සමඟ පවුල් 89,000 කට පමණ පානීය ජලය ලබාදීම ගැටළුවක් වී ඇති බව මහවැලි අධිකාරිය පවසයි.
එමෙන්ම ගොවිතැන් සඳහාද ජලය නිකුත් කළ හැක්කේ තවත් දින 10ක කාලයකට පමණක් බව එම අධිකාරිය දැනුම් දෙයි.
උඩවලව ජලාශය රත්නපුර, හම්බන්තොට සහ මොණරාගල යන දිස්ත්‍රික්කවල කෘෂිකාර්මික කටයුතු සහ පානීය ජල අවශ්‍යතා සපුරාලන ප්‍රධානතම ජල මූලාශ්‍රයයි.
මෙමඟින් ගොවි පවුල් 36,000 කට අයත් හෙක්ටයාර් 25,300 ක පමණ බිම් ප්‍රමාණයක වගා කටයුතු සඳහා ජලය සැපයෙන අතර එයින් පානීය ජල අවශ්‍යතාව සපුරා ගන්නා පවුල් සංඛ්‍යාව 89,000 කට අධිකය.
මේ දිනවල උඩවලව ජලාශය ආශ්‍රිත ජල පෝෂක ප්‍රදේශවලට බලපා ඇති දැඩි වියලි කාලගුණ තත්ත්වය හේතුවෙන් ජලාශයේ ජල මට්ටම සීග්‍ර ලෙස පහත බැස ඇති අතර, මේ සම්බන්ධයෙන් සොයාබැලීම සඳහා මහවැලි කලාපයේ නිලධාරීන් උඩවලව ජලාශයේ නිරීක්ෂණ චාරිකාවක නිරත වී තිබේ.
