ආකර්ෂණීය වැටුප් ලැබෙන රැකියා අවස්ථා ලබාදෙන බව පවසා මියන්මාරයේ සයිබර් අපරාධ කඳවුරුවලට තොරතුරු තාක්ෂණ දැනුම ඇති වෘත්තිකයන් වැඩි පිරිසක් රැගෙන යාමට තැනැත්තන් වෙළෙඳාමේ නියුතු පුද්ගලයන් විසින් කටයුතු කරන බව ආරක්ෂක අමාත්‍යංශයේ සයිබර් අපරාධ මධ්‍යස්ථානය අනතුරු අඟවයි.
තායිලන්තය වැනි රටවල ඉහළ වැටුප්වලට තොරතුරු තාක්ෂණ අංශයේ රැකියා ලබාදෙන බවට පොරොන්දු වී ඊට අදාළ සම්මුඛ සාකච්ඡාවලට සහභාගි කරවන මුවාවෙන් එවැනි වෘත්තිකයන් ඩුබායි වැනි රටවලට රැගෙන ගොස් දේශ සීමා හරහා මියන්මාරයේ සයිබර් අපරාධ කඳවුරුවලට බලහත්කාරයෙන් යොදවන බවද හෙළිව ඇතැයි එම මධ්‍යස්ථානය සඳහන් කරයි.
තැනැත්තන් වෙළෙඳාමට එරෙහි ජාතික කාර්ය සාධක බලකාය මෙම අනතුරු ඇඟවීම කර ඇති අතර, එකී සයිබර් අපරාධ කඳවුරුවලදී ඔවුන්ට ශාරීරික වදහිංසා මෙන්ම විදුලිසර ඇල්ලවීම් පවා සිදුකර තිබෙන බව අනාවරණය වී ඇතැයි සඳහන්ය.
නීතිවිරෝධී සංක්‍රමණ මාර්ග භාවිතා කිරීම දැඩි ලෙස අවධානම් මෙන්ම එය ශ්‍රී ලංකා විදේශ සේවා නියුක්ති කාර්යාංශ පනත උල්ලංඝනය කිරීමක් බවත්, රැකියා අපේක්ෂකයන් සංචාරක වීසා ලබාගෙන ගමන් නොකළ යුතු බවත් තැනැත්තන් වෙළෙඳාමට එරෙහි ජාතික කාර්ය සාධක බලකාය අවධාරණය කරයි.
තවද බලයලත් ආයතන මගින් ආරක්‍ෂිත හා නීත්‍යානුකූල සංක්‍රමණ ක්‍රම අනුගමනය කරන ලෙසත් එවැනි අවදානමට ලක්විය හැකි පුද්ගලයන් ආරක්ෂා කරන ලෙසත් එම කාර්ය සාධක බලකාය මහජනතාවගෙන් වැඩිදුරටත් ඉල්ලා සිටියි.
