ජනාධිපතිවරණයේ ඉදිරි කටයුතු සම්බන්ධයෙන් ඊයේ (28) රැස්වූ මැතිවරණ කොමිෂන් සභා රැස්වීමේදී සාකච්ඡාවට ලක් කර තිබුණි.
ශ්‍රේෂ්ඨාධිකරණ තීන්දුව අනුව, පළාත් පාලන මැතිවරණය පැවැත්වීම සම්බන්ධයෙන් නීතියෙන් පැවරී ඇති බලතල හා කාර්යයන් ක්‍රියාත්මක කිරීමට රාජ්‍ය ආයතන වලින් සහය ලබා ගන්නා බවට ලාංකික ජනතාවට ප්‍රතිඥා දෙන බව එහිදී මැතිවරණ කොමිසම කියා සිටියේය.
අත්තනෝමතික හා අනීතික ක්‍රියා මගින් 2023 වසරේ පළාත් පාලන ඡන්දය නොපැවැත්වීමෙන් ජනාධිපතිවරයා, මුදල් අමාත්‍යවරයා ලෙස ජනතාවගේ මූලික අයිතිවාසිකම් උල්ලංඝණය කර ඇතැයි ශ්‍රේෂ්ඨාධිකරණය පසුගිය 22 වැනිදා තීරණය කර තිබුණි.
එහිදී අධිකරණය පෙන්වා දුන්නේ, මැතිවරණ ක්‍රියාවලිය නිසියාකාරව සැලසුම් කිරීමට සහ කළමනාකරණය කිරීමට මැතිවරණ කොමිෂන් සභාව අපොහොසත් වූ බවය.
අනෙකුත් රාජ්‍ය ආයතනවල සහයෝගීතාවය සුරක්ෂිත කිරීමට අවශ්‍ය උපදෙස් නිකුත් කිරීමට කොමිෂන් සභාව සිය බලතල ක්‍රියාත්මක නොකළ බව ද අධිකරණය පෙන්වා දුන්නේය.
