මෙරට සිටින ඊශ්‍රායල ජාතිකයින් ඉලක්ක කොට ප්‍රහාරයක් එල්ල කිරීමට ඇති සැලසුමක් සම්බන්ධයෙන් ඉන්දීය බුද්ධි අංශ විසින් දැනුම් දීමක් නිකුත් කර නොමැති බව මහජන ආරක්ෂක අමාත්‍ය විජිත හේරත් මහතා පවසයි.
රටේ වත්මන් ආරක්ෂක තත්ත්වය ගැන පැහැදිලි කිරීම සඳහා මහජන ආරක්ෂක අමාත්‍යංශයේදී අද (24) පැවැති විශේෂ ප්‍රවෘත්ති සාකච්ඡාවකදී ඔහු මේ බව සඳහන් කලේය.
ඉන්දීය බුද්ධි අංශ විසින් එවැනි දැනුම්දීමක් නොකළ බවත් එය සම්පූර්ණයෙන්ම වැරදි ප්‍රවෘත්තියක් බවත් විජිත හේරත් මහතා මෙහිදී ප්‍රකාශ කලේය.
එමෙන්ම, මෙම තත්වය සම්බන්ධයෙන් වගකීම් සහගතව කරුණු වාර්තා කරන ලෙසත් ජනතාව අතර නොසන්සුන්කාරී තත්වයක් ඇති කරන වැරදි පුවත් ප්‍රචාරය කිරීමෙන් වළකින ලෙසත් අමාත්‍යවරයා මෙහිදී මාධ්‍ය වෙත අවධාරණය කලේය.
ඔහු තවදුරටත් පවසා සිටියේ මෙරට සිටින ඊශ්‍රායල ජාතිකයින් ඉලක්ක කොට ප්‍රහාරයක් එල්ල කිරීමට සැලසුමක් තිබීමේ සිද්ධිය සම්බන්ධයෙන් සැකපිට මේ වනවිට තිදෙනෙක් අත්අඩංගුවට ගත් බවය.
එම පුද්ගලයින් තිදෙනාම මෙරට පුරවැසියන් බවද අමාත්‍යවරයා පවසා සිටියේය.
සැකපිට අත්අඩංගුවට ගත් එම පුද්ගලයින් යම්කිසි කැලඹිලිකාරී තත්ත්වයත් ඇති කිරීම සඳහා දැනුවත්ව හෝ නොදැනුවත්ව උත්සාහ කර ඇතිද යන්න පරීක්ෂා කිරීම සඳහා මේ වන විට ඔවුන්ගෙන් ප්‍රශ්න කරන බව විජිත හේරත් මහතා මෙහිදී වැඩිදුරටත් සඳහන් කලේය.
“මැදපෙරදිග ඇතිවෙලා තියෙන යුදමය තත්ත්වයත් එක්ක ලංකාවට පැමිණිලා ඉන්න සංචාරකයන්ගේ ආරක්ෂාව තහවුරු කිරීම අපේ වගකීමක්. යම් යම් තොරුතුරු අනාවරණය වුණා,.ලංකාවට පැමිණි සංචාරයගේ ආරක්ෂාවට යම් බාධා ඇතිවිය හැකියි කියලා.”
“ඒ පිළිබද බුද්ධි අංශවලට තොරතුරු ලැබුණා. ඒ තොරතුරු ලැබීමත් එක්ක අපි වහාම ක්‍රියාත්මක වුණා. අදට හරියටම මේ ආණ්ඩුව බලයට පත්වෙලා මාසයයි. මාසය තුළ අවස්ථා කිහිපයකදීම රැස්වුණා.”
“තොරතුරු ලැබීමත් සමග විදෙස් සංචාරකයන් වැඩිපුර ගැවසෙන ආරුගම්බේ, බණ්ඩාරවෙල ඇල්ල, මාතර වැලිගම, අහුන්ගල්ල වෙරළ තීරයට විශේෂ පොලිස් ආරක්ෂාවක් ලබාදුන්නා.”
“එම පොලිස් ආරක්ෂාව මේ මාසේ මුල ඉදළම යොදවන්න කටයුතු කරලා තියෙනවා. ආරක්ෂක මණ්ඩලය තුළ මේ තොරතුරු ගැඹුරින් සාකච්ඡා කළා. බුද්ධි අංශත් පොලීසියත් මගින් පරීක්ෂණ කටයුතු ආරම්භ කළා.”
