චීනයට අවශ්‍යවම සිටි රතුවරෙන්තුකාර චීන ජාතිකයින් තිදෙනා ඇතුළු චීන ජාතිකයන් 39 දෙනා අල්ලා ගැනීමට රැඳී සිටින ස්ථානය ගැන තොරතුරු අනාවරණය කරගෙන වැටලීම සංවිධානය කර ඇත්තේ චීන තානාපති කාර්යාලය හරහා චීන පොලිසිය විසින් බව වාර්තා වේ.
මේ වැටලීමට චීන තානාපති කාර්යාලය සමඟ ජාත්‍යන්තර පොලිසියේ චීන පොලිසියට සම්බන්ධ පිරිසකුත් පැමිණ ඇති බව රජයේ දිනමිණ පුවත්පත වාර්තා කරයි.
අත්අඩංගුවට ගත් සැකකරුවන් අතර චීන ජාතික පිරිමි පුද්ගලයන් 33 දෙනකු, කාන්තාවන් 5 දෙනකු සහ කුඩා දරුවකුද සිටින බව පොලිසිය කියයි.
මේ අයගෙන් රතු වරෙන්තු නිකුත් කර ඇති චීන ජාතිකයන් 03 තිදෙනා ඇතුළු චීන ජාතිකයන් 06 දෙනකු චීන තානාපති කාර්යාලය හා පැමිණි නිලධාරීන්ගේ දැඩි අධික්ෂණයටත් ප්‍රශ්න කිරීමටත් ලක්ව ඇතැයි පැවසේ.
ඒ අය චීන තානාපති කාර්යාලය භාරයට පත් කිරීමට අවශ්‍ය පියවරද ඊයේ (01) වන විට ගනිමින් සිටි බවද පැවසේ.
චීනයේ සිදු වූ දැවැන්ත මූල්‍ය වංචාවක් සම්බන්ධයෙන් ඔවුන්ට එරෙහිව චෝදනා එල්ලවී ඇති බව සඳහන්ය.
මේ අයගෙන් 6 දෙනකු ප්‍රශ්න කිරීම් හමුවේ පවසා ඇත්තේ තමන් බලහත්කාරයෙන් මෙරට රඳවාගෙන සිටි බවයි.
කෙසේවුවද, චීන තානාපති කාර්යාලය සිය භාරයට ගැනීමට කටයුතු කරන 9 දෙනා අතර එසේ චීන ජාතිකයින් 6ක් රඳවාගෙන සිටි අයද සිටින බව පැවසේ.
මේ චීන ජාතිකයන් 39 දෙනා මාස 6ක පමණ කාලයක් මෙරට රැඳී සිට ඇති බව සඳහන්ය.
සංචාරක වීසා මඟින් මෙරටට පැමිණ ඇති ඔවුන් මෙම නවැතැන් පොළේ මෙතෙක් කාලයක් රැඳී සිට ඇති බව උසස් පොලිස් නිලධාරියෙක් සඳහන් කළේය.
මෙම චීන ජාතිකයන් සංවිධානාත්මකව මෙරටට ගෙන්වාගෙන ඔවුන්ට ලැප්ටොප් සහ ජංගම දුරකතන දෙමින් ඒ ඔස්සේ අන්තර්ජාල අපරාධවල යොදවා ඇති බව පෙනී යන්නේ යැයිද එම නිලධාරියා පැවසීය.
මෙම ජාවාරම මෙහෙයවා ඇත්තේද චීන ජාතිකයන් පිරිසක් බවද චීන තානාපති කාර්යාලයට ලැබී ඇති තොරතුරුවල සඳහන් වන බවද වාර්තා වේ.
අන්තර් ජාල අපරාධ සඳහා යොදාගත්තේ යැයි කියැවෙන මෙම චීන ජාතිකයන් සතුව තිබී ලැප්ටොප් පරිගණක 40ක් සහ ජංගම දුරකතන 120ක් සහ තවත් තාක්ෂණික උපාංග රැසක් සොයා ගැනීමටද පොලිසිය සමත්ව ඇත.
මෙම සැකකරුවන් අත්අඩංගුවට ගන්නා අවස්ථාවේදී ඔවුන් සතුව විදෙස් ගමන් බලපත්‍ර පවා තිබී නොමැත.
ඒවා මෙම ජාවාරමට සම්බන්ධ ප්‍රධාන ජාවාරම්කරු විසින් ඔහු සන්තකයේ තබාගෙන සිටින බවද විමර්ශනවලදී පෙනී ගොස් තිබේ.
මේ පිරිස අලුත්ගම කළුවාමෝදර ප්‍රදේශයේ සංචාරක නිකේතනයක නවාතැන් ගෙන සිටියදී අත්අඩංගුවට පත්ව තිබිණි.
මූලාශ්‍රය – දිනමිණ
සබැඳි පුවත්
අන්තර්ජාලය හරහා මුදල් වංචා කළ චීන්නු 39ක් මාට්ටු
