සියලු දේශපාලන පක්ෂ ගාලුමුවදොර පිටිය දේශපාලන වැඩසටහන්වලට භාවිත නොකිරීමට එකඟ වී තිබියදී, ජාතික ජන බලවේගය එම පිටියේ මැයි රැලිය පැවැත්වීමෙන් එකඟතාව කඩ කළ බව එක්සත් ජාතික පක්ෂයේ නායක හා හිටපු ජනාධිපති රනිල් වික්‍රමසිංහ මහතා පවසයි.

එජාපය මෙවර මැයි රැලියක් නොපවත්වා, කොට්ඨාස මට්ටමින් ජනතාව දැනුවත් කිරීමේ වැඩසටහන් පවත්වන බව හිටපු ජනාධිපතිවරයා සඳහන් කළේය.

ගාල්ල, උළුවිටිකේ එජාප දිස්ත්‍රික් කාර්යාලයේ පැවති ගාල්ල දිස්ත්‍රික්කයේ පළාත් පාලන ඡන්දයට ඉදිරිපත්වන එජාප අපේක්ෂකයන් දැනුවත් කිරීමේ රැස්වීමකදී ඔහු මේ බව පැවසීය.

“ආණ්ඩුව මැයි සැමරුම ගාලුමුවදොර පිටියේදී පවත්වනවා.
දේශපාලන කටයුතුවලට එම පිටිය යොදා නොගන්නා බවට සියලු පක්ෂ එකඟ වුණා. දැන් ඒ එකඟතාව කඩ කරනවා. මේ ප්‍රතිපත්තිය කුමක්ද? විශාල රැස්වීමකින් අපට ප්‍රයෝජනයක් නැහැ. ඡන්දයට පෙර අවසන් නිවාඩු දිනය මැයි පළමුවන දා. එදා ගම් හිස් කරලා සියලු පාක්ෂිකයන් එතැනට ගෙනියනවාද, නැත්නම් ගමේ ඉන්නවාද? අපි ගමේ ඉන්න තීරණය කළා.” 

ජාතික ලොතරැයි මණ්ඩලයට අයත් රුපියල් ලක්‍ෂ පහකට ආසන්න වටිනා ජංගම දුරකථනයක්, පරිගණකයක් ඇතුළු උපකරණ කීපයක් සාපරාධී සාවද්‍ය පරිහරණය කළා යැයි චෝදනා එල්ල වී ඇති හිටපු ජනාධිපති රනිල් වික්‍රමසිංහ මහතාගේ පාලන සමයේ ජනාධිපති මහජන සම්බන්ධතා අධ්‍යක්‍ෂ ජනරාල්වරයකු ලෙස කටයුතු කළ ජාතික ලොතරැයි මණ්ඩලයේ හිටපු ක්‍රියාකාරි අධ්‍යක්‍ෂවරයකු ද වන තුසිත හල්ලොලුව මහතා විදේශගතවීම වළක්වමින් කොටුව මහෙස්ත්‍රාත් නිලුපුල් ලංකාපුර මෙනෙවිය ඊයේ (29දා) නියෝගයක් නිකුත් කළාය.

එකී නියෝගය වහාම ආගමන විගමන පාලකවරයා වෙත යැවීමට ද මහෙස්ත්‍රාත්වරිය නියෝග කළාය. කොටුව පොලිසිය කළ ඉල්ලීමක් සලකා බැලූ මහෙස්ත්‍රාත්වරිය එම නියෝගය කළාය.

ජාතික ලොතරැයි මණ්ඩලයේ ක්‍රියාකාරි අධ්‍යක්ෂවරයකු 2017-2019 කාලය අතරතුර සේවය කර ඇති තුසිත හල්ලොලුව මහතා 2019.11.19 වැනිදා සේවයෙන් ඉවත්ව ගොස් ඇති බවත් ඔහු භාවිත කළ පෙරකී ජංගම දුරකථනය ඇතුළු උපකරණ යළි භාර දී නොමැති බවට ජාතික ලොතරැයි මණ්ඩලයේ සහකාර සාමාන්‍යාධිකාරිවරයා 2024.10.21 වැනිදා තම පොලිසියට පැමිණිල්ලක් කර ඇති බවත් කොටුව පොලිසිය මින්පෙර අධිකරණයට වාර්තාවක් ගොනු කරමින් පෙන්වා දී තිබිණි.

සැකකාර තුසිත හල්ලොලුව මහතා පොලිසියට කැඳවා ප්‍රකාශයක් ලබාගෙන විමර්ශන ආරම්භ කළ බවත් ඉහත කී ජංගම දුරකථනය ඇතුළු භාණ්ඩවල වටිනාකම මුදල් ඇණවුම් මගින් (මනි ඕඩර්) ජාතික ලොතරැයි මණ්ඩලයට යැව් නමුත් එකී මුදල් ඇණවුම් භාරනොගෙන ආපසු එවා ඇති බවට ඔහු 2024.11.01 වැනිදා ප්‍රකාශයක් ලබා දී ඇති බවත් කොටුව පොලිසිය අධිකරණයට වාර්තා කොට තිබිණි.

දිවයින

සබරගමු පළාතේ මාර්ග සහ ක්‍රිඩාංගණ ඇතුළු ව්‍යාපෘති 77කට අදාළව අසත්‍ය මිනුම් පත්‍ර සකසා රුපියල් මිලියන 77ක වංචාව සිදුකිරීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් අත්අඩංගුවට ගත්  සබරගමු පළාත් සභාවේ සහකාර අධ්‍යක්‍ෂකවරියක් සහ සබරගමු පළාත් සභාවේ අමාත්‍යාංශයක හිටපු ලේකම්වරයෙකු ලබන 08 වනදා තෙක් රක්ෂිත බන්ධනාගාර ගත කිරීමට ඇඹිලිපිටිය මහෙස්ත්‍රාත්‍ තිළිණ මහේෂ් පීරිස් මහතා නියෝග කර තිබේ.

අපරාධ පරීක්ෂණ දෙපාර්තමේන්තුව මඟ හැර සිටි‍ සැකකාර සහකාර අධ්‍යක්‍ෂකවරිය පසුගිය 07 වනදා අපරාධ පරීක්ෂණ දෙපාර්තමේන්තුවේ නිලධාරින් විසින් අත්අඩංගුවට ගෙන තිබුණි.

සබරගමු පළාත් මාර්ග සංවර්ධන, ග්‍රාමීය යටිතල පහසුකම්, සංචාරක සංවර්ධන, පළාත් මාර්ග නඩත්තු අමාත්‍යාංශයේ සහකාර සැලසුම් අධ්‍යක්ෂිකා කුසුම්ලතා කුමානායක යන අය මෙලෙස අත්අඩංගුවට ගෙන තිබේ.

රත්නපුර දිස්ත්‍රික්කයේ හිටපු ප්‍රාදේශිය ලේකම්වරයෙකු මෙන්ම සබරගමු පළාත් මාර්ග සංවර්ධන, ග්‍රාමීය යටිතල පහසුකම්, සංචාරක සංවර්ධන, පළාත් මාර්ග අමාත්‍යංශයේ ලේකම්වරයෙකු වු දේවප්‍රිය විජයරාජ මෙම සිද්ධියට අදාළව ඇඹිලිපිටිය මහෙස්ත්‍රාත් අධිකරණයට නීතිඥයෙකු මඟින් භාර වී තිබුණි.

ඇඹිලිපිටිය ප්‍රාදේශිය සභාවේ හිටපු කාර්මික නිලධාරිවරයෙක්, ලිපිකරුවකු සහ ලේකම්වරයෙකු ද මීට පෙර මෙම වංචාව් සම්බන්ධයෙන් සැකපිට අත්අඩංගුවට ගෙන රක්ෂිත බන්ධනාගාර ගත කර තිබේ.

සබරගමු පළාතේ මාර්ග සහ ක්‍රිඩාංගණ ඇතුළු ව්‍යාපෘති 77 කට අදාළව මුදල් වෙන්කර ගෙන ඇතත් ඒ සඳහා මාර්ග හෝ ක්‍රිඩාංගණ ඉදිකර නොතිබීම සම්බන්ධයෙන් සිදුකළ විගණන පරීක්ෂණයකින් මෙම වංචාව හෙළිවීව ඇති බව සඳහන්ය.

අනතුරුව ඊට අදාළව සබරගමු පළාත් සභාවේ ලේකම්වරයෙකු අපරාධ පරීක්ෂණ දේපාර්තමේන්තුවේ මූල්‍ය වංචා අංශයට කළ පැමිණිල්ලකට අනුව සැකකරුවන් අත්අඩංගුවට ගෙන තිබේ.

2016 සහ 2017 වර්ෂවලදී මෙම  මාර්ග සහ ක්‍රිඩාංගණ ඇතුළු ව්‍යාපෘති 77ක් සිදුකර ඇතැයි අසත්‍ය ලේඛන ඉදිරිපත් කර මෙම මූල්‍ය වංචාව සිදුකර ඇතැයි සබරගමු පළාත් සභාව සිදුකරන ලද පරීක්ෂණවලදී අනාවරණය වී තිබේ