ජනතාව මත පවතින බදු බර සැහැල්ලු කිරීමේ වැඩපිළිවෙලක් ගෙන ඒම අවශ්‍ය බව හිටපු අමාත්‍ය – රවී කරුණානායක මහතා පවසයි.
ඔහු මේ බව පැවසුවේ කොළඹ, වැල්ලම්පිටිය වේරගොඩ විද්‍යාලයේ සිසුවියක මියයෑම පිළිබඳ සොයා බැලීමට එම විදුහලේ නිරීක්ෂණ චාරිකාවකට පසුගියදා එක් වූ අවස්ථාවේදී මාධ්‍යවේදීන් නැගූ ප්‍රශ්නවලට පිළිතුරු දෙමිනි.
පාසලේ ප්‍රමිතියකින් තොරව ඉදි කර තිබෙන සියලු ඉදිකිරීම් ප්‍රමිතියකින් යුක්තව ඉදිකිරීම සඳහා කඩිනම් පියවර ගන්නා ලෙස බලධාරීන්ගෙන් කරුණානායක මහතා ඉල්ලා සිටියේය. මීට අමතරව පාසලේ ප්‍රතිසංස්කරණ කටයුතු සඳහාද ඔහුගේ ප්‍රධානත්වයෙන් විශේෂ වැඩපිළිවෙළක් ක්‍රියාත්මක කිරීමටද මෙහිදී පියවර ගැනිණි.
අයවැය හා බදු බර පිළිබඳව අදහස් දක්වමින් ඔහු වැඩිදුරටත් පවසා සිටියේ වැට් බද්ද 3%කින් වැඩි කිරීමට හැර වෙනත් බදු වැඩි කර නොමැති නමුත්, පවතින බදු ප්‍රමාණය සැහැල්ලු කිරීමේ වැඩපිළිවෙලක් ගෙන ඒම අවශ්‍ය බව හිටපු අමාත්‍යවරයා මෙහිදී පැවසීය.
බංකොලොත්භාවයෙන් මිදීමට ජාත්‍යන්තර මූල්‍ය අරමුදල අත්‍යවශ්‍ය වුවත් ඔවුන් පවසන සෑම පදයටම නැටීමට සූදානම් වීම අවශ්‍ය නොවන බවත් සිදුකළ යුත්තේ බදු බර අඩු කිරීමට නිර්මාණශීලි වැඩපිළිවෙළක් ඉදිරිපත් කිරීම බවත් ඔහු පැවසීය.
“බදු ගෙවන කට්ටියගෙන්ම තව බදු ගන්න එක නෙමෙයි තියෙන්නෙ. පරාසය වැඩි කිරීම තමයි අවශ්‍ය වන්නේ,” යැයි කරුණානායක මහතා පෙන්වා දුන්නේය.
