අයිස් මත්ද්‍රව්‍ය සමඟ සංවිධානාත්මක අපරාධකරුවෙකු වන සලිදු මල්ෂික නොහොත් පානදුරේ කුඩු සලිඳුගේ සමීපතමයෙකු පොලිස් විශේෂ කාර්ය බළකායේ මඟින් අත්අඩංගුවට ගෙන තිබේ.
පානදුර අළුබෝමුල්ල ප්‍රදේශයේ සිදුකළ වැටලීමකින් අදාළ පුද්ගලයා අත්අඩංගුවට ගැනීමට හැකි වූ බව පොලීසිය පවසයි.
සැකකරු සතුව තිබී රුපියල් කෝටි දෙකකට ආසන්න වටිනාකමින් යුත් අයිස් මත්ද්‍රව්‍ය කිලෝ ග්‍රෑම් එකයි ග්‍රෑම් 40ක් පමණ සොයා ගෙන තිබේ.
අත්අඩංගුවට ගත් සැකකරු 31 හැවිරිදි පානදුර දික්තුඩුව ප්‍රදේශයේ පදිංචිකරුවෙකි.
සැකකරු සංවිධානාත්මක අපරාධකරුවෙකු හා මහා පරිමාණ මත්ද්‍රව්‍ය ජාවාරම්කරුවෙකු වන දැනට අපරාධ පරීක්ෂණ දෙපාර්තමේන්තුව භාරයේ පසුවන පානදුර සලිඳු නැමැත්තාගේ ප්‍රධාන සමීපතමයෙකු හා ඩුබායි රාජ්‍යයේ සිට මෙරට මත්ද්‍රව්‍ය ජාවාරම මෙහෙය වන නිලංග නැමැත්තාගේ මෙරට මත්ද්‍රව්‍ය ජාවාරම සිදුකරන පුද්ගලයා බවට තොරතුරු අනාවරණය වී තිබේ.
සැකකරු වැඩිදුර විමර්ශන කටයුතු සඳහා පොලිස් මත්ද්‍රව්‍ය නාශක කාර්යංශය වෙත භාර දී ඇති බව පොලිස් විශේෂ කාර්ය බළකාය සඳහන් කරයි.
