Connect with us

පුවත්

ලංකාවට හොඳ එළදෙනුන් ටිකක් දෙන්න ඉන්දියාවෙන් පොරොන්දුවක්!

Published

on

ශ්‍රී ලංකාවට ඉහළ අභිජනන එළදෙනුන් ලබාදීමට ඉන්දීය රජය එකඟ වී තිබේ.

ඒ ශ්‍රී ලංකාව තුළ ඉහළ කිරි නිපදවන ගව විශේෂ නොමැතිවීම නිසාය.

ඉන්දීය මහ කොමසාරිස් ගෝපාල් බග්ලේ මහතා හා කෘෂිකර්ම අමාත්‍ය මහින්ද අමරවීර මහතා සමඟ පැවැති සාකච්ඡාවකදී ඉන්දීය මහ කොමසාරිස්වරයා මේ බව පවසා ඇත.

එසේම, මේ වන විට කඩා වැටී ඇති ශ්‍රී ලංකාවේ පශු සම්පත් සංවර්ධන ක්ෂේත්‍රය යළි නගා සිටුවීම සඳහා පූර්ණ සහයෝගය ලබාදීමට ශ්‍රී ලංකාවේ ඉන්දීය මහ කොමසාරිස් ගෝපාල් බග්ලේ මහතා හා ජනාධිපති රනිල් වික්‍රමසිංහ මහතා අතර පසුගියදා පැවැති සාකච්ඡාවකදී එකඟව ඇති බවද කෘෂිකර්ම අමාත්‍යංශය කියා සිටී.

ආර්ථික අර්බුදය මධ්‍යයේ කර්මාන්තය මුහුණ දී ඇති පසුබෑම හේතුවෙන් ශ්‍රී ලංකාවේ කිරි සහ කිරි ආශ්‍රිත නිෂ්පාදනය හා කිරි නිෂ්පාදනය පසුගිය වසරේ 19% කින් පහත වැටී ඇති බව කෘෂිකර්ම අමාත්‍යාංශය පවසයි.

මේ අතර, 2021 මහ කන්නයේ රටේ බඩ ඉරිඟු අස්වැන්න මෙට්‍රික් ටොන් 90,000 දක්වා පහත වැටීම නිසා රට තුළ සත්ව ආහාර හිඟයක් ඇති වූ බවත්, බඩඉරිඟු ආනයනයට ඩොලර් හිඟය බාධාවක් වීම නිසා මෙය තවත් උග්‍ර වූ බවත් අමාත්‍යාංශය වැඩිදුරටත් කියා සිටී.

කෙසේ වෙතත්, 2022 වසර අවසන් වන විට බඩඉරිඟු මෙට්‍රික් ටොන් 180,000ක් ආනයනය කිරීමටත්, මෙම කන්නයේදී බඩඉරිඟු හෙක්ටයාර් 60,000ක් වගා කිරීමට හැකිව ඇතැයි ද එම අමාත්‍යංශය පෙන්වා දෙයි.

පුවත්

අද ජාත්‍යන්තර  “තේ” දිනය යි

Published

on

By

එක්සත් ජාතීන්ගේ සංවිධානය විසින් අද (මැයි 21) ජාත්‍යන්තර තේ දිනය ලෙස නම් කර ඇත.

ගෝලීය වශයෙන් තේවල සංස්කෘතික වැදගත්කම හඳුනා ගැනීම සහ එහි තිරසාර නිෂ්පාදනය සහ පරිභෝජනය ප්‍රවර්ධනය කිරීම එහි අරමුණයි.

ගෝලීය වශයෙන් වැඩිපුරම පරිභෝජනය කරන දෙවන පානය වන තේ, ග්‍රාමීය සංවර්ධනය, ආහාර සුරක්ෂිතතාව සහ සංවර්ධනය වෙමින් පවතින රටවල දරිද්‍රතාවය අඩු කිරීම සඳහා වැදගත් කාර්යභාරයක් ඉටු කරයි.

ඉන්දියාව, ශ්‍රී ලංකාව, නේපාලය, වියට්නාමය, ඉන්දුනීසියාව, බංග්ලාදේශය, කෙන්යාව, මලාවි, මැලේසියාව, තුර්කිය, මියන්මාරය, ඉරානය, රුවන්ඩාව උගන්ඩාව සහ ටැන්සානියාව වැනි තේ නිෂ්පාදනයේ පුරෝගාමී රටවල පවුල් මිලියන ගණනක ජීවනෝපාය තේ කර්මාන්තයයි.

ලොව පුරා Ceylon Tea හෙවත් ලංකාවේ තේ අතිශය ප්‍රචලිත අතර සංචාරකයන් අතර අප රටේ තේ පිළිබඳ උනන්දුවක් ඇති කිරීමේ අරමුණින් නව වැඩපිළිවෙළක් ආරම්භ කිරීමට ද මේ වනවිට යෝජනා ඉදිරිපත්ය.

සබැඳි පුවත්

Continue Reading

පුවත්

වැසි සහ සුළං තත්ත්වය තවදුරටත්

Published

on

By

බස්නාහිර, සබරගමුව, වයඹ සහ මධ්‍යම පළාත්වලත්, ගාල්ල සහ මාතර දිස්ත්‍රික්කවලත් තවදුරටත් මිලිමීටර 100 ඉක්ම වූ තද වැසි ඇති විය හැකි බව කාලගුණ විද්‍යා දෙපාර්තමේන්තුව පවසයි.

නිවේදනයක් නිකුත් කරමින් එම දෙපාර්තමේන්තුව සඳහන් කර සිටින්නේ, පවතින අධික වැසි සහිත කාලගුණ තත්ත්වය තවත් දින කිහිපයක් පවතිනු ඇතැයි අපේක්ෂා කරන බවය.

මේ අතර අත්තනගලු ඔය සහ උරුවල් ඔය නිම්නවල ඇතැම් පහත්බිම් ප්‍රදේශවලට ඉදිරි පැය 48 තුළ ගංවතුර අවදානමක් ඇතිවිය හැකි බව වාරිමාර්ග දෙපාර්තමේන්තුව විසින් නිවේදනය කරන ලදී.

අත්තනගලු ඔයේ සහ උරුවල් ඔයේ ජල මට්ටම මේ වනවිට වැඩි වෙමින් පවතින අතතර මේ හේතුවෙන් බලධාරීන් දැනුම් දෙන්නේ, දිවුලපිටිය, මීරිගම, අත්තනගල්ල, මහර, මිනුවන්ගොඩ, ජා ඇළ, කටාන සහ වත්තල ප්‍රාදේශීය ලේකම් කොට්ඨාසවල ජනතාවට අවධානයෙන් පසුවන ලෙසයි.

අත්නගලුඔය ද්‍රෝණියට පසුගිය දින කිහිපයේ සැලකිය යුතු වර්ෂා පතනයක් ලැබීම මේ තත්ත්වයට හේතුව බව වාරිමාර්ග දෙපාර්තමේන්තුව සඳහන් කළේ ය.

මේ අතර ඉදිරි පැය 48 තුළ කුඩා ගඟ සහ මගුරු ගඟ සුළු ගංවතුර මට්ටමට පැමිණිය හැකි බව වාරිමාර්ග දෙපාර්තමේන්තුව පවසයි.

ඒ හේතුවෙන් බුලත්සිංහල, මදුරාව සහා පාලින්දනුවර ප්‍රාදේශීය ලේකම් කොට්ඨාසවල පහත්බිම්වල සිටින ජනතාවට අවධානයෙන් සිටින්නයැයි ඔවුන් ඉල්ලා සිටි.

බෙංගාල බොක්ක අවට මුහුදු ප්‍රදේශයේ පවතින කැළඹිලි සහගත තත්ත්වය ඉදිරි දිනවලදී පීඩන අවපාතයක් බවට පත් වෙමින් දිවයිනෙන් එපිටට ගමන් කරන බව කාලගුණ විද්‍යා දෙපාර්තමේන්තුව සඳහන් කළේ ය.

කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක මහතා පැවසුවේ,එහි වක්‍ර බලපෑම දිවයිනට බලපාන බවයි.

ඒ හේතුවෙන් මධ්‍යම, සබරගමුව, දකුණ, මධ්‍යම, උතුරු සහ මන්නාරම් දිස්ත්‍රික්කවල තැනින් තැන වැසි ඇති වන බව ද කාලගුණ විද්‍යා දෙපාර්තමේන්තුව පැවසීය.

පවතින කාලගුණික තත්ත්වය හමුවේ මේ වනවිට දිවයිනේ 8ක පවුල් 8,974ක පුද්ගලයින් 33,493කට තවදුරටත් බලපා තිබේ. එහි වැඩිම බලපෑම වාර්තා වන්නේ, පුත්තලම දිස්ත්‍රික්කයෙනි. එම දිස්ත්‍රික්කයේ පවුල් 8,780ක පුද්ගලයින් 32,710ක් පීඩාවට ලක්ව සිටිති.

පුත්තලම – වනාන්තවිල්ලුව ප්‍රධාන මාර්ගය හතරේ කණුව ප්‍රදේශයෙන් ඊයේ (20) රාත්‍රීයේ ජලයෙන් යට විය. මේ හේතුවෙන් පවුල් 100කට ආසන්න ප්‍රමාණයක් පීඩාවට පත්ව ඇති බව වාර්තා වේ. පවතින කාලගුණික තත්ත්වය සැලකිල්ලට ගනිමින් පුත්තලම දිස්ක්‍රික්කයේ සියලුම පාසල්වලට අද (21) සහ හෙට (22) නිවාඩු ලබා දී තිබේ.

පවතින අධික වැසි තත්ත්වය හේතුවෙන් දිස්ත්‍රික්ක 8කට නිකුත් කළ නාය යෑමේ පුර්ව අනතුරු ඇඟවීම තවදුරටත් බලාත්මකය. බදුල්ල, කොළඹ, ගම්පහ, කළුතර, මහනුවර, කෑගල්ල, ගාල්ල සහ රත්නපුර දිස්ත්‍රික්ක සඳහා එලෙස අනතුරු ඇඟවීම් නිකුත් කෙරුණි.

මේ අතර ගිනිකොණදිග අරාබි සහ නිරිතදිග බෙංගාල බොක්ක මුහුදු ප්‍රදේශවල නැවත දැනුම් දෙනතුරු යාත්‍රා කිරීමෙන් වළකින්නැයි ධීවර සහ නාවික ප්‍රජාවට නිකුත් කළ අනතුරු ඇඟවීම ද තවදුරටත් බලාත්මකය.

Continue Reading

ක්‍රීඩා

ආසියානු සහය දිවීමේ රිදී පදක්කම ලංකාවට

Published

on

By

තායිලන්තයේ පැවැත්වෙන ආසියානු සහය දිවීමේ ශූරතා තරගාවලියේදී අද (20) පස්වරුවේ පැවැති මීටර 400×4 මිශ්‍ර සහාය ඉසව්වේ රිදී පදක්කම දිනාගැනීමට ශ්‍රී ලංකාව කණ්ඩායම සමත් විය.

ශ්‍රී ලංකා ක්‍රීඩකයෝ විනාඩි 3.14.12ක කාලයකදී තරගය නිමාකරමින් මෙම දක්ෂතාවය දැක්වීමට සමත් වූහ.

අරුණ දර්ශණ, සයුරි මෙන්ඩිස්, පසිඳු කොඩිකාර හා නදීෂා රාමනායක යන අයගෙන් ශ්‍රී ලංකා කණ්ඩායම සමන්විත විය.

මෙහි රන් පදක්කම විනාඩි 3.17.00කින් තරගය අවසන් කළ ඉන්දීය කණ්ඩායමත්, ලෝකඩ පදක්කම විනාඩි 3.18.45කින් අවසන් කළ වියට්නාම කණ්ඩායමත් දිනාගත්තේය.

සහාය දිවීමේ ශූරතා තරගාවලියක් ආසියාවේදී පැවැත්වෙන පළමු අවස්ථාව මෙය වීමද විශේෂිතය.

Continue Reading
Advertisement

Trending

Copyright © 2023 Sri Lanka Mirror. All Rights Reserved