Connect with us

පුවත්

කෘත්‍රිම බුද්ධි යෙදවුමක් (AI App) නිර්මාණයට රේගු නිලධාරීන්ට උපදෙස්

Published

on

පාර්ලිමේන්තු ක්‍රම හා විධි පිළිබඳ කාරක සභාව පසුගිය බදාදා (05) එහි සභාපති පාඨලී චම්පික රණවක මහතාගේ ප්‍රධානත්වයෙන් පාර්ලිමේන්තුවේදී රැස්විය.

එහි පළමු සැසියේ දී සාකච්ඡාවට බඳුන් වූයේ ජාත්‍යන්තර වෙළෙඳාමේ වැරදි ලෙස ඉන්වොයිස් සැකසීම (mis-invoicing), ශ්‍රී ලංකා රේගුවේ විවිධ අරමුදල් කළමනාකරණය පිළිබඳ විශේෂ විගණන වාර්තාව සහ මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශයේ මූල්‍ය දෙපාර්තමේන්තුව විසින් නිකුත් කරන ලද බදු වියදම් ප්‍රකාශය පිළිබඳ වාර්තාව සම්බන්ධයෙනි.

මෙම සාකච්ඡාව සඳහා මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය, ශ්‍රී ලංකා රේගුව, දේශීය ආදායම් දෙපාර්තමේන්තුව යන රාජ්‍ය ආයතනවල නිලධාරීන් කමිටුව හමුවට කැඳවා තිබිණ.

ශ්‍රී ලංකා රේගුව මෙහිදී පෙන්වා දුන්නේ, ජාත්‍යන්තර වෙළඳාමේ වැරදි ලෙස ඉන්වොයිසි සැකසීම (mis-invoicing) වැලැක්වීම සම්බන්ධයෙන් ක්‍රම හා විධි පිළිබඳ කාරක සභාව විසින් ලබා දුන් නි‍ර්දේශ අනුව කටයුතු කිරීම මගින් ශ්‍රී ලංකා රේගුව 2023 වසරේ දී වෙනත් වසරවලට සාපේක්ෂව රුපියල් බිලියන 15 ක පමණ ආදායමක් උපයා ගෙන ඇති බවය.

එමෙන්ම 2024 වසරේ මේ වන විට ද සැළකිය යුතු ආදායමක් එකතු කර ගැනීමට හැකි වී තිබේ.

විශේෂයෙන්ම වැරදි ඉන්වොයිස්කරණය (mis-invoicing) නිසා රටට අහිමිවෙන ධනය යළි ලබා ගැනීම සඳහා විධිමත් වැඩපිළිවෙළක් ක්‍රම හා විධි පිළිබඳ කාරක සභාව විසින් මින් පෙර යෝජනා කෙරුණු අතර, Global Financial Integrity Report හී නිරීක්ෂණවලට අනුව ජාත්‍යන්තර වෙළෙඳාමේ වැරදි ලෙස ඉන්වොයිසි සැකසීම හේතුවෙන් වාර්ෂිකව ඩොලර් බිලියන 4 ක පමණ මුදල් කාන්දු වීමක් සිදුවන බව සභාපතිවරයා මෙහිදී නැවත මතක් කර දුන්නේය.

වැරදි ලෙස ඉන්වොයිසිකරණයේ මූලික අංග තුන වන අගය අඩු කොට ඉන්වොයිසිකරණය (Under invoicing), අගය වැඩි කොට ඉන්වොයිසිකරණය (Over Invoicing) සහ භාණ්ඩ හා සේවා ගනුදෙනුවක් සිදු නොකොට සිදුකෙරෙන ඉන්වොයිසිකරණය (Ghost Invoicing) මෙහිදී

සාකච්ඡාවට ලක් වූ අතර, භාණ්ඩ හා සේවා ගනුදෙනුවක් සිදු නොකොට සිදුකෙරෙන ඉන්වොයිසිකරණය (Ghost Invoicing) මගින් අත්තිකාරම් මුදල් ගෙවීමක් බැංකුව හරහා සිදු කිරීමේ දී භාණ්ඩ හා සේවා ගනුදෙනුවක් සිදුවන වන්නේද යන්න සොයා බලන ලෙස බැංකුවලට මුදල් අමාත්‍යාංශය හරහා නියෝගයක් ලබා දීමේ වැදගත්කම මෙහිදී සභාපතිවරයා විසින් පෙන්වා දෙන ලදී.

භාණ්ඩ හා සේවා ගනුදෙනුවක් සිදු නොකොට සිදුකෙරෙන ඉන්වොයිසිකරණය (Ghost Invoicing) වැලැක්වීම සඳහා බැංකු ගෙවීම් පද්ධතිය හා ශ්‍රී ලංකා රේගුවේ ASYCUDA පද්ධතිය ඒකාබද්ධ කිරීමේ හා ශ්‍රී ලංකාවේ ප්‍රධාන ආනයන හා අපනයන පාර්ශවකරුවන් සමග ඉන්‍වොයිසි දත්ත හුවමාරු කර ගැනීමේ යාන්ත්‍රණයක් හා එම දත්ත ශ්‍රී ලංකා රේගුවට ලබා ගත හැකි පරිදි යාන්ත්‍රණයක් මුදල් අමාත්‍යාංශය මගින් සැකසීමේ වැදගත්කමද මෙහිදී අවධාරණය කෙරිණ.

එමෙන්ම, ආදායම් බදු අයකර ගැනීම සදහා එම දත්ත දේශීය ආදායම්දෙපාර්තමේන්තුව සමග හුවමාරු කර ගත යුතු බවද සභාපතිවරයා පෙන්වා දුන්නේය.

ආනයන අපනයනයේ භෞතික විමර්ශනය සහ පරිලෝකන (scanning) ක්‍රියාවලිය සඳහා කෘතිම බුද්ධිය (AI) APP එකක් නිර්මාණය කොට ස්වයංක්‍රීය කිරීමේ වැදගත්කම ද මෙහිදී අවධාරණය කෙරිණ. ඒ සඳහා දේශීය මෘදුකාංග සංවර්ධකයින්ගේ සහාය ලබාගැනීමට ක්‍රියා කරන ලෙස ද, ටෙන්ඩර් කැඳවීමක් සිදු කරන ලෙස ද සභාපති රණවක මහතා උපදෙස් දුන්නේය.

රේගු නිලධාරීන් සඳහා ඇගයීම් ක්‍රියාවලිය සඳහා වෙනම ඒකකයක් ආරම්භ කොට Balance Score Card ක්‍රමය භාවිතා කරන ලෙසද, ඒ වෙනුවෙන් වන උපදේශන සේවාවක් ලබා ගන්නා ලෙස ද, රේගුව වෙත උපදෙස් දීමට සභාපතිවරයා කටයුතු කළේය. විකුණුම් ආදායම් හඳුනාගැනීමේ යාන්ත්‍රණයක් සැකසීම සඳහා ඉලෙක්ට්‍රොනික වේදිකාවක් ලෙස UPI පද්ධතියක් සකස් කිරීමට පියවර ගන්නා ලෙස ද, ඉන්දියාවේ මෙවැනි පද්ධතියක් මගින් ආදායම තුන්ගුණයක් වූ බවට ද රේගු නිලධාරීන් වෙත රණවක මහතා විසින් පෙන්වා දෙන ලදී.

මුදල් විශුද්ධිකරණ ක්‍රියාවලිය විශාල වශයෙන් ම සිදුවන්නේ කැසිනෝ ව්‍යාපාරය හරහා බව පෙන්වා දුන් සභාපතිවරයා බැංකු ගිණුම් මගින් කැසිනෝ ගනුදෙනු සිදු කිරීමට අවශ්‍ය කටයුතු සම්පාදනය කිරීම මගින් එම ගනු‍දෙනු හදුනා ගැනීමේ පද්ධතියක් (tracking system) සකස් කිරීමේ වැදගත්කම ද අවධාරණය කළේය.

මේ අවස්ථාව සඳහා රාජ්‍ය අමාත්‍ය අනුරාධ ජයරත්න,පාර්ලිමේන්තු මන්ත්‍රී අශෝක් අබේසිංහ යන මහත්වරුන් සහභාගී වූහ.

පුවත්

කුලී නිවෙස් හිමියන්ට බද්දක්

Published

on

By

ශ්‍රී ලංකාවේ රාජ්‍ය ආදායම ඉහළ නැංවීමේ පියවරක් වශයෙන් 2025 අප්‍රේල් 01 වනදා සිට ක්‍රියාත්මක වන පරිදි පදිංචිව සිටින සහ හිස්ව තිබෙන නේවාසික දේපොළ සඳහා ආරෝපිත කුලී ආදායම් බද්දක් හඳුන්වාදීමට ජාත්‍යන්තර මූල්‍ය අරමුදල යෝජනා කර තිබේ.

ජාත්‍යන්තර මූල්‍ය අරමුදල ශ්‍රී ලංකාව පිළිබඳව නිකුත් කර ඇති නවතම සවිස්තරාත්මක වාර්තාවක මේ පිළිබඳව දක්වා තිබේ.

ජාත්‍යන්තර මූල්‍ය අරමුදලේ ශ්‍රී ලංකාව සඳහා වන සිව් අවුරුදු විස්තීර්ණ මූල්‍ය පහසුකම් වැඩසටහනේ දෙවන සමාලෝචනයෙන් අනතුරුව  IMF Country Report 24/161 වාර්තාව ප්‍රකාශයට පත් කෙරුණි.

එවැනි බද්දක් හඳුන්වා දීමේ වැදගත්කම එම වාර්තාවෙහි දැක්වෙයි.

රජයේ ආදායම ඉහළ දැමීම සඳහා මෙවැනි බද්දක් හඳුන්වා දීම ඉතා වැදගත් බව ජාත්‍යන්තර මූල්‍ය අරමුදල පෙන්වා දෙයි.

මෙම බදු ක්‍රමය 2026 වසර වනවිට සම්පූර්ණයෙන් ක්‍රියාත්මක කිරීමට ශ්‍රී ලංකාව ඉලක්ක කරගෙන ඇති බව ද එම වාර්තාවේ සඳහන් වේ.

ආරෝපණය කළ කුලී ආදායම් බද්දක් යනු නිවසක හිමිකරුවෙකු සිය නිවස කුලියට ලබාදුන්නේ නම් ඔහුට හෝ ඇයට ලබාගත හැකි ආදායම ඇස්තමේන්තු කර ඒ සඳහා බදු මුදලක් අය කිරීමය.

මෙම බද්ද නිවසේ වටිනාකම මත නොව ඉන් ලැබිය හැකි අදායම මත පදනම් වේ.

මෙම බදු ක්‍රමය ක්‍රියාත්මක කිරීම සඳහා පළාත් පාලන ආයතන මට්ටමින් දත්ත ගබඩාවක් පිහිටුවීමට ශ්‍රී ලංකාව අවධානය යොමු කළයුතු බවත් එම දත්ත ගබඩාවට මෙරට දේපොළ හිමියන් සතුව ඇති දේපොළ සම්බන්ධයෙන් යාවත්කාලීන කළ ඇස්තමේන්තුවක් ඇතුළත් විය යුතු බවත් ජාත්‍යන්තර මූල්‍ය අරමුදල පෙන්වා දෙයි.

එම දත්ත ගබඩාව නිර්මාණය කිරීම මෙම වසරේ අගෝස්තු මාසය වන විට අවසන් විය යුතු බවද එම වාර්තාවේ සඳහන් වේ.

මීට පෙර ජාත්‍යන්තර මූල්‍ය අරමුදල විසින් හඳුන්වාදීමට සූදානම් වූ දේපොළ බදු සහ තෑගි හා ප්‍රවේණි බදු ක්‍රමය ක්‍රියාවට නැංවීම විවිධ ව්‍යවස්ථාමය සීමාකම් හේතුවෙන් ප්‍රමාදවීම හේතුකොට ගෙන මෙලෙස නව ‘ආරෝපිත කුලී ආදායම් බද්දක්‘ හඳුන්වාදීමට ජාත්‍යන්තර මූල්‍ය අරමුදල පියවර ගෙන ඇත.

Continue Reading

පුවත්

ඉන්දීය විදේශ ඇමති මේ මස අගදී ලංකාවට

Published

on

By

ඉන්දීය විදේශ අමාත්‍ය ආචාර්ය එස්. ජයශංකර් මහතා නිල සංචාරයක් සඳහා මෙරටට පැමිණිමට නියමිත බව විදේශ කටයුතු අමාත්‍යාංශය පවසයි.

එළැඹෙන ජුනි 20 වනදා ඒ මහතා ශ්‍රී ලංකාවට පැමිණීමට නියමිත බවයි වාර්තා වේ.

පසුගියදා ඉන්දියාවේදී ජනාධිපති රනිල් වික්‍රමසිංහ මහතා සමඟ පැවති සාකච්ඡාවකදී අතරමග නවතා දමා තිබූ ඉන්දීය ආයෝජන සමඟ ශ්‍රී ලංකාවේ ආරම්භ කළ සංවර්ධන ව්‍යාපෘති කඩිනමින් යළි ආරම්භ කිරීම පිළිබඳව ආචාර්ය ජයිශංකර් මහතා ප්‍රකාශ කර තිබුණි.

ඉන්දීය විදේශ කටයුතු අමාත්‍යවරයා තවදුරටත් පවසා ඇත්තේ, මෙම කටයුතුවල ප්‍රගතිය අධීක්ෂණය කිරීම සඳහා ශ්‍රී ලංකාවට පැමිණීමට නියමිත බවය.

Continue Reading

පුවත්

අදානිගේ  සුළං බලාගාර දෙකට උපයෝගීතා කොමිසමේ අවසරය නැහැ

Published

on

By

ඉන්දීය අදානි සමාගමේ යෝජිත පුනරීන් සහ මන්නාරම සුළං බලාගාර දෙක සඳහා පවතින තත්ත්වය යටතේ අවසර දීමට නොහැකි බව ශ්‍රී ලංකා මහජන උපයෝගීතා කොමිෂන් සභාව දන්වා තිබේ.

ඒ අනුව මහජන උපයෝගීතා කොමිෂන් සභාව දැනුම් දී ඇත්තේ, පාරිසරික බලපෑම් තක්සේරුවේ ප්‍රතිඵල සහ මධ්‍යම පරිසර අධිකාරිය විසින් නිකුත් කරන ලද පාරිසරික බලපත්‍රයේ විස්තර ඇතුළු තවත් තොරතුරු ඉදිරිපත් කරන ලෙසය.

පුනරීන් සහ මන්නාරම සුළං බලාගාර සඳහා ඉන්දීය අදානි සමාගමට ආයෝජන මණ්ඩලයේ අනුමැතිය සහිත ලිපිය පසුගිය වසරේ පෙබරවාරි 23 වැනිදා ලබා දී තිබුණි.

එහිදී ප්‍රකාශ කෙරුණේ, ඩොලර් මිලියන 442ක ආයෝජන ව්‍යාපෘතියක් වන මෙමගින්, මෙගාවොට් 350ක ධාරිතාවක් ජාතික පද්ධතියට එක් කිරීමට නියමිත බවය.

කෙසේවෙතත්, පුනරීන් සහ මන්නාරම සුළං බලාගාර දෙක සඳහා අවසර ලබාදීමට නම් තවත් පැහැදිලි කිරීම් හා තොරතුරු රැසක් කොමිසම වෙත අවශ්‍යව ඇති බව ශ්‍රී ලංකා මහජන උපයෝගීතා කොමිෂන් සභාව දන්වා තිබේ.

Continue Reading

Trending

Copyright © 2023 Sri Lanka Mirror. All Rights Reserved