කැනඩාවට යවන බව පවසා රුපියල් ලක්ෂ පහක මුදලක් වංචා කළ හිටපු ජනාධිපති මෛත්‍රිපාල සිරිසේන මහතාගේ මාධ්‍ය ලේකම්වරයෙක් ලෙස කටයුතු කළ පුද්ගලයෙක් ලබන නොවැම්බර් 13 වැනිදා තෙක් රක්ෂිත බන්ධනාගාරගත කරන ලෙස කොටුව මහේස්ත්‍රාත් තිළිණ ගමගේ මහතා ඊයේ (31) නියෝග කළේය.
සාක්ෂිවලට බලපෑම් කිරීමක් සිදු විය හැකි බැවින් සැකකරු රක්ෂිත බන්ධනාගාරගත කරන ලෙස කොම්පඤ්ඤවීදිය පොලිසිය අධිකරණයට සැකකරු ඉදිරිපත් කරමින් ඉල්ලා සිටියේය.
මෙලෙස රක්ෂිත බන්ධනාගාරගත කරනු ලැබුවේ පොලොන්නරුවේ පදිංචි රසික බණ්ඩාර නමැති පුද්ගලයෙි.
ශ්‍රී ලංකා නිදහස් පක්ෂ පොලොන්නරුව දිස්ත්‍රික් නායක වසන්ත ජයවර්ධන මහතාගේ පුද්ගලික ලේකම් මොහොමඩ් ෂෆීක් නමැති අයකු කළ පැමිණිල්ලකට අනුව සිදු කළ විමර්ශනයකින් අනතුරුව සැකකරු පොලිසියට පැමිණි බවත් චෝදනාව කියවා දී අත්අඩංගුවට ගත් බවත් පොලිසිය අධිකරණයට දන්වා සිටියේය.
(දිනමිණ)
