මෙරටට එවන ප්‍රේෂණ අනුව විද්‍යුත් වාහන ආනයනය කිරීම සඳහා විදෙස් ශ්‍රමිකයන්ට ලබා දුන් අවස්ථාව අවභාවිත කර තිබෙන බව අනාවරණය වී ඇතැයි මුදල් කාරක සභාවේ සභාපති ආචාර්ය හර්ෂ ද සිල්වා පාර්ලිමේන්තුවේ දී ඊයේ (10) පැවැසීය.
වාහන නවසියයකට වැඩි සංඛ්‍යාවක් මේ වන විට ගෙන්වා තිබෙන අතර ඉන් සියයට හැටඅටක් ම ගෙන්වා ඇත්තේ ආයතන දෙකකින් පමණක් යැයි ද කී සභාපතිවරයා මෙසේද සඳහන් කළේය.
ඔහු එහිදී මෙසේද කීය.
“විදේශයන්හි සේවය කරන අයට ඉලෙක්ට්‍රික් වාහන ගෙන්වීම සඳහා ලබාදුන් පහසුකම සම්බන්ධයෙන් විවිධ ගැටලු උද්ගත වුණා. ඒ නිසා අපි මුදල් අමාත්‍යාංශය, කම්කරු අමාත්‍යාංශය, මහ බැංකුව, මූල්‍ය ප්‍රතිපත්ති දෙපාර්තමේන්තුව, රේගු දෙපාර්තමේන්තුව හා ආගමන විගමන දෙපාර්තමේන්තුව ඒකාබද්ධව කමිටුවක් පත් කළා පරීක්ෂණ සඳහා. එම කමිටුවේ වාර්තාව ලැබුණා. මේ වැඩේ අවභාවිත කරලා තිබෙනවා කියලා කමිටු වාර්තාව කියනවා. මේ ගැන විශේෂ පරීක්ෂණයක් පවත්වන ලෙස ප්‍රකාශ කර තිබෙනවා. එලෙස වාහන ගෙන්වීමේදී නියමිත ලෙස බදු ගෙවනවාද, ගෙන්වා ඇති වාහන නවසියයට වැඩි ප්‍රමාණයෙන් සියයට හැට අටක්ම ආයතන දෙකකින් පමණක් ගෙන්වූයේ ඇයි, ඒ සඳහා පහසුකම් සපයන්නන් පත් කර ඇත්තේ යන ප්‍රශ්න තියෙනවා. ඒ සඳහා දී තිබෙන බලපත්‍ර මගින් වාහන ගෙන්වීමේදී අය කරන සුඛෝපභෝගී බද්ද මිලියන 6 සිට 12 දක්වා වැඩි කරන්න අනුමැතිය ඉල්ලුවා. නමුත් අපි ඊට අවසර දුන්නේ නෑ. ඒ සම්බන්ධයෙන් අධික්ෂණය කරන්න කියලා මුදල් අමාත්‍යාංශයෙන් ඉල්ලීමක් කළා.”
සබැඳි පුවත්
විදෙස්ගත ශ්‍රමිකයන්ගේ විදුලි කාර් ගෙන්වීමේ කෝටාවටත් බැටේ දීලා
විගමන ශ්‍රමිකයන්ට විද්‍යුත් වාහන බලපත්‍ර ලබාදීම අත්හිටුවලා; දැන් වාහන ගේන්නේ කවුද?
මනූෂගේ පර්මිට්වලින් ගේන්න යන වාහනයක් බදු නැතිව ඩොලර් 120,000යි: රේගුවටත් කට උත්තර නෑ
