එළැඹෙන ජනාධිපතිවරණයේදී රාජ්‍ය සේවකයන් සිය තැපැල් ඡන්දය භාවිත කිරීමේදී බුද්ධිමත්ව කටයුතු කළ යුතු බව පාර්ලිමේන්තු මන්ත්‍රී රාජිත සේනාරත්න මහතා පවසයි.
වත්මන් රජයේ වැඩපිළිවෙළ යම් හෙයකින් වෙනස්වීමකට ලක්වුවහොත් ලබන වසරේ ජනවාරි මස පළමු වැනිදා සිට සියලුම රාජ්‍ය සේවකයන්ට හිමිවීමට නියමිත වැටුප් වැඩිවීම් අහිමිවී යාමේ පැහැදිලි අවදානමක් පවතින බව ඒ මහතා ප්‍රකාශ කළේය.
කොළඹ, මල් පාරේ පිහිටි ජනපති රනිල් වික්‍රමසිංහ මහතාගේ දේශපාලන කාර්යාලයේදී ඊයේ (01) පැවති විශේෂ මාධ්‍ය හමුවකදී අදහස් දක්වමින් පාර්ලිමේන්තු රාජිත සේනාරත්න මහතා මේ බව කියා සිටියේය.
2022 වසරේ දී රනිල් වික්‍රමසිංහ මහතා අග්‍රාමාත්‍ය ධුරය භාරගන්නා අවස්ථාවේ තමන් රට ගොඩනංවන බවත්, ඒ වෙනුවෙන් ටික කලක් ඉවසීමෙන් සහාය දෙන ලෙසත් සිදුකළ ප්‍රකාශය අද වන විට ක්‍රියාවෙන් පෙන්නුම් කර ඇති බව මන්ත්‍රීවරයා පැවසීය.
පසුගිය වසර දෙකේ ජනාධිපතිවරයා ගෙන ගිය ආර්ථක වැඩපිළිවෙළෙහි ප්‍රතිඵල රාජ්‍ය සේවකයන්ට ලබා දී ඇති බවද රාජිත සේනාරත්න මහතා ප්‍රකාශ කලේය.
“ලබන 04, 05 සහ 06 දිනවල මෙවර ජනාධිපතිවරණයේ පළමු වන අදියර වන රාජ්‍ය සේවකයන් සඳහා වූ තැපැල් ඡන්දය ප්‍රකාශ කිරීමේ අවස්ථාව හිමි වනවා.. රාජ්‍ය සේවයේ ලක්ෂ 14කට අධික පිරිසක් සිටිනවා.. එයින් ලක්ෂ 7කට අධික පිරිසක් මෙවර තැපැල් ඡන්දය භාවිත කරනවා.. පසුගිය ඇමැති මණ්ඩල රැස්වීමේදී ඓතිහාසික තීන්දුවක් ගත්තා.. ඒ මූලික වැටුප දෙගුණ කරමින් රාජ්‍ය සේවයේ වැටුප් වැඩි කිරීම සම්බන්ධව.. මෙතරම් විශාල ලෙස වැටුප් වැඩි කිරීමක් ඉතිහාසය කවරදාකවත් සිදු වුණේ නැති බව සඳහන් කළ යුතුයි.. කෙටි කාලයක් තුළ ශ්‍රී ලංකාව අත්කරගෙන ඇති ප්‍රගතිය ආර්ථිකයේ විශ්වකර්ම දෙයක් බව අමෙරිකාවේ දකුණු සහ මධ්‍යම ආසියානු කටයුතු පිළිබඳ සහකාර රාජ්‍ය ලේකම් ඩොනල්ඩ් ලූ පවා ප්‍රකාශ කර තියෙනවා.. ඔස්ට්‍රේලියාවේ හිටපු අග්‍රාමාත්‍යවරයා පසුගියදා ශ්‍රී ලංකාවට පැමිණි අවස්ථාවේදීත් එතුමා ශ්‍රී ලංකාවේ සිදු වී ඇති පරිවර්තනය අසාමාන්‍ය බව ප්‍රකාශ කළා.. විදේශීය නායකයන් අද ශ්‍රී ලංකාව කෙටිකාලීනව අත්කර ගත් ප්‍රගතිය ගැන මවිත වෙනවා.. ඒ නිසා රටේ සමස්ත රාජ්‍ය සේවකයන් මෙවර ජනාධිපතිවරණයේදී තමන්ගේ ඡන්දය භාවිත කිරීමේදී බුද්ධිමත්ව කටයුතු කළ යුතු වෙනවා.. වත්මන් රජයේ වැඩපිළිවෙළ යම් හෙයකින් වෙනස්වීමකට ලක්වුවහොත් දැනට අනුමත කර තිබෙන රාජ්‍ය සේවක වැටුප් වැඩිවීම් මුළුමනින්ම අහිමි වී යනවා.. ඒ නිසා මෙවර ජනාධිපතිවරණයේදී වත්මන් ජනාධිපති රනිල් වික්‍රමසිංහ මහතා ජයග්‍රහණය කළ යුතුයි..”
