සවස් කාලයේදී කිරි එකතු කිරීමේ වැඩපිළිවෙළක් නොමැතිවීම නිසා දෛනිකව උතුරු පළාතේ පමණක් කිරි ලීටර් පනස් දහසක් නාස්තිවන බව වාර්තා වේ.
හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු කිරීමේ ආයතනය ඉකුත් වසරේදී (2023) කරන ලද පර්යේෂණ එළි දැක්වීම සඳහා එහි ශ්‍රවණාගාරයේ ඊයේ (03) පැවැති වැඩසටහනක දී මෙම තොරතුරු අනාවරණය විය.
මෙරට දෛනික කිරි අවශ්‍යතාවය ලීටර් ලක්ෂ 11ක් වූවත්, රටේ නිෂ්පාදනය කෙරෙන්නේ ලීටර් ලක්ෂ පහකටත් වඩා අඩු ප්‍රමාණයක් බවද මෙහිදී හෙළිවිය.
මේ අතර කෘෂිකර්ම අමාත්‍යාංශය යටතේ පාලනය වන මිල්කෝ සමාගම මාසයකට රුපියල් මිලියන 117ක පාඩුවක් ලබන බවත්, මිල්කෝ ආයතනයේ දෛනික කිරි නිෂ්පාදන ධාරිතාවය ලීටර් 470,000ක් වූවත්, වර්තමානයේදී ආයතනයට දෛනිකව ලැබෙන කිරි ප්‍රමාණය ලීටර් 60,000 ක් දක්වා අඩුවී ඇතැයිද අනාවරණය වේ.
මිල්කෝ ආයතනය ඉන්දු – ලංකා හවුල්කාර සමාගමකින් මිලදී ගැනීමට අදාළව මේ දිනවල කටයුතු කෙරෙන බවත්, ඊට අදාළ ඇස්තමේන්තු සඳහා රුපියල් මිලියන 120ක මුදලක් වැයකර ඇතැයි ද පැවැසේ.
ජාතික පශු සම්පත් සංවර්ධන මණ්ඩලය යටතේ පාලනය වන ගොවිපොළ 32න් ලාභ ලබන එකදු ගොවිපොළක්වත් නොමැති බවත්, දේශීය සමාගමක් විසින් මණ්ඩලයේ එක ගොවිපොළක් පමණක් බද්දට ලබාගැනීමට ඉල්ලුම්කර ඇතැයිද අනාවරණය වේ.
