සිසුවියක් නෙළුම් කුළුණෙන් පැන සිය දිවි හානි කර ගැනීමේ සිද්ධිය සම්බන්ධයෙන් කොළඹ ජාත්යන්තර පාසල ( Colombo International School) වෙත ගොස් සොයා බලා කරුණු වාර්තා කිරීමට අධ්‍යාපන අමාත්‍යාංශයෙන් පංච පුද්ගල කමිටුවක් පත් කර තිබේ.
මෙම කමිටුවට අධ්‍යාපන අමාත්‍යංශයේ අතිරේක ලේකම්වරුන් තිදෙනෙක් සහ අධ්‍යක්ෂවරුන් දෙදෙනෙකු අයත් බව සඳහන්ය.
ඩේලි මිරර් වෙත අදහස් දක්වමින් අධ්‍යාපන අමාත්‍යාංශයේ ලේකම් තිලකා ජයසුන්දර මහත්මිය පවසා ඇත්තේ, මෙම නිලධාරීන් අදාළ සිසුවිට ඉගෙනුම ලැබූ ජාත්යන්තර පාසල වෙත ගොස් සිදුවීම පිළිබඳ සොයා බලා වාර්තාවක් සකස් කිරීමට නියමිත බවය.
ජාත්යන්තර පාසල් සහ පෞද්ගලික පාසල් තමන් යටතේ පාලනය වීමක් හෝ නියාමනය වීමක් නොවන බවත්, ඒවා සමාගම් පනත යටතේ ලියාපදිංචි වී තිබීම හේතුවෙන් අදාළ ජාත්යන්තර පාසල සහ සිසුවිය මිය යෑමේ සිද්ධිය සම්බන්ධව නීතිමය පියවර ගැනීමට තමන්ට බලයක් නොමැති බව ද අධ්‍යාපන අමාත්‍යාංශය තවදුරටත් පෙන්වා දී තිබේ.
මේ අතර, මෙම සිදුවීම සම්බන්ධයෙන් කොළඹ නෙළුම් කුලුණ කළමණාකරන පුද්ගලික සමාගම නිවේදනයක් නිකුත් කර ඇත.
සිද්ධිය සම්බන්ධයෙන් සිය ශෝකය ප්‍රකාශ කරමින් එම සමාගම පවසා ඇත්තේ, සියලුම නරඹන්නන්ගේ ආරක්ෂාව සහ යහ පැවැත්ම සහතික කිරීම සඳහා පොලිසිය ඇතුළු බලධාරීන් සමග පූර්ණ සහ යෝගයෙන් කටයුතු කරන බවය.
සබැඳි පුවත්
https://sinhala.srilankamirror.com/news/දුව-ගිය-ජාත්යන්තර-පාසලේ/
