ප්‍රසිද්ධ නිරූපිකාවන් දෙදෙනකුගේ නමින් ව්‍යාජ ලෙස වට්ස්ඇප් ගිණුම් දෙකක් සකස් කර නිරූපණ ක්ෂේත්‍රයේ රැකියා ලබාදෙන පවසා රූමත් ළාබාල තරුණියන්ගේ නිරුවත් ඡායාරූප උපක්‍රමශීලීව ගෙන්වාගත් පාසල් සිසුවකු අපරාධ පරීක්ෂණ දෙපාර්තමේන්තුවේ පරිගණක අපරාධ කොට්ඨාසයේ සමාජ මාධ්‍ය අපරාධ විමර්ශන අංශය විසින් අත්අඩංගුවට ගෙන ඇත.
අත්අඩංගුවට ගත් එම සැකකරු මෙවර උසස් පෙළ හදාරන 19 හැවිරිදි සිසුවකි.
සැකකරු එලෙස උපක්‍රමශීලීව වට්ස්ඇප් තාක්ෂණය ඔස්සේ ගෙන්වා ගෙන තිබූ රූමත් ළාබාල තරුණියන්ගේ නිරුවත් ඡායාරූප පහළොවකට ආසන්න සංඛ්‍යාවක් පරිගණකය තුළ ගබඩා කර තිබියදී පොලිසිය මගින් සොයාගෙන තිබේ.
සැකකාර සිසුවා 2021 වසරේ සිට මෙම ක්‍රියාව සිදුකර ඇති බවත් ඔහු එලෙස ලබාගෙන තිබූ ළාබාල රූමත් තරුණියන්ගේ නිරුවත් ඡායාරූප විදේශගත කර මුදල් ඉපැයීමේ ජාවාරමක යෙදුණාද? යන්න හා එම ඡායාරූප ලබාදුන් තරුණියන්ට එම ඡායාරූප සමාජයේ ප්‍රසිද්ධ කරන බවට පවසා කප්පම් මුදල් ලබා ගත්තාද? එසේත් නොමැති නම් ඔහු යම් වින්දනයක් ලබා ගත්තාදැයි හෙළිකර ගැනීම සඳහා විමර්ශන ආරම්භ කර තිබේ.
සැකකාර සිසුවා රුපියල් ලක්ෂ 02ක ශරීර ඇපයක් මත මුදා හරින ලෙස කොළඹ ප්‍රධාන මහෙස්ත්‍රාත් ප්‍රසන්න අල්විස් මහතා ඊයේ (16) පස්වරුවේ නියෝග කළේය.
