මොනරාගල නගරයේ සතිපොළ භූමියේදී ඉකුත් 29 වැනිදා පැවති ජනාධිපතිවරණ රැලියකට සහභාගීවීම සඳහා පැමිණි ජනාධිපති අපේක්ෂක රනිල් වික්‍රමසිංහ මහතාගේ ආරක්ෂක ජීප් රථයකට රිලවුන් රැලක් විසින් අරියාදුවක් කර ඇතැයි වාර්තා වේ.
එම ජීප් රථය මාර ගසක් යට නතර කර තිබියදී එම ගසේ සිටි රිළවුන් පිරිසක් ඒ මේ අත දුවන්නට පටන්ගෙන ඇති අතර එම සතුන්ගේ හැසිරීමත් සමඟ එහි වූ දිරච්ච අත්තක් ජීප් රිය මතට කඩා වැටී තිබේ.
ජනාධිපතිවරයා මොනරාගල නගරයේ තිස්සපාරේ තේ පැන් සංග්‍රහයක් බුක්ති විඳීමට ගිය අවස්ථාවේ ඔහුට ආරක්ෂාව සැපයූ ස්කෝපියෝ වර්ගයේ ජීප්රථයකට මේ ඇබැද්දියට මුහුණදීමට සිදුව ඇත.
ජනාධිපතිවරයා ආපසු පිටත්ව යාමට සූදානම්ව සිටියදී නිවස ඉදිරිපිට ජීප්රථය නවතා තිබූ ස්ථානයේ මාර ගසක අත්තක සිටි මෙම රිළවුන් රංචුව කලබල වී ගසේ අතු මත ඔබමොබ දිවගොස් ඇත.
එහිදී ගසේ දිරාගිය අත්තක් ජීප්රථයේ බොනට්ටුව මතට කඩා වැටී ඇත.
ඉන් බොනට්ටුවේ මැදරාමුවාව සහ බොනට්ටුවේ අගුලට හානි සිදුවී තිබේ.
සිද්ධිය පිළිබඳව මොනරාගල පොලිසිය පරීක්ෂණ පවත්වයි.
මූලාශ්‍රය – අරුණ
