මේ වසරේ මේ දක්වා චීනයේ ආර්ථිකය සාමාන්‍යයෙන් ප්‍රකෘතිමත් වීමේ සහ වර්ධනයේ ප්‍රවණතාවක් පළ කර ඇති බව ජාතික සංවර්ධන හා ප්‍රතිසංස්කරණ කොමිෂන් සභාවේ නියෝජ්‍ය අධ්‍යක්ෂ ජාඕ චන්ෂින් (Zhao Chenxin) මහතා කියා සිටියේය.
චීනයේ කොමියුනිස්ට් පක්ෂයේ 20 වැනි ජාතික සම්මේලනයට සමගාමීව බීජිං හි නිව් සෙන්වුවරි නිකෝ හෝටලයේ ස්ථාපිත කර ඇති මාධ්‍ය මධ්‍යස්ථානයේ අද (17) පැවැති මාධ්‍ය හමුවකදී ඒ මහතා මේ බව පැවසීය.
ඇතැම් මාසවල උච්චාවචනයන් නොතකා බැලීමේදී මේ බව පෙනී යන්නේ යැයිද හෙතෙම වැඩිදුරටත් එය පැහැඳිළි කළේය.
“මේ වසරේ ආරම්භයේ සිට, මාසික උච්චාවචනයන් කිහිපයක් තිබුණද, චීනය විසින් ආර්ථිකය ප්‍රකෘතිමත් වීමේ සහ වර්ධනයේ වේගය පවත්වා ගෙන ගියා. නමුත් කොවිඩ් -19 ප්‍රතිචාරයට ආර්ථික හා සමාජීය සංවර්ධනය සම්බන්ධීකරණය කිරීමේදී සහ ප්‍රතිපත්ති පැකේජය ක්‍රියාත්මක කිරීම, ආර්ථිකය ස්ථාවර කිරීම සහ පසු විපරම් ප්‍රතිපත්ති හඳුන්වාදීමත් සමඟ නිෂ්පාදන, සේවා, ආයෝජන සහ පරිභෝජනය ඇතුළු ප්‍රධාන ආර්ථික දර්ශක අඛණ්ඩව යථා තත්ත්වයට පත්වෙමින් තියෙනවා. සමස්තයක් ලෙස චීන ආර්ථිකය ප්‍රකෘතිමත් වීමේ වේගයක් පවත්වා ගෙන යනවා. අප දන්නා පරිදි, තුන්වන කාර්තුවේදී ආර්ථිකය පැහැදිලිවම වර්ධනය වෙලා තියෙන්නේ”
“ගෝලීය වශයෙන්, චීන ආර්ථිකය දිගින්දිගටම විශිෂ්ඨව පවතිනවා. චීනයේ CPI අගය සාමාන්‍යයෙන් ඉහළ ගොස් තිබෙන අතර, පාරිභෝගික මිල ගණන් වලින් ඔබට පෙන්නුම් වෙනවා. නමුත්, මෙය ලෝකයේ අනෙකුත් ප්‍රදේශවල ඇතිවී තිබෙන දැඩි උද්ධමන තත්ත්වයන් හා සැසඳීමේදී හාත්පසින්ම වෙනස්… චීනයේරැකියා වෙළඳපොළ ස්ථාවරයි. චීනයේ ජාත්‍යන්තර ගෙවුම් ශේෂය මූලික සමතුලිතතාවයක් භුක්ති විඳිනවා. අප විදේශ විනිමය සංචිත ඩොලර් ට්‍රිලියන තුනකට වඩා ඉහළ මට්ටමකයි තියෙන්නේ. මේ සියලුම ආර්ථික දර්ශක එකට ගත් විට, චීනය තවමත් හොඳ ආර්ථික ක්‍රියාකාරිත්වයක් භුක්ති විඳින බව පේනවා.”
එහිදී වැඩිදුරටත් Zhao Chenxin මහතා කියා සිටියේ, 18 වැනි ජාතික කොංග්‍රසයෙන් පසු, සිය පක්ෂය විසින් දිගු කලක් නොවිසඳී තිබූ ගැටලු විශාල ප්‍රමාණයක් විසඳා ඇති බවයි.
වචනවලට වඩා සංඛ්‍යා සද්දයි!
වචනවලට වඩා වැඩි ශබ්දයක් සංඛ්‍යා වලට ඇති බව පැවසූ හෙතෙම, (Numbers speak louder than words.) 2012 සිට 2021 දක්වා, චීනයේ දළ දේශීය නිෂ්පාදිතය යුවාන් ට්‍රිලියන 53.9 සිට 114.4 දක්වා (එක්සත් ජනපද ඩොලර් ට්‍රිලියන 7.5 සිට 15.9 දක්වා) දක්වා වර්ධනය වී ඇතැයි ද පැවසීය.
ලෝක ආර්ථිකයේ සියයට 18.5 ක් වන චීනයේ ඒකපුද්ගල ප්‍රතිශතය 11.3 හි සිට සියයට 7.2 ක් වැඩි වී ඇති බවද ඔහු පෙන්වා දුන්නේය.
තවද, දළ දේශීය නිෂ්පාදිතය යුවාන් 39,800 සිට 81,000 දක්වා (එක්සත් ජනපද ඩොලර් 5,500 සිට 11,200 දක්වා) මේ කාල පරාසයේ වැඩිව ඇතැයි ද ඔහු කීය.
බලවත් චීනයක් ගොඩනැගීම කඩිනම් කළ යුතුයි – ෂී ජින්පිං
මේ අතර, චීන කොමියුනිස්ට් පක්ෂයේ (CPC) 20 වන ජාතික කොංග්‍රසය ආරම්භ කරමින් එහි මහ ලේකම් හා චීන ජනපති ෂී ජින්පිං මහතා ඊයේ (16) කියා සිටියේ චීනය රටවල් 140කට වැඩි ප්‍රමාණයක ප්‍රධාන වෙළඳ හවුල්කරුවෙකු බවට පත්ව ඇති බවත්, නවීකරණ කර්මාන්ත පද්ධතියක් ගොඩනගමින්, සැබෑ ආර්ථිකයට ප්‍රමුඛ අවධානය යොමුකර නවීන කාර්මිකකරණය ප්‍රවර්ධනය කළ යුතු බවයි.
එසේම, නිෂ්පාදන රටක්, ඉහළ ගුණාත්මක රටක්, බලවත් අභ්‍යවකාශ රටක්, බලවත් ප්‍රවාහන රටක්, බලවත් අන්තර්ජාල රටක් සහ බලවත් ඩිජිටල් රටක් ලෙස චීනය ගොඩනැගීම කඩිනම් කළ යුතු බවද හෙතෙම කීය.
කැළුම් ශිවන්ත චීනයේ බීජිංහි සිට…
